Éxodo 28

₁«Qaq 'am, qonapega qome ñi Aarón qataq soua llalqa Nadab, Abiú, Eleazar qataq so Itamar da yaqto' nachesoua qome soua itaxaỹaxanaxanqa da sachegoxotaigui na Israel le'ecpi. ₂Qataq 'auamaxasoxooleguete qome caua alogo so 'arqaỹa Aarón qataq soua llalqa yaqto' ỹo'ot da llo'oxoyec qataq da 'enec. ₃Qataq 'anmitaique qome ca sanem co'ollaxa da ỹaỹaten da ỹo'ot ca nogoxot qataq da ỹo'ot ca leraxat ca nogoxot da ỹo'oxoraqta naqa'en, yaqto' ỹo'o't caua alogo so Aarón. Qaq da ime, nache sanagui da lo'onataxanaxac da itaxaỹaxanaxanec. ₄Qaq que'ecaua anogo maye qaỹo'o't hua'auchiguiñi ca: ntogue lapoxot le'enaxat pectoral, qataq ca lỹa lomaxaqui nhuomaigui le'enaxat efod, qataq ca npo', qataq aca npoto logorai, qantetta na leraxat, qataq ca nqaic alaxa, qataq ca nasot alaxa, chegaqaigui na lino. Qaq 'era da 'eetec qome da 'auamaxasoxooleguete da qaỹo'o't caua alogo so 'arqaỹa Aarón qataq soua llalqa, cha'aye seỹotaugalo da itaxaỹaxanaxanqa. ₅Qaq da qaỹo'o't que'ecaua anogo, nache qaỹo'onataxana na oro qataq na hualoq laỹe imalaqalec, tocalec, togaxaraic da lo'oxoỹaxac qataq na chegaqaigui na lino. ₆Qaq da qaỹo'ot ca npo' maye qaiuomaigui le'enaxat efod, nache qaỹo'onataxana na oro, hualoq laỹe imalaqalec, tocalec, togaxaraic da lo'oxoỹaxac, qataq na ỹoqta no'on lino qantetta na leraxat. ₇Qataq qaỹo'ot caua lque'ete qota'a't da yaqto' nllañi somaye. ₈Qaq ca lasot alaxa maye nllañi ca efod camaye nataqa'en chegaqaigui na oro, hualoq laỹe imalaqalec, tocalec, togaxaraic qataq na ỹataqta no'on lino. ₉Qataq 'auaconalo caua dos coma'ye na ónice, nache qoỹereleguete caamaye naua doce le'enaqa'ate soua llalqa so Israel. ₁₀Qaq seis na qoỹerelec ca 'oonolec coma' qataq seis ca qoỹerelec ca lỹa coma' na le'enaxatpi namayepi, qalaxaye qailoteguet ye lañoxoqui ñi 'oonolec. ₁₁Qaq que'eca lo'o ca 'otaxatpi nacheca qome ca ỹerelec que'ecaua dos coma'ye naua le'enaqa'ate soua llalqa so Israel ỹe'enaxatchigui da 'eetec da ỹerelec aca na'anaxanaqte. Nache lapaxagueta na oro caua coma'. ₁₂Nache ỹanaguilo naua lallaco ca npo' le'enaxat efod, yaqto' so Aarón ỹacheta'ape caamaye netaleguete naua lallaco naua le'enaqa'ate soua llalqa so Israel, yaqto' lỹateuo da taua'a ye lanataqa' Ñim Nataxala', nache namayepi saishet da qaicoua'ai. ₁₃Qaq da qalapaxañi, nache qaỹauota'a ca lo'oxonaxala' oro, ₁₄Ime, nache qaỹauo'oi caua dos qaipaxata'aguelo na oro, no'oxootaua'alo qanqa'en que'ecaua lo'oxonaxala'ate oro que'ecaua coma'ye.

