Qaỹe'eguelaxalec da qaỹa'axat da llec da aỹamaxataxac
1Nache Ñim Nataxala' 'enapega so Moisés, 'eeta':
«'annotsheguemec qome ana qasoxonaxa da yaqto' 'am setaxaỹapegue', 'annaictague' ñi Aarón, Nadab, Abiú qataq ca setenta lqueroxonecpi na Israel le'ecpi, qalaxaye saishet qome da ỹapac saqaỹapeque qanqa'eñi na soota'a, qataq ỹa'attrañi qome naua l-llecte. 2Chaq 'amta qome maye ishet da aỹem 'anquigueua'a, qaq ca laỹepi, qalaxaye saishet da Aỹem nquigueua'a, qataq saishet da huo'o ca 'arỹatcheguem camayepi.
3Qaq co'ollaq ime da qana'aqtaxaatague' so Moisés, nache ñe'eguelañi da da'aqtaxanem 'enauac so shiỹaxauapi na la'aqtacpi qataq na lqataxacpi Ñim Nataxala'. Nache 'enauac somayepi 'oonolec da lasataxac, 'eeta':
‹¡So'otaq qome 'enauac nam damaxasoxoolecpi Ñim Nataxala'!›
4Ime, nache so Moisés ỹiyiñi 'enauac na la'aqtacpi Ñim Nataxala'. Nache so nte'etom so lỹa na'a'q, nache no'ottasheguem. Ime, qaq no'oxoosheguem aso nca'atoxonaxalate, ỹaatot na loigue aso qasoxonaxa qataq no'oxooyishegue'm soua doce coma' naloqchiichigui ye lcata soua doce llalqa so Israel. 5Ime, nache ỹamaq so nsoxoppi Israel le'ecpi da ỹauo'o ca lachetaqtaxanaxat huaca maye qaỹavigaxatta qataq aca nachetaqtaxanaqte maye qanhuachiigui. 6Ime, nache so Moisés ỹacona so laỹe se'eso ntago'q ỹauo'o aso laỹe'pi. Qaq so laỹe se'eso ntago'q, qalaxaye ichegoxolec aso nca'atoxonaxalate. 7Qaq co'ollaq ime, nache ỹacona aso nere maye huetalec da aỹamaxataxac, nache itaxaỹaxan, na'axaỹaxana naqa'en so shiỹaxauapi. Nache somayepi 'enapeco':
‹Qomi' so'otaq qome 'enauac nam qomi' ỹamaxaleguete Ñim Nataxala'›.
8Ime, nache so Moisés ỹacona se'eso ntago'q, nache ichegoxolec 'enauac so shiỹaxauapi. Nache 'enapeco':
‹Ne'ena ntago'q, nachena na ỹoqta 'itchiguiñi naqa'en da Ñim Nataxala' qami' naỹamaxateto, chegoqchiguilo ne'enaua la'aqtaqa Ñimaye›.
9Ime, nache so Moisés tasheguemec aso qasoxonaxa, nnaictague' so Aarón, Nadab, Abiú qataq so setenta lqueroxonecpi so Israel le'ecpi. 10Huaña, nache somayepi ỹauaachigui da lataxac Ñim Natamnaxala' so Israel le'ecpi, qaq na pa'aguiñi naua lapia'ate qalaq qashelec 'eeta'am na no'on coma' le'enaxat zafiro, qataq ỹataqta yo'oqoolec, 'eeta'am da lo'oxoỹaxac na piguem. 11Qaq Ñim Lo'onatac 'Enauacna saishet da huo'o ca 'ena'ac se'eso lataxala'pi so Israel le'ecpi som ỹauaachigui Ñimaye. Huaña, nache somayepi deque'etac qataq nỹomtac.»
So Moisés qaltaq huetasheguemec aso qasoxonaxa
12Nache Ñim Nataxala' 'enapega so Moisés, 'eeta':
«'Annotsheguemec qome ana qasoxonaxa, 'auanasheguema na soota'a. Ime, qaq aỹem 'auata'aguet, 'am sanema qome caua coma' cam settaleguete naua iqataxaco qataq naua ỹamaxasoxonaxaco, da yaqto' 'auapaxagueneque na Israel le'ecpi.
13Ime, nache ñesheguem so Moisés, nache tasheguemec aso qasoxonaxa maye lma' Ñim Lo'onatac 'Enauacna, nnaictague' so ltaua le'enaxat Josué. 14Qaq co'ollaq yaqta'a da jec, nache 'enapega so nqueroxonecpi, 'eeta':
‹Nache qoviita'a qome ne'ena, qomi' qauachiỹa'agueta, nato' qom ñe'eguelaxasoq. Da Aarón qami' no'ona'agueta qataq da Hur, qaq sa iuena'a da huo'o ca 'oonolec da qoñeeta da huo'o ca nqalaata'ai', qaq maiche naua'alo daamaye.›
15Qaq co'ollaq ime, da la'aqtac so Moisés, nache tasheguemec aso qasoxonaxa, qaq asa'aso qasoxonaxa ỹataqta nauequeelec so lo'oc. 16Nache da llo'oxoyec Ñim Nataxala' anac da imattalec aso qasoxonaxa Sinaí, qaq ivi' soua seis na'axa'te da imattalec so lo'oc aso qasoxonaxa. Qaq co'ollaq mashe iviteuga so na'a'q siete, nache Ñim Nataxala' chemaxaigui so lo'oc co'ollaq iỹaxana so Moisés. 17Nache yo'oq da llo'oxoyec Ñim Nataxala', 'eeta'am ca norec da davigaqtaxanapec, huetalec aso lmilo aso qasoxonaxa, qaq ỹauaachigui 'enauac so Israel le'ecpi. 18Nache so Moisés huenoxonoigui se'eso lo'oc da tasheguemec aso qasoxonaxa. Huaña, nache ivi' soua cuarenta na'axa'te qataq cuarenta pe' da huetasheguemec asomaye.»
