Éxodo 30

₁«Nataqa'en 'auo'ot qome aca lca'atoxolate ca nchenaxanaxat, chegaqaigui na qo'oipaq acacia. ₂Qaq acamaye ivi' ca cuarenta y cinco centímetros ye locta qataq cuarenta y cinco centímetros ye lcachiguiñi qataq ivi' noventa centímetros ye loquitcheguema, qataq 'anaua'alo caua lsheeneqa aca nca'atoxonaxalate caua lcoue nache ima'agueta 'anqa'en. ₃Qataq 'ampa'axanasheguem da 'alapaxalec na lcat oro 'enauac acamaye, nataqa'en 'aconnaxaasopa caua pa'airashegue'm loga'te na oro. ₄Nataqa'en 'auo'o't caua la'aitel, qaq dos caua 'anaua'alo ca 'oonolec laỹe, qataq dos caua 'anaua'alo ca lỹa laỹe acamaye. Yaqto' la'araxaqui' caua 'epaxaye maye naconqa da qaỹache. ₅Qaq que'ecaua 'epaxaye maye chegaqaigui na acacia, da 'auo'o't nache 'alapaxaleguete ca lcat oro. ₆Qaq da ime, nache aca'aca nca'atoxonaxalate 'aỹa'anaña ca pa'auec ca napoxonaxat maye naloteuga ca netaña aca laỹe caua nqataxaco, maye huaña da 'am ñauane'. ₇Qaq 'enauaque naua na'axa'te, nache ye nte'eta, ñi Aarón huapegue' da ỹaỹamaxaañi aca ncoỹaraxanaxaquipi, nache nataqa'en ỹavigaxat ca nchenaxanaxat maye ama da laitaỹaxac, ỹachalec aca nca'atoxonaxalate. ₈Nataqa'en da avit da ỹe'eraxatoigui aca ncoỹaraxanaxaquipi, nache nataqa'en ỹavigaxat ca nchenaxanaxat, qataq ỹauaachigui naqa'en Ñim Nataxala'. Qaq 'era qome da nache 'eetai' lataxac da qoyecỹaxaqui qataq ca qaỹa'alquipi. ₉Qataq aca'aca nca'atoxonaxalate saishet qome da 'auachalec da 'auavigaxat ca nchenaxanaxat maye qaỹachegoxotauec, qataq da 'auachalec aca nachetaqtaxanaqte maye 'auavigaxatta, huo'otaq aca nañiguishe ala, huo'otaq da 'aucorelec ca nachetaqtaxanaxat lataxa. ₁₀Qataq ye 'oonolec vi'i nache huetoigui da ñi Aarón, ỹo'ot aca nachetaqtaxanaqte ỹavigaxat da yaqto' qaỹapalaxat ca lasouaxashet ca dalaxaic ñalaqpi, nache ca ltago'q aca nachetaqtaxanaqte maye qanhuaachigui ỹa'ame'n caua lcoue aca nca'atoxonaxalate. Nache aca'aca nca'atoxonaxalate ỹataqta sa qaishetapec».

₁₁Ñim Nataxala' 'enapega so Moisés, 'eeta': ₁₂«Da ivita da 'auo'ot aca ne'enaxat lmalate da 'analoqna't ye Israel le'ecpi, nache ñi 'oonolec yemayepi ỹauo'o aca lsheetenaxanaqte da Aỹem ỹanot, da yaqto' lasheue da nachaalataxac, yaqto' saishet da huec naua ỹotta'a't napaxaco maye ishet da qanlema. ₁₃Qaq ñi 'oonolec que'eca 'ereguishecpi Aỹem ỹanot qome aca cinco gramos ca lcat plata, maye tachigingui na laiñi ye lcata aca nsheetenaxanaqte da qoỹaneua'a ca npe'l. ₁₄Qataq 'enauac cam 'ereguishecpi maye napacalec ye veinte vi'i da nachaalataxac, iuen da ỹaneuo aca lsheetenaxanaqte da Aỹem ỹanot, ₁₅qataq da ỹaneuo aca lsheetenaxanaqte, nache que'eca sallaxanec, saishet qome da napacalec aca cinco gramos ca lcat plata aca ỹaneuo, qataq ca choxoraq nataqa'en saishet da desheetenaxana aca sa ivi' aca cinco gramos ca lcat plata. ₁₆Qataq nache 'am qome da 'auaconeguet aca'aca nsheetenaxanaqte da qaisheeten da achaalataxac. Ime, nache 'aỹa'anem ca ntaxaỹaxanaxanecpi da yaqto' isheeten 'enauac nam qaỹo'otpi maye huaña ca npe'l. Qaq damaye nache ỹo'ot da Ñim Nataxala' mashe ỹaỹaten da na Israel le'ecpi mashe isheeten da nachaalataxac».

