So dalaxaic aỹamaxataxac
1Nache Ñim Nataxala' 'enapega so Moisés, 'eeta':
«'Auche'c qome caua dos coma'ye, 'aue'enaxatchiguilo soua hua'auchiyiñi, yaqto' sereleguete soua na'aqtaqa maye nanettaleguete co'ollaxa soua hua'auchiyiñi coma'ye maye 'aulaxachiguilo. 2Qataq 'anaỹamaxattac qome, cha'aye qonte' nte'eta nache 'asheguema añi qasoxonaxa Sinaí. Yaqto' Aỹem 'anauane' da huaña ye ỹataqta qaỹoqotcheguema ana lmilo añi qasoxonaxa. 3Qaq saishet qome da huo'o ca 'annaicapegue', qataq saishet da huo'o ca choche huetalec aña'añi qasoxonaxa, qagueta, huo'otaq huaca da lquia'aqa' ye sa qaỹapeque añimaye.»
4Nache so Moisés ỹo'o't soua dos coma'ye, ỹe'enaxatchiguilo soua hua'auchiyiñi. Qaq so nte'etom so lỹa na'a'q, nache ỹaconalo da yaqto' ỹache' soomaye, nache tasheguema añi qasoxonaxa Sinaí. Nache ipacchigui da la'aqtac Ñim Nataxala'. 5Nache Ñim Nataxala' huenotec, nactaigui so lo'oc, nache hueta'a som netaña so Moisés, qataq Ñimaye nasaxauec da le'enaxat. 6Ime, nache nlectelec so Moisés, na'axanneque naua la'aqtaqa, da detaqtac, 'eeta':
«¡Nam Nataxala'! ¡Nam Nataxala'! ¡Nam Lo'onatac 'Enauacna maye soxoraic qataq choxonnataxanaxaic! ¡Namaye qaỹoqchiguinguit da lalemataic, qataq lta'araic da lsoxoyec, qataq ỹataqta 'eesa! 7Nam ỹataqta qaica ca loga't da lauotaxanaqtaic, qataq ishet da ichoxoren ca huo'o ca npe'enaxac qataq ca sa ỹalaq, qataq ca huo'o ca lasouaxashet. Qalaxaye nataqa'en ishet da ỹauo'o ca nhuaxanaguec ca shiỹaxaua maye qauema naua ỹo'otta'ape, qataq ca llalaqpi, laualpi qataq ca llalaqpi ca laualpi camaye.»
8Nache so Moisés sa naỹaloxon da ỹa'alyiñi naua l-llecte da nqapaxaneguet na 'alhua da natamen. 9'Eeta':
«¡'Am Nataxala'! Qom ỹataqta 'eesa da aỹem 'auchoxoren, qaq no'on da nache qomi' qoueta'agueta qome. Aỹem saỹaten da ne'ena shiỹaxauapi ỹataqta 'eesa da sa ỹalaq, qalaxaye 'onaxaico' da 'auapalaxat qome na qarasouaxashet qataq na qaye'etaxaloxosat, qataq 'auacona da ỹataqta qomi' 'aralamqa'ate.»
Qanaralaxat da aỹamaxataxac
10Nache Ñim Nataxala' 'enapeco':
«Ñaq Aỹem 'ana'axaỹaxana, Aỹem so'ot nagui ca ñaỹamaxataxac da yaqto' 'am ñaỹamaxate' ỹauaachigui ñaqa'en na 'arhuo' le'ecpi, qataq so'ot ca sa qaỹauanapega ño'oxoyec maye saishet da ỹauanapigui na ỹotta'a't shiỹaxauapi maye netaleguete naua lỹa't 'aleu'. Qaq 'enauac na shiỹaxauapi maye netaña ne'ena 'alhua maye qoneta'a, ỹauaachigui ca so'ot nagui, Aỹem maye Nachaỹem Nataxala', cha'aye ỹataqta qaica ca 'ena'am da llo'oxoyec qome ca qami' so'oteque.
