Éxodo 22

₁Qaq da huo'o ca decachiỹa ca nauegaxanaxala' huaca, huo'otaq qagueta, nache ỹalauat huo'otaq imen, nache camaye iuen da desheetenaxanalo caua lỹa't cinco huaca da isheeten que'eca huaca, qaq da huo'otaq qagueta nache lasheue naqa'en caua lỹa't cuatro qagueta. ₂Qaq da huo'o ca cachaxaic da qaỹauanalec da decachetac, qaq da qaique'emaqchet, nache da huo'otaq ileu, qaq que'eca deque'emaqtaxan saishet da lasouaxashet da l-leuaxa camaye. ₃Qalaxaye da huaigui ca na'a'q, nache da l-leuaxa camaye lasouaxashet que'eca dalaataxan.

Qaq que'eca cachaxaic, camaye iuen da isheeten ca lcachaxat, qalaxaye da huo'otaq qaca aca alom da isheeten, nache camaye iuen da qaimen yaqto' isheeten ca lcachaxat. ₄Qaq da huo'otaq qailalec que'eca ncachaxat shiguiỹac, qataq da ña nca'altauec da hueto'ot ca decachiỹa, nache camaye dos qanqa'en caua desheetenaxanalo shiguiỹaxac, na'aictaxa da huaca, huo'otaq 'ashena, qalqo' qagueta. ₅Qaq da huo'o ca ỹachaxanec ca na'atetpi da tauga naqa'en ca lalamaxat na'alhua, nache ca na'atetpi jec da taigui ca lỹa no'onaxa maye ỹaqa'a ca lalamaxat da deque'elec, nache ca lalamaxat ca 'atetpi iuen da isheeten que'eca lalamaxat ca 'alhua, desheetenaxana ca no'on ala ca lañiguishec. ₆Qaq da huo'o ca ỹavigaxat ca ato' ca ỹaqa'a 'alhua, nache ỹavicauga naqa'en ca trigo maye qalapootasheguem, huo'otaq ca nañiguishec lma' maye ñaq tata'a da qanqat na ala, nache que'eca shiỹaxaua maye ỹe'eraxatoigui ca norec camaye iuen da isheeten que'eca nañiguishe lma' maye lasouaxashet da ỹavigoigui. ₇Qaq da huo'o ca pi'iỹa'a ca lỹa da ỹaỹamaxat naqa'en aca alom, huo'otaq ca machaqca logoxoshet maye huo'o da lashiichiỹaxac da yaqto' ỹaỹamaxat, qaq da qaicachiỹa camaye da huaña ca lma' que'eca shiỹaxaua, qaq da huo'otaq qaỹanata que'eca cachaxaic, nache ỹactec qanqa'en aca lsheetenaxanaqte da isheeten ca lcachaxat. ₈Qalaxaye da huo'otaq saishet da qaỹanata que'eca cachaxaic, nache que'eca lalamaxat que'eca nỹec, camaye iuen da qaỹauegueua'a aca atamnaxaqui maye lalamaqte Ñim Nataxala' da yaqto' ỹa'axatta da saishet da ỹacona ca lalamaxat ca lỹa. ₉Qaq 'enauac na ỹotta'a't ncachaxatpi, na'aictaxa da huo'otaq nauegaxanaxala' huaca, 'ashena, qagueta, huo'otaq nogoxot, huo'otaq camachaqca nogoxoshet maye deqat, nache da huo'oi caua dos da 'eeta': «Ne'ena maiche ỹalamaxat», nache caamaye qaỹauegueua'alo aca atamnaxaqui maye lalamaqte Ñim Nataxala', cha'aye ca choche datenataxan, nache ỹactec naqa'en aca lasheue da isheete'n ca ỹoqta lalamaxat que'eca 'atet huo'otaq ca nogoxoshet. ₁₀Qaq da huo'o ca ỹami' ca lỹa shiỹaxaua da ilo'ogue ca lalo 'ashena, lauegaxanaxala' huaca, qagueta, huo'otaq camachaqca lỹa shiguiỹac, nache que'eca shiguiỹac da ileu, huo'otaq qaique'emaqchet, qalqo' qaicachiỹa da qaica ca ỹauangui, ₁₁nache que'eca shiỹaxaua ỹan ca la'aqtac hua'aqchigui naqa'en Ñim Nataxala', da saishet da ỹacona que'eca shiguiỹac maye lalamaxat ca lỹa, nache que'eca lalamaxat que'eca shiguiỹac ỹa'amaqten da la'aqtac camaye, nache ca ilotague' ca shiguiỹac sa iuen da isheeten. ₁₂Qalaxaye que'eca shiỹaxaua da ỹauaachigui da qaicachiỹa ca shiguiỹac, nache iuen da isheeten ca lalamaxat que'eca shiguiỹac. ₁₃Qaq que'eca shiguiỹac da qaito, ito ca shiguiỹac maye dequi'iỹapec, nache que'eca ilotague' camaye, iuen da irouo ca no'onañi que'eca ntoc shiguiỹac, yaqto' sa iuen da isheeten. ₁₄Qaq da huo'o ca da'aalaxana ca lalo shiguiỹac ca lỹa, nache que'eca shiguiỹac da ileu, huo'otaq que'emaq, qataq sa ỹauaalec cam lalamaxat, nache que'eca la'aalec que'eca shiguiỹac camaye iuen da isheeten. ₁₅Qaq da huo'otaq ỹauaachigui ca lalamaxat que'eca shiguiỹac, nache saishet da isheeten. Qalaxaye da isheeten da na'aalec que'eca shiguiỹac, nache iuen da nachaqacata aca lasheue da na'aalec isheeten.

