Ñim Lo'onatac 'Enauacna ỹan aso maná
1Qaq 'enauac so Israel le'ecpi jec chegoqchiguiña ye Elim, nache ivira'a ye toolec 'alhua ye Sin maye vichiguinguilo ye Elim qataq ye Sinaí. Qaq mashe inoxonec so 'oonolec ca'agoxoic qataq mashe laiñi so lỹa ca'agoxoic co'ollaq chegoqchiguiña ye Egipto. 2Qaq co'ollaq hueta'a so toolec 'alhua, nache 'enauac somayepi quetapeguelec so Moisés qataq so Aarón. 3Nache 'enapeco' somayepi:
«¡'Onaxaictoxo' co'ollaxa Ñim Nataxala' da nache qomi' ỹalauatraña ye Egipto! Cha'aye co'ollaq sonaqtaña yemaye, qalaq ñeso'onaqtaisop naxa ana qarataxaqui maye laỹe' na lapat qataq ỹataqta qomi' comaraxaiqa da sequia'aq. Qalaq che 'eeto' qami' ye qomi' qanqacheerec da qomi' qanaviquiugalo na toolec 'alhua da 'enauac qomi' qaualaacheque na qarqouaxa.»
4Nache Ñim Nataxala' 'enapega so Moisés, 'eeta':
«Aỹem ñanacot qome ca nallec chegoqo'ot na piguem 'eeta'am na auot. Qaq na shiỹaxauapi ỹe'eguenauga qome ca nalota'ai' da chec ye na'a'q. Aỹem sauotaique da saỹaten ca ỹoqta ỹalaxalec da iqataxac qataq ca saishet da ỹalaq. 5Qaq qom mashe ivi' caua seis na'axa'te, nache da qalapon ca qandoua'a ca nma', qalaq qandouo ca nalaiguilo caua dos na'axa'te.»
6Qaq so Moisés qataq so Aarón, 'enapega so Israel le'ecpi, 'eeta':
«Ne'ena avit qami' qauaỹaañi da Ñim Nataxala' nacheñi ñi qami' nqateeguesopa ye Egipto. 7Qaq qonte' nte'eta, qaq qauauañiichigui ca llo'oxoyec Ñim Nataxala', cha'aye Ñimaye hua'aqtegalo qami' da qoquiitapeguelec. Cha'aye ¿negue't qomi' da huo'otaq qomi' qoquiitapegueleguete?
8Nache so Moisés 'enapeco':
Qomele avit, Ñim Nataxala' qami' iquia'axaneque qome ca lapat, qaq qonte' nte'eta qaltaq qami' ỹanema ca nallec chochaq huañi naqa'en. Cha'aye Ñimaye hua'aqtega da qami' qoquiitapeguelec. Cha'aye ¿negue'to' qomi'? Qami' saishet da nache qomi' da qomi' qoquiitapegueleguete, maye nacheñi Ñim Nataxala' Ñim qoquiitapeguelec.»
9Ime, nache so Moisés 'enapega so Aarón, 'eeta':
«Qonapega qome na Israel le'ecpi da nquigueua'a ye hueta'a Ñim Nataxala', cha'aye Ñimaye hua'aqtega da qauem ltaxaỹaxac namayepi».
10Nache so Aarón co'ollaq ñaq detaqtague' 'enauac so Israel le'ecpi, nache 'enauac somayepi ỹamatalec so toolec 'alhua, nache ila'a da llo'oxoyec Ñim Nataxala' co'ollaq nachaxan huetaigui so lo'oc. 11Nache Ñim Nataxala' 'enapega so Moisés, 'eeta':
12«Aỹem sa'aqtega da qauem ltaxaỹaxac na Israel le'ecpi. Qaq qonapega namayepi, qoneta': Qom mashe napalchiguiñi, nache qami' qollequi qome ca lapat, qaq qonte' nte'eta, qalaq qollequi ca nallec, nache ivitta'a da ỹataqta qami' comaraxaiqa. Yaqto' qami' qauaỹaañita da Aỹem Nachaỹem Nataxala' maye Qanatamnaxala'ai.»
13Qaq nacheso se'eso avit nache anac so dachemi ỹataqta nlaqtelec se'eso mataqa'. Qaq so nte'etom so lỹa na'a'q qaltaq anac so 'eco' sheue ỹataqta sa nsatchiguiñi, coleesop so qanayeuta'a mataqa'. 14Qaq co'ollaq mashe imeueegue aso lapaxa so 'eco' sheue, nache se'eso toolec 'alhua no'onalec so isaxa't, 'eco' aloñi, huetalec so 'alhua. 15Qaq co'ollaq ila'a so Israel le'ecpi, nache nnattega't, 'eeta': ¿Negue't ana'ana? Cha'aye saishet da ỹauatton. Qalaxaye so Moisés 'enapeco':
«Nachena na nallec maye qami' ỹanema Ñim Nataxala', da yaqto' qollequi.» 16Qaq 'era da ỹan lamaxasoxonaxac Ñim Nataxala', 'eeta': «Ñi 'oonolec qome da qoñiita ỹacona ca nalota'ai' da chec, qataq ñi 'oonolec maiche naloqten ca lcata ca llalaqpi, qaq dos kilos qome ca ỹacootaua'a ñi 'oonolec.»
17Qaq 'era co'ollaxa da 'eetec so Israel le'ecpi. Huo'o na ỹactec na ỹacona qataq huo'o na saq 'amaqtaq na ỹacona. 18Qaq ivi' dos kilos na ỹacootaua'a ñi 'oonolec, ỹaconeua'a yem lcata ye iuen da chec. Qalaxaye saishet da huo'o ca lli'iỹoxot nam ỹactec na ỹacona, qataq saishet da huo'o ca iueetac nam saq 'amaqtaq na ỹacona.