11Qaq da ỹataqta qaupaquiitelec da qami' sanema ỹa'aqtac, nache Aỹem samaqauec qome ye amorreopi, cananeopi, hitiitapi, ferezeopi, heveopi qataq ye jebuseopi.
12Saishet qome da qanaỹamaxache' na netalec yi'iye 'alhua maye qaunoxoñiiua'a qome, yaqto' saishet da qaue'enaxache da qauem lataxac yemayepi. 13Nacherata da qanlaxachiiñi qome 'enauac aca lca'atoxonaxalatepi, qataq ca ne'enaqtac coma'pi maye atamnaxala'pi qataq ca lqui'ipi aso Aserá.
14Saishet qome da qanatamñiỹot ca camachaqca atamnaxala', cha'aye Ñim Nataxala', Ñimaye ỹataqta ca'alaxanaxaic. Qaq da le'enaxat Ñimaye 'eeta': Ñim Lo'onatac 'Enauacna maye qaica ca ishetapec.
15Saishet qome da qanaỹamaxache' ye netalec yi'iye 'alhua, ten, qom qami' ỹauegalo da nataqa'en da qauo'oche de'era nquisheshaxac da natamnot na natamnaxala'pi, qataq da ỹanot aca lachetaqtaxanaqte nache nataqa'en qami' ỹanema da qollequi que'eca nachetaqtaxanaxat, 16huo'otaq da ỹaronaxanaxan ca llalpi, nache ỹaronaxaneguet ca qaỹa'alquipi, qaq aca llalpi yemayepi da huo'otaq nquisheshe da natamnot na natamnaxala'pi, nache acamayepi ishet da nquisheshaxanaxan ca qaỹa'alquipi da huo'otaq ỹo'ot de'era quishishaxac maye ỹo'ottac acamayepi.
17Qataq saishet qome da qauo'oche ca qanatamnaxala'ai da qauachegoxochiỹaigui ca lcat nqachilliguishec.»
Soua na'axa'te ño'oxonnataxanaxaqui' huaiguilo ye 'oonolec vi'i
18«Qauo'oche qome ca na'a'q ño'oxonnataxanaxaqui da qaỹo'oxoren da qanallec aca nauole maye qaica na lalegue da ỹasheeraxachigui, qaq nache siete na'axa'te da qollequiitac acamaye. Qataq huetoigui qanqa'eñi ca ca'agoxoic Abib, cha'aye nache vichigui co'ollaq qoquiỹa'ai ye Egipto. 19Qataq 'enauac na la'auaxanec qaỹa'alquipi nache ỹalamaxat, nache 'eeta'am na la'auaxanec llalec ỹale ana qareloi huaca, qagueta qataq ana quetaq. 20Qaq ca la'auaxanec llalec aca 'ashena, camaye nmeneguet qanqa'en ca qagueta llalec, huo'otaq ca quetaq llalec, qaq da saishet da huo'o ca nmeneguet, nache camaye iuen da qainoxon na lqosot da qaỹalauat. Nataqa'en iuen da qaỹauo'o aca nachetaqtaxanaqte da lasheue ca na'auaxanec ñalec. Ỹoqo'oye saishet qome da huo'o ca Aỹem naua'a da huo'otaq qui'itchiguilo naua lhua'q. 21Qataq qauo'onataxañi caua seis na'axa'te, qaq ca na'a'q siete nache qanmacheeuec, na'aictaxa da laloxoqui da qoỹaañi, huo'otaq da qanqat ana ala ca nañiguishec. 