Na qalapaxañi lataxacpi na nlatacpi
1Qaq 'ena na iqataxacpi maye 'aua'aqtaxanem qome na Israel le'ecpi, 'eeta':
2«Da huo'o ca desheenaxana ca hebreo le'ec da yaqto' l-latac, nache camaye seis vi'iye da do'onataxaatac qanqa'en, qalaxaye ca vi'i siete nache camaye huesoueeguesop da nlataguec, qataq saishet da iuen da ỹauo'o aca lsheetenaxanaqte. 3Qaq camaye da lamaxaic co'ollaq nvireuo, nache ndotec da ỹe'eguelaq, qaq da huo'otaq huo'o aca lhua, nache nataqa'en lỹatec acamaye da jec. 4Qaq que'eca na'aco' da ỹami' aca 'alo da lhua camaye, qaq acamaye da deco'oiguet camaye, nache ca llalaqpi huo'otaq llalepi aca'aca 'alo, camayepi lalamaxat ca na'aco', qaq que'eca nlatac nache ndotec da jec. 5Qalaxaye que'eca nlatac da sa ỹaconeguet da qaisoueeguesop da nlataguec cha'aye ỹauotec aca lhua, qataq caua llalqa qataq cam na'aco', 6nache que'eca na'aco' iuen da ỹauegueua'a yem lanataqa' Ñim Lo'onatac 'Enauacna, nache naloteua'a naqa'en ñi lasom da ỹa'arec ana ltela camaye. Yaqto' ỹataqta lalamaxat l-latac. 7Qaq da huo'o ca imen aca llale da yaqto' nlata, nache acamaye saishet da qaltaq qaisouec da huo'otaq 'eeta'am ca ỹale da nlatac. 8Qaq ca na'aco' da saishet da ỹacona da ỹauo'o lhua, souaxat da sanqopita acamaye, nache camaye iuen da ỹasheeta da huo'o ca desheenaxana acamaye na maiche lalamaxat lauo' le'ecpi, qalaxaye saishet da imenot ca chegaqauec. 9Qalaxaye da huo'otaq ỹami' ca llalec da ỹauo'o lhua acamaye, nache acamaye ỹataqta 'eco' llale naqa'en. 10Qaq que'eca llalec da ỹauo'o aca lỹa lhua, nache saishet da nquigaxaañi ye lcata na ỹanem nallec acamaye, qataq ca nogoxot, qataq ipacchigui da lataxac da nhuaỹaxac. 11Qalaxaye da saishet da ipagueleguete ne'enaua tres lataxaco maye qaỹamaxaleguete, nache aca'aca 'alo ishet da jec, qalaxaye saishet da iuen da ỹauo'o aca lsheetenaxanaqte.»
Da qalapaxañi lataxac ca sa iren ca lỹa
12«Qaq da huo'otaq huo'o ca ique'emaqchet ca lỹa, qataq ỹalauat, nache camaye nataqa'en qaỹalauat. 13Qalaxaye da saishet da nache 'ena'ac da ỹalauat, souaxat da maiche loga't ñaqa'en da nachaalataxac que'eca ileu, nache aỹem maiche 'am sachaxana qome ca dataigue que'eca dalaataxan da yaqto' nqañoxooñi. 14Qalaxaye da huo'o ca ỹalauat ca lỹa souaxat da nache 'eetai' da nquiỹatega, nache camaye nache 'ena'am qaỹalauat, na'aictaxa da ỹe'egueneua'a aca nca'atoxonaxalate.
15Qaq da huo'o ca ique'emaqchet ca lta'a, huo'otaq aca late'e, nache camaye qaỹalauat.
16Qaq da huo'o ca decachiỹa ca lỹa shiỹaxaua, qataq imen, qalaxaye da qailalec da ñaq neto'ot camaye, nache que'eca decache qaỹalauat.
17Qataq cam isheuen ca lta'a, huo'otaq aca late'e, camaye qaỹalauat.
18Qaq da huo'otaq nhuaxana't caua ỹale't, nache ca 'oonolec da ique'emaqchet ca lỹa irota'a ca coma', huo'otaq ana napocna, qalaxaye saishet da ileu nacherata da ỹo'ot da saq ñesheguem ca lmala', 19qalaxaye que'eca qaique'emaqchet da ishet da queuoỹapigui' na'aictaxa da ỹauota'a lashelte, nache que'eca ỹale maye deque'emaqtaxan, camaye qaica ca lasouaxashet. Qalaxaye nacherata da isheeten ca natannaguec qataq caua na'axa'te da sa do'onataxan camaye.
