1«Qataq 'auo'ot qome ca npe'l, qaq camaye 'auo'o't caua diez lapoxonqa'ate, 'auauota'a ca hualoq laỹe maye chegaqaigui na ỹoqta no'on lino, qataq ca hualoq laỹe malaxaraic da lo'oxoỹaxac, qataq ca hualoq laỹe togaxaraic, qataq 'auo'o't caua ne'enaqtaqa shiỹaxau' maye huo'oi naua laua't qantetrañi da llo'oxoraxat camaye. 2Qaq 'enauac que'eca napoxonaxatpi iuen da 'eeta'a't ye lalogaxa, doce metro y medio ye lalogaxa, qaq ca hua'axagui ivi' dos metro ye lcateueegue. 3Qaq nache 'antera'a't caua laỹel caua cinco, yaqto' nache qota'a't qome que'eca napoxonaxat, qataq dos que'ecaua nataxau', qataq nache 'aue'enaxatchigui da 'auo'o't que'ecaua lỹa't cinco da 'antera't, 4qataq 'auo'ot aca la'aitepi, qataq imalaqalec da lo'oxoỹaxac ca ltetaxat caua loiguiye que'eca la'auaxanec napoxonaxat. Nataqa'en caua laỹel que'eca pa'atec lỹa napoxonaxat. 5Nache que'ecaua dos napoxonaqa'ate maye nataxau', caamaye 'auo'ot aca cincuenta la'aitepi naua laỹel ñi 'oonolec laỹe, ime, nache 'auataxaata't. 6Qataq 'auo'ot nataqa'en ca cincuenta ca lemaxaquipi chegaqaigui na oro, yaqto' ishet da qoỹemaxa't que'ecaua napoxonaqa'ate maye nataxau', nache ima'a't yaqto' 'oonolec ca ndaqa' que'eca npe'l. 7'Auo'ot nataqa'en qome caua once ca no'oxonec quetaq laue, yaqto' nache lapoxot ca ndaqa' maye qui'itta. 8Qaq 'enauac que'eca no'oxonecpi nache 'eeta'a't qome ye lalogaxa ñi 'oonolec no'oxonec, ivi' trece metro y medio qataq dos metro ye lcateueegue. 9Qataq 'antera't caua cinco ca no'oxonecpi da 'auo'ot ca napoxonaxat lta'araic, qataq 'antera't caua lỹa't seis da 'auo'ot ca lỹa napoxonaxat lta'araic, qaq camaye 'anana't qome da yaqto' lapoxot ca ñegueuo que'eca npe'l. 10Qataq 'auo'ot qome aca cincuenta la'aitepi caua laỹel ñi 'oonolec que'eca napoxonaxat, qataq caua laỹel que'eca lỹa napoxonaxat nataqa'en cincuenta aca la'aitepi. 11Nataqa'en 'auo'ot ca cincuenta lemaxaquipi chegaqaigui ca lcat bronce, yaqto' da qoỹemaxa't aca la'aitepi, nache ima'a't que'eca npe'l. 12Qalaxaye que'ecaua napoxonaqa'ate que'eca npe'l ye ỹactrec caua lsheeneqa, nache 'aua'aqta'a da naxattrañi, yaqto' nache ỹapotaua'a na l-laq ca npe'l. 13Nache que'ecaua ỹactrec lsheeneqa que'eca napoxonaxat maye ivi' ca cuarenta y cinco centímetros ca 'oonolec laỹe qataq cuarenta y cinco centímetros ca lỹa laỹe, nache lapoxot ca laỹe qataq na lỹa laỹe que'eca npe'l 14Qataq 'auo'ot qome ca 'ampa'axanasheguem da 'alapaxalec ca pa'aỹasheguem que'eca npe'l, 'auauota'a ca lo'oc ana qagueta maye lqo'oilaxat ca togaxaraic, qataq 'ampa'axanasheguem ca lỹa lo'oc maye ỹataqta no'on. 15Nache 'auo'o't qome caua nchiigui'ishe 'epaxaye acacia, no'oiteguelo 'anqa'en da yaqto' lauoqtel que'eca npe'l. 16Qaq ñi 'oonolec que'eca nchiiguishec 'epaqpi, nache ivi' ca cuatro metro y medio ye lalogaxa, qataq sesenta y cinco centímetros ye lcateueegue, 17qataq que'ecaua dos laỹel 'auauo'oi caua qaichiguinguilo da yaqto' ishet da na'atta't da qaỹauaxaỹaxana't que'ecaua 'epaxaye, qaq nache 'eeta'a't 'anqa'en da lataxac 'enauac que'eca 'epaqpi maye no'onataxat ca npe'l. 18Qaq veinte caua nchiigui'ishe 'epaxaye caua pa'aira'ague 'anqa'en da la'añaxa, 19qataq 'auo'o't caua cuarenta na lcat plata da yaqto' na'attaleguete que'eca nchiiguishec 'epaqpi. Qaq ñi 'oonolec que'eca nchiiguishec 'epaqpi nache dos caua na'attaleguete, yaqto' que'ecaua qaichiguinguilo que'ecaua nchiigui'ishe 'epaxaye ishet da na'atta't. 20Qataq da lỹa laỹe que'eca npe'l, maye pa'aỹa'ague da sheu', 'auauo'oi caua veinte 'aua'ara't ca nchiiguishec 'epaq, 21qaq ca cuarenta ca lcat plata maye pa'aguiñi, dos 'anqa'en ca na'attaleguete ñi 'oonolec que'eca nchiiguishec 'epaqpi. 