Éxodo 37

₁So Besalel ỹo'ot nataqa'en aso arca maye laỹe' soua nqataxaco, ỹauota'a so 'epaq acacia, qaq ivi' un metro y diez centímetros ye lalogaxa, qataq sesenta y cinco centímetros ye lcachiguiñi, qataq sesenta y cinco centímetros ye locta. ₂Ime, nache lapaxalec so lcat oro, na lauel qataq so npa'auec, qataq coleesop naqa'en soua laỹel asomaye so llo'oxoraxat oro. ₃Nataqa'en ỹo'o't soua cuatro la'aitel chegaqaiguilo na lcat oro, nache ỹanagui ñi 'oonolec soua cuatro lapia'ate asomaye. ₄Qataq ỹo'o't soua nchiigui'ishe 'epaxaye acacia da yaqto' lachoxola'ate da qaỹache asomaye, qataq lapaxaleguete so lcat oro, ₅ime, nache ỹa'aroiguilo soua la'aitel maye naua'alo soua laỹel da yaqto' ishet da qaỹache asomaye. ₆Nataqa'en ỹo'ot so lapoxot ndotec oro, qaq ivi' ye un metro y diez centímetros ye lcateueegue, ₇qataq ỹo'o't soua ne'enaqtaqa shiỹaxau' huo'oi naua laua't na'agueta naqa'en soua lsheeneqa so lapoxot. ₈Nache se'eso lapoxot asomaye, ima'agueta naqa'en soua ne'enaqtaqa shiỹaxau', nache so 'oonolec na'aguet so lsheenec qataq so lỹa nache na'aguet so lỹa lsheenec, ₉nache soomaye datata't naqa'en, qalaxaye ỹalletralec so lapoxot aso laỹe' soua nqataxaco, qataq ỹauattraguilo soua laua't, nache 'eco' ỹapotaleguete so lapoxot asomaye.

₁₀Nache so Besalel ỹo'ot nataqa'en so nquia'axala' 'epaq acacia, ye lalogaxa somaye ivi' noventa centímetros, qataq cuarenta y cinco centímetros ye lcategue, qataq sesenta y cinco centímetros ye loquitcheguema. ₁₁Ime, nache lapaxalec so lcat ndotec oro, qataq ỹo'ot so llo'oxoraxat coleesop naqa'en soua loiguiye. ₁₂Nataqa'en ỹo'ot so siete centímetros ye lcateueegue lcat oro, nache lapaxañi da llo'oxoraxat naqa'en soua laỹel somaye, ₁₃Nataqa'en ỹo'o't soua cuatro la'aitel chegaqaigui so lcat oro, nache ỹanaua'alo soua nalotcheguemeque soua cuatro lapia'ate, ₁₄nache se'esoua la'aitel qoỹaateua'alo na pa'achiguiña se'esoua laỹel da yaqto' qaỹa'aroiguilo soua 'epaxaye maye lachoxola'ate somaye. ₁₅Qaq se'esoua lachoxola'ate 'epaxaye maye chegaqaiguilo na acacia, soomaye qalapaxaleguete so lcat oro. ₁₆Nataqa'en ỹauota'a so lcat oro 'enauac som huetalec somaye, nquia'axaquipi, nemaxanaxatpi, nemaxanaqtepi, qataq aso ỹomaxaquipi maye laỹe' nam qaicoraxana da qaicorelec ca nachetaqtaxanaxat.

₁₇Ime, nache so Besalel ỹo'ot nataqa'en aso lashe soua ncoỹaraxanaxaqui' chegaqaigui naqa'en na oro, qalaxaye ỹauota'a aso ntoqnaxanaqte da ỹo'ot. Qaq aso lashe, qataq soua lhuaxaye maye netagui so lsheenec ana 'eeta'am ana lauoxo ana almendro, asomaye ima'a't, 'oonole aso lashe, ₁₈nache naua'alo naqa'en soua laỹel soua seis lhua'q, tres soua neraua'alo so 'oonolec laỹe, qataq tres soua nera'ague so lỹa laỹe. ₁₉Qaq añi 'oonole soua seis lcoue, nache netaguilo soua tres 'eeta'am ana ỹomaxaquipi maye 'eeta'am ana lauoxo ana nañiguishe almendro. ₂₀Qaq asa'aso ncoỹaraxanaxaqui, nache netaguilo soua cuatro ỹomaxaqui', 'eeta'ama ana lauoxo ana nañiguishe almendro. ₂₁Nache ñi 'oonolec soua tres lhua'q, nache netaguilo na pa'aguiñi ñi 'oonolec soua 'eeta'am aca ỹomaxaqui. ₂₂Qaq se'esoua 'eeta'ama ana lauoxo, qataq soua lhua'q, nache ima'aguet aso ncoỹaraxanaxaqui maye chegaqaigui na lcat oro. ₂₃Nataqa'en ỹo'o't soua siete ncoỹaraxanaxaqui' ndoxottec na oro, qataq so lchegaxat na hualoq laỹe ncoỹaraxanaxat, qataq so laỹe' na alo. ₂₄Qaq co'ollaq ỹo'ot aso ncoỹaraxanaxaqui qataq so laỹepi logoxoshetpi, nache ivi' so treinta y tres kilos so nda'a't oro so taigui asomaye.

₂₅So Besalel nataqa'en ỹo'ot aso lca'atoxolate na nchenaxanaxat, ỹauota'a na 'epaq acacia. Nalochiguiñi naqa'en, cuarenta y cinco centímetros ye lalogaxa, qataq cuarenta y cinco centímetros ye lcateueegue, qataq noventa centímetros ye lshequitcheguema, qataq ỹauo'oi soua lcoue so pa'asheguem. ₂₆Ime, nache lapaxalec so pa'auec asomaye so lcat oro, qataq soua lcouel, ime, qataq lapaxaleguete soua loga'te asomaye so lcat oro. ₂₇Nache so pa'aguiñi soua loga'te soua laỹel ỹanaua'alo soua la'aitel lcat oro, dos soua pa'aira'ague da 'oonolec laỹe qataq dos soua pa'aira'ague da lỹa laỹe, da yaqto' tachiviiguilo soua lachoxola'ate asomaye. ₂₈Nataqa'en soua lachoxola'ate asomaye nache ỹauota'a na 'epaq acacia, qataq lapaxaleguete soomaye so lcat oro. ₂₉So Besalel nataqa'en ỹo'ot so aceite maye ncoraxanaxat, qataq so nchenaxanaxat maye ama da laitaỹaxac, 'eeta'am na lo'onatac ca lo'o na coraxat.