₁₆«Qaq da huo'o ca ỹale da ỹatenachet aca qa'añole, maye saxanaxa da hue'eguet ca ỹale, qataq lauañi' acamaye, nache que'eca ỹale iuen da isheeten ca lta'a aca qa'añole, qataq nache huaroneguet acamaye. ₁₇Qalaxaye ca lta'a aca'aca qa'añole da huo'otaq sa ỹashen acamaye da huaron, nache que'eca ỹale iuen da isheeten da lataxac da lashiichiỹaxac aca'aca qa'añole. ₁₈Saishet qome da 'anca'alaxattauec aca conaxanaxai. ₁₉Qaq 'enauac na shiỹaxauapi da huo'o ca hue'eguet ca shiguiỹac, nache qaỹalauat.

₂₀Qaq ca shiỹaxaua da ỹanot ca lachetaqtaxanaxat ca lỹa atamnaxala', qaq saishet da nacheñita Ñim Nataxala' da ỹanot, nache camaye qaỹalauat.

₂₁Saishet qome da sa qauyacñiỹapec qataq qavi'iñiỹai' ca chegaqauec, cha'aye qami' nataqa'en qauachegoqỹauec, qauachoqỹa'a co'ollaxa ye Egipto.

₂₂Saishet qome da sa qauyacñiỹapec aca pa'aipi qataq ca saploqpi, ₂₃cha'aye da sa qauyacñiỹapec camayepi, nache da aỹem iỹaxanot da setauan, nache Aỹem setauan camayepi, ₂₄nache ỹataqta lta'araic da ỹalemataic. Nache qami' seroleguete ca ỹeelonec da qami' salaua't, nache ishet da pa'aipi aca qaramoxouaipi, qataq ca qaỹa'alquipi nache saploqpi.

₂₅Qom huo'otaq 'aua'aalaxanaxan ca shiỹaxaua choxoraq nam ỹalamaxatpi maye qami' netanguilo, nache saishet qome da qoneta'am ca na'aalaxanaxala', da 'auauo'o aca nquiguisheguem 'anqa'en aca 'om maye na'aale. ₂₆Qaq que'eca shiỹaxaua da huo'otaq 'am ipatano'ot ca lapo', souaxat aca lavigaxaiste, qaq no'on da 'avi'eguelaxatot camaye ca lpatanec qom inoxootapiguiñi añi nala'. ₂₇Cha'aye que'eca lapo' nachecata da napotapiguiña da huo'o na latomaxa. ¿Cha'aye negue'to' ca napogoña da nnaañi? Ỹoqo'oye camaye da aỹem iỹaxanot ca ntaunaguec, qalaq setauan, cha'aye aỹem choxonnataxanaxaic.

₂₈Saishet qome da 'aue'enai' ca nmit na nasouaxashetpi, qataq saishet da 'auasaxalec ca qauem 'ara'aqtac cam lataxala' na nhuo' le'ecpi. ₂₉Saishet qome da 'auaỹaloxon da 'andouo aca 'arachetaqtaxanaqte ana la'auaxana ala ca trigo qataq ca la'auaxanec lli'i aca uva.

Qataq ca 'ara'auaqteguishec 'aỹa'alec Aỹem 'aỹa'anem, ₃₀nache 'ena'am ca la'auaxanec llalec aca 'arelo huaca, qataq qagueta, qalaxaye 'aua'axaỹa'a da siete na'axa'te da neto'ot aca late'e, qaq ca na'a'q ocho nache Aỹem 'aỹa'anem. ₃₁Qataq qami' maye qaiỹotaugalo da ỹataqta qami' ỹalamaqa'ate.

Saishet qome da qollequi na lapat ca ltoc ca shiguiỹac maye dequi'iỹapec, nacherata da qauasaqaiỹot ca pioxoppi.»