20Qaq da huo'o ca iuaxan ca l-latac, huo'otaq aca l-lata da irota'a ca 'epaq, qaq da huo'o ca ileu caamaye, nache que'eca deuaxanaxan qaỹauo'o ca nhuaxanaguec. 21Qalaxaye da huo'otaq huo'oi caua na'axa'te da nca'altauec que'eca nlatac, nache que'eca na'aco' saishet da qaỹauo'o ca nhuaxanaguec, cha'aye camaye maiche lalamaxat l-latac.
22Da huo'oi caua nhuaxana't ỹale't, nache da ivira'a da ique'emaqchet aca 'alo hualaxai, qataq ỹo'ot da na'aqñi ca llalec, qalaxaye da qaica ca machaqca da nachaalataxac aca'aca 'alo, nache que'eca dasouaqtaxan isheeten aca iỹaxanaique ca lhua aca'aca 'alo, qalaxaye ipacchigui aca lasheue maye ỹanagui ca nmit qataq ỹaỹamaxaañi da lataxac. 23Qalaxaye da huetalec da lchec da ileu aca'aca 'alo, nache da qaisheeten de'era nachaalataxac nache lasheue ca lỹa achaalataxac. 24Qaq ca ique'emaqchet aca na'aite, nache nataqa'en qaique'emaqchet aca la'aite camaye, qaq da huo'otaq nhue, nache nataqa'en aca lhue camaye, qaq da huo'otaq nhuaq, nache nataqa'en ca lhuaq camaye, qaq da huo'otaq napia', nache nataqa'en qaique'emaqchet na lapia' camaye, 25Qaq da huo'otaq ỹavigaxat ca lỹa, qaq nataqa'en qaỹavigaxat camaye, qaq da huo'otaq deque'emaqtaxan qaq nataqa'en qaique'emaqchet, qaq da huo'otaq deuaxanaxan, qaq nataqa'en qaiuaxan.
26Da huo'o ca ique'emaqchet aca la'aite ca l-latac, huo'otaq aca l-lata nache da tagoxoic naqa'en, nache que'eca 'aco' iuen da ỹaxanec que'eca l-latac souaxat da tagoxoic naqa'en. 27Qataq da huacac naqa'en aca 'oonole lhue, nache nataqa'en iuen da ỹaxanec ca l-latac huo'otaq aca l-lata, souaxat da huacac naqa'en aca lhue.»
Da qalapaxañi lataxac da huo'o ca que'emaq
28«Da huo'o ca nauegaxanaxala' huaca, da iquetogoq ca ỹale huo'otaq aca 'alo, qataq ỹalauat, nache que'eca huaca iuen da qaỹalauat qairota'a ca coma', qataq saishet da qanallec ca lapat, qalaxaye ca lalamaxat que'eca huaca saishet da qaỹauo'o ca nhuaxanaguec. 29Qalaxaye da maiche lataxac que'eca huaca da togoxosoxonaxaic, qataq ivitta'a da huo'o ca ỹalauat, nache qairota'a ca coma' da qaỹalauat, nataqa'en ca lalamaxat camaye, souaxat da ỹaỹaten, qalaxaye saishet da ỹoqocha'a. 30Qalaxaye que'eca lalamaxat ca huaca, da huo'otaq huo'o aca lasheue da nachaalataxac, nache camaye isheeten aca'aca lasheue da maiche lca'alaxa. 31Qaq de'era namaxasoxonaxac qaipagaqchiichigui da huo'o ca iquetogoq nsoqolec, huo'otaq qa'añole que'eca huaca. 32Qaq que'eca huaca da iquetogoq ca nlatac, huo'otaq aca nlata, nache qaỹalauat qairota'a ca coma', qaq ca na'aco' ca nlatac huo'otaq aca nlata, nache qaisheeten, treinta aca lcatpiole plata aca qoỹami'.
33Qaq da huo'o ca ỹauattangui aca lshere, huo'otaq da nshe' aca lshere nache saishet da ỹauo'o ca lapoxot, qaq da tangui ca nauegaxanaxala' huaca, huo'otaq ca 'ashena, 34nache que'eca lalamaqte aca nshere, camaye isheeten ca lalamaxat que'eca shiguiỹac, cha'aye ỹasouaxat da ileu, qalaxaye nache no'ona'aguet cam shiguiỹac maye ileu.
35Qaq ca nauegaxanaxala' huaca da huo'otaq iquetogoq ca lỹa nauegaxanaxala' qaq da ỹalauat, nache camaye qaimen, qalaxaye aca lasheue nache qancolaxatchigui, qataq na lapat ca ileu huaca. 36Qalaxaye da nache 'eetai' da qaỹaỹaten da lataxac que'eca huaca da togoxosoxonaxaic, qalaxaye ca na'aco' da saishet da ỹoqocha'a, nache camaye iuen da isheeten ca lalamaxat que'eca huaca, ỹaneguet ca lỹa huaca nca'altauec, qalaxaye que'eca ileu taỹot camaye.»