₁₇Ñim Nataxala' 'enapega so Moisés, 'eeta': ₁₈«'Auo'ot qome ca nỹoxonaxaqui qataq ca lmala', chegaqaigui na lcat bronce qataq 'anlaxatchigui qome ca 'etaxat. Ime, nache ñichiguinguilo 'anqa'en ca npe'l qataq aca nca'atoxonaxalate, ₁₉yaqto' ñi Aarón qataq ñeua llalqa da iuen ca 'etaxat da iỹoi' naua lhuaxaye qataq naua lchel, nache ỹachegoxotangui camaye. ₂₀Nache da inoxooreua'a ca npe'l, huo'otaq da taua'alo aca nca'atoxonaxalate da yaqto' Aỹem ỹanoto aca nachetaqtaxanaqte maye qaỹavigaxat, ₂₁nache iỹoi' naua lhuaxaye qataq naua lchel. Yaqto' saishet da ileu'. Qaq 'era qome da nache 'eetai' lataxac da llec da lo'onataxanaxac ñi Aarón qataq cam chegoxoguetpi».

₂₂Ñim Nataxala', qaltaq 'enapega so Moisés, 'eeta': ₂₃«'Alaique qome aca ỹataqta no'on huoue maye ama da laitaỹaxac, nache seis kilos 'anqa'en ca ỹataqta no'on lcha'q le'enaxat mirra, qataq tres kilos ca lcha'q aca canela, qataq tres kilos ca 'eco' coqta maye ama da laitaỹaxac, ₂₄qataq seis kilos ca casia, qataq ca seis litro ca aceite. Qataq nache ipacchigui aca lasheue maye qoỹaneua'a ca npe'l. ₂₅Nache 'enauac camaye 'aualecna't da yaqto' 'auo'ot ca ncoraxanaxat, 'aue'enaxatchigui ca lo'o na coraxat da ỹo'ot camaye. Qaq que'eca ncoraxanaxat nache lcoraxat da huo'o ca qoỹaneuo da yaqto' qaiỹotauga, ₂₆nache camaye 'aucoraxana da 'aucorelec ca npe'l, qataq aca laỹe' caua nqataxaco, ₂₇ca nquia'axala' qataq ca lhuenecpi, ncoỹaraxanaxaqui', qataq ca lhuenecpi, qataq aca lca'atoxolate ca nchenaxanaxat, ₂₈qataq aca nca'atoxonaxalate da qaỹavigaxat na nachetaqtaxanaxat, qataq 'enauac ca lhuenecpi, nỹoxonaxaqui, qataq ca lmala'. ₂₉Qaq 'era da 'eetec da 'auỹotauga camayepi da yaqto' sa qaishetapec, qaq da huo'o ca choche nhuoiguet camayepi nache nataqa'en iuen da qaiỹotauga».

₃₀«Nataqa'en ñi Aarón qataq ñeua llalqa da ivita da 'aỹa'anagui da lo'onataxanaxa'c da ntaxaỹaxanaxanaqa, nache 'aucoraxana que'eca ncoraxanaxat, ₃₁qataq 'aua'aqtaxanem qome na Israel le'ecpi ne'ena iqataxacpi, 'eeta': Ne'ena coraxat nache 'eetai' qome naua vi'iye da nache lcoraxat da huo'o ca qoỹaneuo da yaqto' qaiỹotauga. ₃₂Qataq saishet da qaicorelec ca choche shiỹaxauatto, huo'otaq da qauauo'oi ca lỹa maye 'eeta'am da no'onataguec da qaỹo'ot da ncoraxanaxat. Ne'ena ncoraxanaxat saishet da qaỹa'ashaxaatac. ₃₃Qataq da huo'o ca ỹo'ot ca ncoraxanaxat da 'eeta'am da no'onataguec namaye, qataq da icorelec ca camachaqca shiỹaxaua, nache camaye qaỹo'orauec, ca'ai qanqa'en ca lauo' le'ecpi.»

₃₄Ñim Nataxala' 'enapega so Moisés, 'eeta':

«'Aulaique qome aca ỹotta'a't huouepi maye ama da alaitaỹaxac, qataq 'eeta'a't 'anqa'en ye lcata ca 'auacona lcha'q aca ámbar, gálbano, qataq ca no'on nchenaxanaxat, ₃₅nache 'enauac camaye 'aualecna't da yaqto' 'auo'ot ca ỹataqta no'on da laitaỹaxac nchenaxanaxat, 'aue'enaxatchigui ca lo'o na coraxatpi da ỹo'ot ca ỹotta'a't coraxatpi. ₃₆Qataq 'aulaxachigui ca laỹe camaye, ỹataqta huesotchigui 'anqa'en, nache 'auachichiguiña ca saqaỹapeque aca laỹe' caua nqataxaco, maye netaigui ca npe'l maye huaña qome da 'am ñauane'. Qaq que'eca nchenaxanaxat camaye ỹataqta sa qaỹa'ashaxaatac, ₃₇qataq saishet da 'auo'ot qome ca lỹa nchenaxanaxat da 'eeta'am da no'onataguec que'eca 'aro'onatac. Cha'aye camaye lalamaxat Ñim Nataxala', qataq sa qaishetapec. ₃₈Qaq da huo'o ca 'oonolec da ỹo'ot ca nchenaxanaxat da 'eeta'am naqa'en camaye da yaqto' maiche lalamaxat da nchenaxat, nache camaye qaỹo'orauec, ca'ai qanqa'en na lauo' le'ecpi.»