₁₅Qaq ca ntogue lapoxot le'enaxat pectoral maye netanguilo caua coma'ye maye ỹo'ot da qaỹaỹaten ca 'eetapeguec Ñim Nataxala', camaye da qaỹo'ot nache llo'oxoraxat qanqa'en na oro, qataq na hualoq laỹe imalaqalec, tocalec, togaxaraic qataq na ỹataqta no'on lino. Nache 'eeta'am qanqa'en da no'onataguec so efod. ₁₆Qaq camaye ivi' veintidós centímetros, qataq qaỹe'enaxatchigui ca noxoiqui da lataxac. ₁₇Ime, nache qalapaxalec na ỹataqta no'on coma'piolec, ca hua'auchiguiñi hua'axagui tres caua coma'yolqa caua qoỹanaguilo inoicchiguiñi qanqa'en. Ñi 'oonolec qalapaxalec na rubí, crisólito, qataq na esmeralda, ₁₈qaq ca lỹa pa'aguiñi qalapaxalec ca coma' granate, zafiro, qataq jade, ₁₉qaq ca lỹa pa'aguiñi qalapaxalec ñi 'oonolec na coma' jacinto, ágata, qataq amatista, ₂₀Qaq ca pa'atec hua'axagui ñi 'oonolec qalapaxalec na coma' topacio, cornalina, qataq jaspe. Qaq caamaye no'oxootalec qanqa'en ca lcat oro. ₂₁Qaq que'eca coma'pi, nache ivi' doce, cha'aye ivi' doce soua llalqa so Israel. Qaq ñi 'oonolec ca coma'piolec huetalec na le'enaxatpi se'eso nhuo' le'ecpi, 'eeta'am ana na'anaxanaqte. ₂₂Nataqa'en 'auo'ot ca qaipaxata'ague na lcat oro da yaqto' lque'ete que'eca ntogue lapoxot le'enaxat pectoral. ₂₃Qataq 'auauo'oi caua dos la'aite chegaqaigui na oro, nache qoỹanaguilo naua lsheeneqa que'eca ntogue lapoxot. ₂₄Nache que'ecaua dos npaqtaqa oro qoỹanaguilo caua la'aitel pa'ayeshegue'm que'eca ntogue lapoxot. ₂₅Nache naua lsheeneqa caua npaqtaqa qaiqotaxana'agueta caua lallagui'ishe ca qaiuomaigui npo' le'enaxat efod ₂₆Qataq 'auo'o't caua lỹa't dos la'aitel oro, nache 'aỹa'anaguilo caua lỹa't lsheeneqa maye pa'ayiñi ca ntogue lapoxot da yaqto' qota'aguet qanqoỹen ca lomaxaqui nhuomaigui le'enaxat efod. ₂₇Qataq 'auo'o't caua lỹa't la'aitel, chegaqaiguilo na oro, nache 'aỹa'anaguilo ca dataỹa'ague ca alo' ca lomaxaqui qaiuomaigui sa qaỹapeque 'anqa'en ca lasot alaxa. ₂₈Nache caua la'aitel ca lomaxaqui qaiuomaigui le'enaxat efod qaỹo'ot ca lquet malaxaraic da qaicoñera'aguet ca ntogue lapoxot, yaqto' caamaye ishet da qota'a't. ₂₉Nache so Aarón da taigui ca npe'l maye huaña qome da nauane' Ñim Nataxala', nache ỹaañi que'eca ntogue lapoxot da yaqto' qaỹaỹaten ca 'eetapeguec Ñim Nataxala', qataq nache netalec ana ltogue caua le'enaqa'ate soua llalqa so Israel da taua'a Ñim Nataxala', yaqto' nache 'eetai' da saishet da qaicoua'aisalo soomaye. ₃₀Nache que'eca ntogue lapoxot qaỹacherangui qome ca Urim qataq ca Tumim. Ỹoqo'oye iuen da netaleguete ana ltogue so Aarón da taua'a ca lanataqa' Ñim Nataxala'. Cha'aye caamaye nachecaua caua chegoqchiguilo qome da qaỹaỹaten ca 'eetapeguec Ñim Nataxala'.»