19Ime, nache so Moisés 'enapega, 'eeta':
«Saishet qome da huo'o ca no'onaxatañi ca aloq da iviraigui ca lỹa na'a'q».
20Qalaxaye ñaqaiyeta huo'o so saishet da ỹalaxaguet so Moisés, nache huo'o so no'onaxatañi na aloq da yaqto' iviraigui so lỹa na'a'q. Qalaxaye se'eso qano'onaxatañi nlaxagui na qoche'l, qataq qauem na laita. Nache so Moisés ỹataqta dalemataỹa somayepi.
21Huaña, nache ñi 'oonolec ỹacootaua'a ye nte'eta yem nalota'ai' da chec ye na'a'q, cha'aye na le'eraxa añi nala' quiguiñi naqa'en so nallec maye 'eeta'am ana aloñi. 22Qaq naxa da ivireuga ye na'a'q seis, nache ñi 'oonolec ỹaconeua'a ye cuatro kilos da yaqto' nalaiguilo soua dos na'axa'te. Nache nam nataxala'pi jec da da'aqtaxaneua'a so Moisés. 23Qalaxaye so Moisés 'enapega somayepi, 'eeta':
«'Era da la'aqtac Ñim Nataxala'. Qonte' laloxoqui da mataxac, qataq da qaỹo'oxoren Ñimaye. Qaq ỹoqo'oye nagui qauauoche qome cam qauauoitaique da qauauoche, qataq qaỹa'añiiuaq cam qauauoitaique da qaỹa'añiiuaq. Ime, qaq qauaỹamaxache ca no'onañi da taỹaigui imauec qonte'».
24Nache somayepi ỹataqta ipactelec da la'aqtac so Moisés da ỹaỹamaxat so nallec da taỹaigui so lỹa na'a'q. Qaq saishet da qauem na laita qataq saishet da huo'o na qoche'l.
25Nache so Moisés 'enapeco':
«Qolliqui anamaye na na'a'q, cha'aye ne'ena na'a'q namaye mataxaqui, qataq laloxoqui da qaỹo'oxoren Ñim Nataxala'. Qaq ỹoqo'oye na na'a'q saishet da huo'o ca qauloỹalec nallec na no'onaxa. 26Qami' ishet da qandoitapegueuo ne'ena nallec, choche ivittraue'c naua seis na'axa'te, qalaxaye da ivireuga ye na'a'q siete maye mataxaqui, nache saishet da huo'o anamaye.»
27Qalaxaye huo'o somayepi so ỹe'eguenauga se'eso nallec se'eso na'a'q siete, qalaxaye saishet da huo'o ca ỹanata. 28Nache Ñim Nataxala' 'enapego' so Moisés, 'eeta':
«¿Chaq laguio', qaq qami' qaỹa'axañiiñi da sa qaualaqailec na ỹamaxasoxonaxacpi qataq na ỹapaxaguenataxanaxacpi? 29Ña qauloỹa'a ctaxa da Aỹem maye Aỹem Nataxala', qami' sanema ye 'oonolec na'a'q da mataxaqui, qaq ỹoqo'oye da inoxoorec naua seis na'axa'te, nache nalaiguilo naua dos na'axa'te na qami' sanema na nallec. Qaq ỹoqo'oye ye na'a'q mataxaqui, nache ñi 'oonolec da qoñiita saishet qome da iraxan ca lma', qataq saishet da huo'o ca taigue.»
30Nache se'eso shiỹaxauapi nmatec se'eso na'a'q siete.
31Nache so Israel le'ecpi ỹamata'ac maná se'eso nallec maye natotac. Asomaye lapagaxai, 'eeta'am ana ala ana cilantro, qataq ỹataqta ama 'eeta'am ana sanquesaxan nauole 'ayiiña da qaỹalecneguet na te'esaq lli'i.
32Ime, nache so Moisés 'enapeco':
«'Era da ỹan la'aqtac Ñim Nataxala', 'eeta': Qauachiỹangui qome aca naloqnaxanaxaqui maye ivi' dos kilos ana maná. Ime, qaq qauaỹamaxache yaqto' lmeena ca qaỹa'alquipi, yaqto' camayepi ishet qome da ỹauatton nam nallec maye qami' sequia'axategueeque co'ollaq qoviitalec na toolec 'alhua co'ollaq qami' ñeqateeguesopa ye Egipto.»
33Nache so Moisés 'enapega so Aarón, 'eeta':
«'Auauo'o qome aca 'auacona aca naco'oña 'alhua, ime, qaq 'auachangui ca dos kilos ana maná. Ime, qaq 'auachaña ye lanataqa' Ñim Nataxala', da yaqto' qaỹaỹamaxat da lmeena ca qaỹa'alquipi.»
34Qaq qaipacchigui da la'aqtac Ñim Nataxala' maye ỹami' so Moisés, nache so Aarón ỹanaña aso naco'oña 'alhua so nalochiguiña aso laỹe' soua lqataxaco Ñim Lo'onatac 'Enauacna, da yaqto' ỹaỹamaxat.
35Huaña, nache so Israel le'ecpi chectac aso maná choche ivittraue'c soua cuarenta vi'iye, choche ivitta'a co'ollaq somayepi ivita ye 'alhua maye mashe qanayeetalec. Qaq 'era da 'eetec somayepi co'ollaq chectac aso maná, choche ivittaua'a so loigue ye 'alhua Canaán.
36Qaq so Israel le'ecpi da naloqten aso maná, nache do'ogoxona aso naloqnaxanaxaqui maye ivi' dos kilos asom le'enaxat gomer.
