So ne'enaqtac huaca llalec
1Qaq so Israel le'ecpi co'ollaq ila'a da qaỹaloqta da huenoteeguesop aso qasoxonaxa so Moisés, nache nqo'oneua'a so Aarón, nache 'enapega, 'eeta':
«Tashe qoñisheguem, nache 'auo'ot ca qanatamnaxala' ne'enaqtac da yaqto' sataqtaueegue, cha'aye sa saỹaanaq ca 'eetec que'eca Moisés maye qomi' nqateeguesopa ye Egipto».
2Nache so Aarón, 'enapeco':
«Aỹem da so'ot de'era nache seuen ca lcat oro. Ỹoqo'oye qanqachi qome ana lshetepi ana qaramoxouaipi qataq na qaỹa'alquipi ỹalleppi qataq 'alpi. Ime, qaq aỹem qandoiua'a.»
3Nache 'enauac somayepi nqat aso lshetepi. Ime, nache iroua'a so Aarón, 4nache somaye ỹaconeguet. Ime, qaq ỹasaxaigui aso nqatelaxaqui na lcat oro, ỹachangui aso no'onataxaqui, nache ỹo'ot so le'enaqtac huaca llalec. Nache so shiỹaxauapi ỹa'alaqtagui, 'eeta':
«¡Israel, 'iñi ñi qanatamnaxala'ai maye qami' nqateeguesopa ye Egipto!»
5Qaq so Aarón co'ollaq ila'a de'era, nache ỹo'ot aso nca'atoxonaxalate. Ime, nache ỹa'alaxalec somayepi, 'eeta':
«¡Qonte' so'otaq ca qayo'oxonnataxanaxac da sho'oxorenaq Ñim Nataxala'!»
6Nache so nte'etom so lỹa na'a'q, nache no'ottasheguem somayepi da yaqto' ỹaneuo aso lachetaqtaxanaqte maye qaỹavigaxatta, qataq aso qanhuaachigui. Ime, nache 'enauac somayepi nso'ooñi da deque'e, qataq nỹom. Qaq so ime nache dasora't. 7Nache Ñim Nataxala' 'enapega so Moisés, 'eeta':
«'Aue, 'aunotec, ten, ye 'arhuo' le'ecpi maye 'anqateeguesop co'ollaxa ye Egipto, mashe qauem. 8Yemayepi ỹataqta sanaỹaloxon da ca'ai da llec da ỹamaxasoxonaxac. Qataq ỹo'ot ñim le'enaqtac huaca ỹachegoxotaigui na nqachilliguishec oro, nache natameetacot, qataq ỹanot ana lachetaqtaxanaqtepi, nache 'eeta' da la'aqtac: ‹¡Israel 'iñi ñi qanatamnaxala'ai maye qami' nqateeguesopa ye Egipto!›
9Qaq Ñim Nataxala' nataqa'en 'enapeco' co'ollaq 'eetega so Moisés, 'eeta':
Aỹem mashe sauatton da lataxac yi'iye nhuo' le'ecpi da ỹataqta saishet da ỹalaq. 10¡Qaq nagui, nache Aỹem 'aua'aqta'a, ten mashe 'eroigui da ỹalemataic, nache ñematchiguiñi qome yemayepi! Qaq 'am, qalaxaye 'am sachegoxotchigui qome ca qalota shiỹaxauapi.»