22Qataq qauo'oche ca qayo'oxonnataxanaxaqui da ivitalo caua na'axa'te maye huetoiguilo da qanqat ca la'auaxanec ala ca nañiguishec, qataq ca pa'atec da qanqat ye vi'i. 23Qaq ye 'oonolec vi'i nache ivi' tres da Aỹem naua'a qome da aỹem ỹo'oxoren 'enauac na ỹalleppi. Qaq 'era da ỹa'aqtac, Aỹem Nataxala' maye Natamnaxala' na Israel le'ecpi. 24Nache, Aỹem qome samaqauec 'enauac na ỹotta'a't shiỹaxauapi naua 'aleu', yaqto' qalochiguiñi ca qana'alhuaipi, nache qaica ca anac da namataxaalec, da ivita da qauanaqui da Aỹem qavio'oxoyiñi. Qaq ye 'oonolec vi'i tres qome da Aỹem qauanaiua'a. 25Qataq ca nachetaqtaxanaxat shiguiỹac, saishet qome da lỹateuo ca ltago'q da qoỹaneuo qataq aca nauole maye huo'o na lalegue maye ỹasheeraxachigui. Qataq que'eca shiguiỹac maye qoỹaneuo, huaigui qanqa'en ca na'a'q maye laloxoqui co'ollaxa so Lapascua, da qanallec ana nauole maye qaica ca lalegue da ỹasheeraxachigui, qataq saishet qome da huo'o ca no'onañi, da yaqto' iviraigui ca lỹa na'a'q. 26Qataq qaroiua'a qome aca atamnaxaqui maye lalamaqte Ñim Nataxala' aca ỹataqta no'on la'auaxana ala ca qorañiguishequi maye chegaqalec ca qana'alhuaipi. Nataqa'en da qaỹa'añeeuaq ca quetaq llalec, nache saishet da qauoshaxañiỹa ca maiche lche' aca late'e.»
So Moisés ỹiyiñi so nqataxacpi
27Nache Ñim Nataxala' 'enapega so Moisés, 'eeta':
«'Iyiñi qome ne'ena na'aqtacpi, cha'aye namaye nachena na na'attalec da ñaỹamaxataxac maye 'am so'otec, qataq na Israel le'ecpi».
28Nache so Moisés no'onaisop co'ollaxa Ñim Nataxala', ivittrec soua cuarenta na'axa'te, qataq cuarenta pe', qataq saishet da deque'e, qataq saishet da nỹom. Huaña, nache ỹereleguete soua dos coma'ye soua diez nqataxaco. 29Qaq co'ollaq ime, nache so Moisés huenoteeguesop aso qasoxonaxa Sinaí, qaq nachetrañi soua dos coma'ye maye nanettaleguete soua diez nqataxaco. Qataq somaye co'ollaq huenotec, nache saishet da nanoma da 'ettaigui da lashiguiỹaxac souaxat da detaqtague' Ñim Nataxala'. 30Nache so Aarón qataq 'enauac so Israel le'ecpi co'ollaq ila'a so Moisés da 'ettaigui da lashiguiỹaxac, nache huo'o da lcolanaxa. Nache saishet da qanquigueua'a somaye. 31Qalaxaye so Moisés iỹaxana somaye, nache so Aarón qataq 'enauac som lataxala'pi so ỹalecta'a'tpi, qataq ỹe'eguelaxa so hueta'a somaye. Nache so Moisés detaxaỹapegue' co'ollaxa somayepi. 32Ime, nache maiche anac 'enauac so laỹe Israel le'ecpi da naua'a so Moisés, nache somaye da'aqtaxanem somayepi 'enauac na lqataxacpi Ñim Nataxala' maye ỹanem somaye, co'ollaq hualec aso qasoxonaxa Sinaí. 33Qaq co'ollaq ime da detaqtague' somayepi, nache ỹauo'o so lapoxot na lashec.
34Nache so Moisés naxa da huenoxoneua'a so npe'l maye huaña naxa da detaxaỹapegue' Ñim Nataxala', nache nqat se'eso lapoxot na lashec choche ivitta'a da nnoxonec. Qaq da nnoxonec somaye, nache da'aqtaxanem so Israel le'ecpi na lqataxacpi Ñim Nataxala' maye ỹanem somaye. 35Qaq naxa so Israel le'ecpi da ila'a da 'ettaigui da lashiguiỹaxac so Moisés, nache somaye qataq ỹe'eguelaxalec da ỹapolec na lashec, qaq nda'a't da qaltaq taua'a so npe'l maye huañacnaxa da detaxaỹapegue' Ñim Nataxala', nache nqat somaye.