₃₁«Qataq 'auo'ot qome aca lapoto ca ntaxaỹaxanaxanec, chegaqaigui 'anqa'en ca hualoq imalaqalec da lo'oxoỹaxac, ₃₂qataq caua laỹel ca lqosot aca'aca npoto 'auauo'o ca lqosotshec yaqto' saishet da colaqa'ague. ₃₃Qataq 'auo'ot aca llo'oxoraqtepi ne'enaqta qo'oipaq ala, 'auauota'a ca hualoq laỹe imalaqalec, tocalec, togaxaraic, qataq 'aỹa'aachiguingui ca laiñi aca natoinapiole, maye chegaqaigui na lcat oro, nache 'aviraxata'a't da 'anaua'alo caua laỹel aca'aca npoto, ₃₄qaq da 'aỹa'anauo acamayepi nache hua'auñi da 'aỹa'anauo aca 'oonole ne'enaqta qo'oipaq ala hualoq laỹe, qataq ca'attalec aca 'oonole aca natoina maye chegaqaigui na oro, qataq ca'attalec aca lỹa ne'enaqta qo'oipaq ala hualoq laỹe, nache ivittec 'anqa'en caua laỹel aca npoto. ₃₅Nache ñi Aarón ỹaañi qome aca'aca npoto da ỹacoolec da lo'onataxanaxac, da ivita da inoxonoigui ca npe'l, qataq da huenoxonec, nache iuen da qaỹa'aqtega da l-lamaxa aca'aca natoinapiole, nache qaỹaỹaten da ñimaye saishet da ileu.»

₃₆«Nataqa'en 'auo'ot qome ca lapaqaic na lcat oro, nache 'erelec camaye da na'aqtac, 'eeta': ‹Qaiỹotauga da lalamaxat Ñim Nataxala'›. ₃₇Nache que'eca lapaqaic lcat oro, 'aỹa'analec ca latapshec que'eca nqaic alaxa, qataq 'auo'o't ca lquet imalaqalec da lo'oxoỹaxac, nache 'acoñetchiguiñi camaye. ₃₈Qaq camaye nache latapshec 'anqa'en ñi Aarón, cha'aye ñi Aarón nacheñi ñi ỹaneuo qome na nasouaxashetpi da yaqto' qaỹapalaxat. Yaqto' Ñim Nataxala' ỹaỹamaxareeta aca lachetaqtaxanaqtepi na Israel le'ecpi. ₃₉Nache aca'aca npoto qataq ca nqaic alaxa chegaqaiguilo 'anqa'en na ỹoqta no'on lino. Qaq ca lasot alaxa ỹo'oxoraqta 'anqa'en ca leraxat. ₄₀Qaq ñeua llalqa ñi Aarón nataqa'en 'auo'o't caua lapotol qataq caua lasot alaxa, qataq caua lqaic alaxa ỹataqta ỹo'oxoraqte' 'anqa'en. ₄₁Qaq 'era da 'eetec da no'otaxac 'anqa'en ñi 'arqaỹa Aarón, qataq ñeua llalqa. Ime, nache 'aucoreleguete naua lqaigo ca aceite, da yaqto' huo'o da 'eneque, qataq 'auỹotaugalo da itaxaỹaxanaxanqa. ₄₂Nataqa'en 'auamaxasoxooleguete caua lpa'axanaqtel chegaqaiguilo na lino, ₄₃yaqto' ñi Aarón qataq ñeua llalqa, nache ỹaatrañi caamaye da taua'alo ca npe'l maye huaña qome da nauaare' Ñim Nataxala', huo'otaq da taua'alo aca nca'atoxonaxalate da ỹacooleguete da lo'onataxanaxa'c, yaqto' qaica ca ne'enaxa'c qataq saishet da ileu'. Qaq 'era da chochaq tatec namaxasoxonaxac maye qoỹanem ñi Aarón, qataq cam chegoxoguetpi.»