22Qataq 'auo'o't caua seis nchiigui'ishe 'epaxaye, nache 'aua'ara't da 'apa'axana'ague da nala' lliguiñi que'eca npe'l. 23Qataq 'auo'o't caua lỹa't dos nchiigui'ishe 'epaxaye, nache 'anañalo caua pa'aira'ague caua lallemaqreuo que'eca npe'l. 24Qaq que'ecaua 'epaxaye nache na'atta't, qataq qota'aguet na pa'asheguem qataq na pa'aguiñi. Qataq nache 'eetec caua dos lỹa't maye nera'ague da pa'aigue caua lallemaqreuo. 25Qaq ocho qome que'ecaua qaỹa'ara't nchiigui'ishe 'epaxaye maye na'attalec qanqa'en caua dieciséis lcat plata, nache dos caua na'attaleguete ñi 'oonolec que'ecaua 'epaxaye. 26Nataqa'en 'auo'o't qome caua cinco nllecnaxanaqa'ate na 'epaqpi acacia, da yaqto' nlletañi ca nchiiguishec 'epaq na 'oonolec laỹe que'eca npe'l, 27qataq cinco caua lỹa't 'epaxaye da pa'aira'ague da lỹa laỹe, qataq caua lỹa't cinco da yaqto' nlletrañi ca nchiiguishec 'epaqpi maye pa'aỹa'ague da avit. 28Qaq que'eca laiñiguishec nllecnaxanaxat maye hua'axagui na laiñi ca nchiiguishec 'epaqpi, nache ivira'ata 'anqa'en da lỹa loga't. 29Qataq 'auo'oxoolec ca oro 'enauac cam nchiiguishec 'epaqpi, qataq 'auo'ot aca la'aitepi yaqto' nache tachiviigui ca l-llecnaxatpi. 30Nache da 'auo'ot que'eca npe'l, qalaq 'aue'enaxatchigui da lataxac som 'am sachaxana co'ollaq huaña añi qasoxonaxa. 31Qataq 'auo'ot qome ca lapoxonaxat hualoq laỹe imalaqalec da lo'oxoỹaxac, tocalec, qataq togaxaraic da lo'oxoỹaxac, qataq ca chegaqaigui na ỹataqta no'on lino. Qataq 'auamaxalec ca ỹaỹaten da le'enaqtaxanaxac da yaqto' ỹe'enaxa't caua dos shiỹaxau' maye huo'oi naua laua't, da yaqto' llo'oxoraxa't que'eca napoxonaxat. 32Ime, nache 'emaxagui aca lemaxaquipi lcat oro, maye netaguilo caua cuatro lashel maye chegaqaigui ana qo'oipaq acacia, maye qalapaxalec ca lcat oro, qataq na'atteleguete 'anqa'en caua cuatro lo'oxonaxalatel maye chegaqaigui ca lcat plata. 33Ime, nache que'eca napoxonaxat 'emaxagui ca lemaxaquipi, qaq que'eca napoxonaxat nache ỹa'an ca loga't ca ndaqa' maye qui'itta, qataq ca ndaqa' maye sa qaishetapec, qaq aca laỹe' caua nqataxaco nache 'aỹa'anaña ca pa'auo ca napoxonaxat. 34Ime, qataq 'auacona ca lapoxot, nache 'auapogongui aca laỹe' caua nqataxaco, nache 'aỹa'anaña ca ndaqa' maye sa qaishetapec. 35Qaq que'eca nquia'axala' camaye 'aỹa'anaña qome ca npa'aỹauec ca napoxonaxat, qataq pa'aỹa'ague da sheu' ca ndaqa' maye qui'itta. Qaq aca ncoỹaraxanaxaqui nache pa'aỹa'ague da taguiñi, datatta 'anqa'en ca nquia'axala'. 36Qaq ca ñegueuo que'eca npe'l, nache 'auamaxasoxoolec da qaỹo'ot ca lapoxonaxat hualoq laỹe imalaqalec da lo'oxoỹaxac, tocalec, qataq ca togaxaraic da lo'oxoỹaxac qataq ca chegaqaigui na ỹoqta no'on lino, nache qanteeñi ca llo'oxoraxatpi. 37Ime, nache que'eca napoxonaxat 'auo'o't caua cinco lashel maye chegaqaigui ana qo'oipaq acacia, 'alapaxalec ca lcat oro, qaq ca lemaxaquipi maye chegaqaigui ca oro, nache na'atteleguete 'anqa'en caua cinco maye chegaqaigui ca lcat bronce.»
