1Nache Ñim Nataxala' 'enapega somaye, 'eeta':
«Nagui qaq 'aumeten da sheetec ñi faraón, cha'aye ñimaye saishet qome da choche qoquiỹa'ai naqa'en ne'ena 'alhua, qom huo'otaq sa serolec da lta'araic ỹa'añaxac, qaq ñimaye qome maiche qami' ỹo'oldauec.» 2Nache Ñim Lo'onatac 'Enauacna qaltaq 'enapega so Moisés, 'eeta':
«Aỹem maye Nachaỹem Nataxala'. 3Ñachaxana co'ollaxa so Abraham, Isaac qataq so Jacob, qaq da ỹe'enaxat 'eeta': Atamnaxala' maye Qaica ca Ỹaqalanapec. Qalaxaye saishet da saỹaanaxanaxanec co'ollaxa soomaye da ỹataqta ỹe'enaxat maye Nataxala'. 4Nataqa'en ñaỹamaxateto co'ollaxa soomaye da sanema ye 'alhua Canaán yem 'alhua maye huo'o so na'a'q da netalec somayepi, 'eeta'am ca shiỹaxaua ỹaqa'a ca chegoqta'ague. 5Qaq ỹoqo'oye nagui aỹem saỹaten da na Israel le'ecpi, ỹataqta huo'o da nque'eenaxac souaxat da na Egipto le'ecpi ỹamaxalec na qapa'atta lo'onatac. Qaq ỹoqo'oye aỹem tachigui ye iuel de'era ñaỹamaxataxac. 6Qaq ỹoqo'oye 'am qojec qome, nache qonapega na Israel le'ecpi, da Aỹem maye Aỹem Nataxala' qami' ñeqateeguesopa qome da qanlataguiiqui qataq da qapa'atta qaro'onataxanaxaqui maye qami' ỹacheleguete na Egipto le'ecpi. Aỹem sachaxan qome da ỹa'añaxac da qami' ñeca'alaxatrec cha'aye serolec ñimaye da lta'araic iuaxanaxanaxac. 7Qataq saconeua'a da qoñiita da yaqto' sauo'oi qami' ỹalamaqa'ate, qaq Aỹem Nachaỹem Qanatamnaxala'ai. Yaqto' qami' qauaỹaañita da Nachaỹem Nataxala', qataq Nachaỹem Qanatamnaxala'ai maye qami' ñeca'alaxateeguesopa da qapa'atta qaro'onataxanaxaqui maye qami' ỹacheleguete na Egipto le'ecpi. 8Nache qami' sauegalo qome ye 'alhua maye sachaxanapeguem co'olloxocheye so Abraham, Isaac qataq so Jacob. Qaq yemaye nagui qami' sanema da ỹataqta qaralamaxache qarmaye. Aỹem ỹa'aqtac maye Nachaỹem Nataxala'.»
9Nache so Moisés ỹa'axatem de'era so Israel le'ecpi. Qalaxaye somayepi saishet co'ollaxa da ỹoqocha'a, cha'aye mashe saqca ca la'añaxac souaxat da qapa'atta nlataguec. 10Nache Ñim Nataxala' 'enapega so Moisés, 'eeta':
11«'Aue, qojec, nache qonapega ñi faraón da ỹasheeta da ca'ai qome ne'ena 'alhua na Israel le'ecpi.»
12Qalaxaye so Moisés 'enapego' Ñim Nataxala', 'eeta':
«Na Israel le'ecpi mashe saishet da aỹem ỹoqocha'a, qaq ¿hua'ago' ca 'eetec da aỹem ỹoqocha'a ñi faraón? Ye aỹem na'aprapeguec naua ỹa'aqtaqa».
13Nache Ñim Nataxala' ỹamaq so Moisés qataq so Aarón, da yaqto' 'enapega so Israel le'ecpi qataq so faraón, da soomaye ỹataqta qaỹamaxaleguete da nqatreeguesop ye Egipto so Israel le'ecpi.
So le'enaxatpi so hua'au lta'alpi soua Aarón qataq Moisés
14Qaq 'eso so lataxala'pi co'ollaxa so llalaqpi so hua'au lta'alpi so Israel le'ecpi.
Qaq 'enaua naua le'enaqa'ate soua llalqa so Rubén som la'auaxanec llalec so Israel: Hanoc, Falú, Jesrón qataq Carmi, qaq 'esoua soua lalamaqa'ate llalqa so Rubén.
15Qaq soua llalqa so Simeón: Jemuel, Jamín, Óhad, Jaquín, Sóhar qataq Saúl som llalec aso Canaán lashe. Qaq 'esoua soua lalamaqa'ate llalqa so Simeón.
16So Leví ivi' ciento treinta y siete vi'iye da nachaalataxac. Qaq 'enaua naua le'enaqa'ate soua llalqa, hua'auchiguiñi so ỹe llalec: Guersón, Quehat, qataq Merari. 17Qaq soua llalqa so Guersón, hua'auchiguiñi so ỹe llalec: Libni qataq so Simeí. 18Qaq so Quehat ivi' soua ciento treinta y tres vi'iye da nachaalataxac, qaq soua llalqa: Amirán, Isar, Hebrón qataq so Uziel. 19Qaq soua llalqa so Merari: Mahli qataq so Musi. Qaq 'enaua naua chegoxogueta so Leví, hua'auchiguiñi so la'auaxanec llalec somaye.
20Qaq so Amirán huaroneguet co'ollaxa aso lasoro Jocabed. Qaq asomaye nachaso aso late'e so Aarón qataq so Moisés. So Amirán ivi' soua ciento treinta vi'iye da nachaalataxac.
21Qaq soua llalqa so Isar: Coré, Nefeg qataq so Zicri.
22Qaq soua llalqa so Uziel: Misael, Elzafán qataq so Sitri.
23Qaq so Aarón nache huaroneguet aso Eliseba, asom llale so Aminadab, qataq lqaỹa so Nasón, qaq asomaye nachaso aso late'e so Nadab, Abiú, Eleazar qataq so Itamar.
24Qaq soua llalqa so Coré: Asir, Elcana qataq so Abiasaf. Qaq 'esoua soua chegoxogueta so Coré.
25Qaq so Eleazar, som llalec so Aarón, somaye huaroneguet aso llale so Futiel, qaq asomaye nachaso aso late'e so Finés. Qaq 'eso co'ollaxa so lataxala'pi som llalaqpi so Leví, ñi 'oonolec ỹataqtac nam llalaqpi.
26Qaq so Moisés qataq so Aarón, nachesoua soua 'enapegalo co'ollaxa Ñim Nataxala', da nqatreeguesop so Israel le'ecpi ye Egipto, qataq naloqchiichiyiñi, 'eeta'am naqa'en ca alleppi. 27Qalaxaye nachesoua soua Moisés qataq Aarón da detaxairapegue' so faraón, da yaqto' nqateeguesopa ye 'alhua Egipto so Israel le'ecpi.
28Se'eso na'a'q co'ollaq Ñim Nataxala' detaxaỹapegue' so Moisés huaña ye Egipto, 29nache 'enapega, 'eeta':
«Aỹem maye Nachaỹem Nataxala'. 'Aua'axatem qome ñi faraón, ñim nta'a maye ilotague' na netaña na Egipto, 'enauac na 'am sa'axatem».
30Qalaxaye so Moisés 'enapeco':
«'Am Nataxala', aỹem ỹataqta na'aptrapegue'c naxa naua ỹa'aqtaqa da setaqa, qaq ỹoqo'oye ¿hua'ago' ca 'eetec da aỹem ỹoqocha'a ñi faraón?»