11Qalaxaye so Moisés ỹauo'o da la'aqtac, huotaique da nmanaqchet Ñim Nataxala', 'eeta':
«'Am Nataxala', ¿Ta'ainco' da huotaique nnoxotasheguem 'anqa'en da 'arayeloxo da 'aualemataỹa ye 'aralamaxat nhuo' le'ecpi, maye 'aurolec co'ollaxa da ỹataqta lta'araic 'ara'añaxac co'ollaq 'anqateeguesop ye Egipto? 12¿Ta'ainco' ctaxa da 'aua'aqta'a da huo'o ca la'aqtac ye Egipto le'ecpi da, 'eeta'?: ‹Ñim Lo'onatac 'Enauacna nqatec yemayepi, cha'aye huotaique da choche ỹalauat, hualec naqa'en añi qasoxonaxa, qataq nshetaique da choche ỹapalaxat, yaqto' saishet da huetalec ana 'alhua›. Qaq ỹoqo'oye 'am shenapega da 'aỹa'axaañi da 'annogonaxac, qataq 'aỹa'axaañi da 'anshetaique da 'ana'aqchet ye 'aralamaxat nhuo' le'ecpi. 13Qataq 'antoueeta'ac qome so 'ara'aqtac maye 'aỹa'anema co'ollaxa soua 'aramaxa'she Abraham, Isaac qataq so Israel, co'ollaq qoneta': Aỹem qome ỹataqta qalota ñaqa'en ca qaỹa'alquipi, 'eeta'am ye lcata ana huaqaañipi maye hueto'ot na piguem. Qataq qami' sanema 'enauac ne'ena 'alhua maye qami' sachaxanapeguema, da yaqto' nache 'eetai' da qaralamaxachi.»
14Nache Ñim Nataxala' nmooñi da layeloxo, nache ỹaxaañi da ỹauotaique nmatchiguiñi so lalamaxat nhuo' le'ecpi. 15Nache so Moisés ñe'eguelaxañi, ca'ai aso qasoxonaxa, qataq nacheta'ape soua dos coma'ye maye nanettaleguete 'enauaque soua dos laỹel soua nqataxaco. 16Qaq nacheñi Ñim Lo'onatac 'Enauacna da maiche lo'onataqa soomaye, qataq Ñimaye maiche lerec som nanettalecpi se'esoua coma'ye.
17Qaq so Josué co'ollaq hua'axaỹa da la'alaxac so shiỹaxauapi, nache 'enapega so Moisés, 'eeta':
«Chetot da la'alaxac da alaataxac ye qanayeuta'a nanataqa'».
18Qalaxaye so Moisés 'enapeco':
«Dam sa'aqtega saishet da lo'onec ca dauegaxaatai', huo'otaq da lo'onec ca daquicotac da noxonec, damaye ỹaqa'a».
19Qaq co'ollaq sa qaỹapeque so mataqa' maye qanayeuta'a, nache so Moisés ila'a co'ollaxa so ne'enaqtac huaca llalec, qataq so dasottacpi, nache somaye ỹataqta 'eroigui da lalemataic, nache nhuaxaayiñi soua nasoqta'alo coma'ye, ỹataqta dolachiguilo naqa'en huaña so loigue añi qasoxonaxa. 20Ime, qaq taỹa so ne'enaqtac huaca llalec, nache ỹacona da yaqto' ỹasaxangui so norec, qataq ilaxachigui, iviraxatta'a da ndotec lsoche, nache ỹasaxangui so 'etaxat. Ime, nache ỹamaxalec so Israel le'ecpi da nỹomgui se'eso 'etaxat. 21Ime, nache 'enapega so Aarón, 'eeta':
«¿Negue't ca 'am ỹo'otec ne'ena shiỹaxauapi ye 'auauega da ỹo'ot da lta'araic lasouaxashet?»
22Nache so Aarón 'enapeco':
«'Am ỹataxala', saishet qome da aỹem 'aualemataỹa. Qataq 'auaỹaten mque' da ne'ena shiỹaxauapi nqopita da ỹo'ot na sa ỹaỹamaxañi. 23Cha'aye namayepi maichena da aỹem 'enapega, 'eeta': Qoñisheguem qome, nache 'auo'ot ca qanatamnaxala' ne'enaqtac da yaqto' sataqtaueegue, cha'aye sa saỹaanaq ca 'eetec que'eca Moisés maye qomi' nqateeguesopa co'ollaxa ye Egipto». 24Nache aỹem shenapec da ỹa'aqtac: «Da huo'o ca hueto'ot ca lcat oro, nache no'on da iỹotauga.» Nache namayepi aỹem ỹanem so lcat oro, nache sasaxangui so norec, qaq nache chegaqaigui se'eso ne'enaqtac huaca llalec.
25Nache so Moisés co'ollaq ila'a da se'eso Israel le'ecpi qaica ca 'eco' ỹaueca'aguet, cha'aye so Aarón sa ỹaỹaten co'ollaxa da ilo'ogue somayepi. Nataqa'en tachigui lauel da huo'o qome da le'enaxanaxac so npa'aguenaxauapi se'eso nhuo' le'ecpi. 26Nache somaye nachaañi, huetaviigui so ñegueuo so nanataqa' maye qanayeuta'a, nache 'enapeco':
«'Enauac na hueta'aguet Ñim Nataxala' nache naicna'a.»
Nache 'enauac so leviitapi laponeua'a somaye. 27Nache so Moisés 'enapeco':
«'Eeta' da la'aqtac Ñim Nataxala', Ñim Natamnaxala' na Israel le'ecpi: Ñi 'oonolec da qoñiita na'achigui qome ca lainec. Ime, qaq qavi'iguelqaiua'a ye nanataqa' maye qanayeuta'a da qaunoxoñiua'alo naua nanataqa'ate, nache ñi 'oonolec da qoñiita ỹalauat ca maiche lqaỹa, ca nauochaxaua, huo'otaq ca lauoreua.»
28Nache so leviitapi ỹalaxaguet co'ollaxa da lamaxasoxonaxac so Moisés, nache se'eso na'a'q ileu so tres mil shiỹaxauapi. 29Nache so Moisés 'enapeco':
«Nagui qauacoñiiguet da huo'o naq 'enec da qoñiita, cha'aye Ñim Nataxala' qami' ỹanaguilo da qami' ntaxaỹaxanaxanaqa da qaitaxaỹapegue' Ñimaye. Cha'aye ñi 'oonolec da qoñiita dataỹa'aguet da nqanaxat na maiche llalec, qataq lqaỹa, souaxat da qaualaqaiguet Ñimaye.»
30Qaq so lỹa na'a'q, nache so Moisés 'enapega na shiỹaxauapi, 'eeta':
«Qami' ỹataqta lta'araic da qarasouaxashichi. Qalaxaye nagui aỹem sasheguema ye hueta'a Ñim Nataxala', shapegueto' da sañoxot da choche qami' ichoxore'n da ỹapalaxat da qarasouaxashichi.»
31Nache so Moisés ỹe'eguelaxasheguema so hueta'a Ñim Nataxala', nache 'enapego', 'eeta':
«Ỹataqta 'eesa yi'iye nhuo' le'ecpi da lta'araic da lasouaxashet souaxat da ỹo'ot so natamnaxala' ne'enaqtac lcat oro. 32Ỹoqo'oye nagui 'am ñachoxonnot da choche 'auchoxoren da 'auapalaxat de'era lasouaxashet yemayepi. ¡Qaq qom saishet da 'auchoxoren yemayepi, nache no'ono' da 'auapalaxat qome da ỹe'enaxat maye 'ettalec aca 'ere!»
33Qalaxaye Ñim Nataxala' 'enapeco':
«Aỹem, nachecata ca Aỹem hueto'ot ca lasouaxashet, nacheca cam sapalaxat aye ỹere. 34Qaq ỹoqo'oye qojec qome, 'auauega ye 'alhua maye sheetega sanem yi'iye nhuo' le'ecpi. Qaq so ñale, nacheso so 'am ỹaueca'aguet qome. Qalaxaye qom ivita ca na'a'q da sauo'o ca nhuaxanaguec, nache sauo'o ca nhuaxanaguec cam huo'o ca lasouaxashet.»
35Nache Ñim Nataxala' namaxa da nhuaxanaguec se'eso nhuo' le'ecpi, souaxat da natamnot so ne'enaqtac huaca llalec maye lo'onatac co'ollaxa so Aarón.
