Da nhuaxanaguec ye Jerusalén
1Da la'añaxac Ñim Lo'onatac 'Enauacna aỹem ỹanaxanaxaasheguem, nache aỹem ỹauega ñi ñegueuo añi atamnaxaqui maye lalamaqte Ñim Nataxala' ñim pa'aỹa'ague da nala' lliguisheguem. Qaq ñi lasom nache hueta'a so veinticinco ỹalleppi. Qaq somayepi, nache ỹalectaigui so Jazanías, som llalec so Azur, qataq so Pelatías, som llalec so Benaías, maye lataxala'ate co'ollaxa so nhuo' le'ecpi. 2Nache Ñim Nataxala', aỹem 'enapega 'eeta': «'Enapi nam ỹoxottañi nam qauem maye ỹo'ottacpi, qataq ỹaatac na qauem lqataxacpi ne'ena huaqta'a't nỹecpi. 3Qaq namayepi, 'enapec: Ñaq saxanaxa da ivita da ño'oxonaxasheguem na nỹecpi, qaq na huaqta'a't nỹecpi qalaq 'eeta'am aca taxaqui qaq qomi' qalaq shenaqta'am ca lapat. 4Qaq ỹoqo'oye 'auachegoxotchigui qome da ỹe'enaxat da 'aua'aqtaxanem namayepi.»
5Nache so Saqcha'a La'añaxac Ñim Nataxala' aỹem nvita, ime nache aỹem ỹamaxalec da, sheeta': «'Era da la'aqtac Ñim Nataxala': ‹Qaq 'era da qarhuennataqai qami' Israel le'ecpi. Qaq Aỹem saỹaten da qarhuennataqai. 6Qami' ỹataqta qalota co'ollaxa so qaralaataqui maye huaña ne'ena huaqta'a't nỹecpi, qataq nlaqteguelo qanqa'eñi naua nqa'aico so leuaxaicpi. 7Qaq ỹoqo'oye, Aỹem Nataxala', ỹoqta 'eesa de'era qami' sa'axatema: Da na Jerusalén 'eeta'am qome aca taxaqui, qalaxaye ca lapat saishet da nache qami', maye nachenata nam lo'ocỹaxac som qaralaataqui, qami' qalaxaye qami' ñeqateeguesopa qome aca taxaqui. 8¿Peta'a qaye'eetega ca alaataxac? Qalaxaye Aỹem qami' nagueleguete ñaqa'en qome ca alaataxac. Qaq 'era da ỹa'aqtac Aỹem Nataxala'. 9Aỹem sacoolec qome da so'ot ca qanhuaxanaguiqui: Qami' ñeqateeguesopa qome ne'ena 'alhua, nache qami' sanegueta ca shiỹaxauapi maye chegaqauec. 10Nache qaullemi qome ca ỹeelonec. Aỹem qami' ñemi't qom huañalo naua loga'te na na'alhua na Israel, qaq huaña qome nache qauaỹachiñi da nachaỹem, maye Aỹem Nataxala'. 11Qaq na huaqta'a't nỹecpi, qalaq saishet qome da nachena na 'eeta'am aca taxaqui, qataq qami' saishet da qoñeeta'am ca lapat. Aỹem qami' ñemi't qom huañalo naua loga'te na na'alhua na Israel, 12qaq huaña nache qauaỹachiñi da nachaỹem maye Aỹem Nataxala'. Qami' saishet da qoquiigue co'ollaxa na ỹamaxasoxonaxacpi, qataq saishet da qauo'oche' naua iqataxaco, maye nacherata da qoquiiguelo da qauo'oche' naua ỹo'otta'ape nam ỹotta'a't shiỹaxauapi maye qarhuoreuaipi.›»
13Nache co'ollaq ñaq sa'axattac da la'aqtac Ñim Nataxala', nache huañi so Pelatías som llalec so Benaías nache ileu. Qaq huaña nache aỹem sa'alyiñi naua illecte, nache ñanaqñi seviraxata'aguet na ỹatap na 'alhua, nache ña'axannec so ỹa'alaxac, sheeta': «¡Aicoue 'Am Nataxala'! ¿Peta'a 'anmatchiguiñi qome nam saq 'amaqtaq maye no'onañi na Israel?»
Qaỹachaxanapec da dalaxaic aỹamaxataxac
14Ñim Nataxala' aỹem 'enapega, 'eeta': 15«Nam shiỹaxauapi maye hueta'a na Jerusalén, da detaqtega naxa na Israel le'ecpi maye 'arhuo' le'ecpi nache, 'eeta': ¡Namayepi qaỹoqta Ñim Nataxala'! Qaq qomi', qalaxaye qomi' ỹanema ne'ena 'alhua da yaqto' qaralamaxat. 16Qaq ỹoqo'oye qonapega qome, qoneta': ‹'Era da la'aqtac Ñim Nataxala': Aỹem ñeqateeguesop co'ollaxa ye na'alhua namayepi, nache selagaxat da yaqto' ỹaleeguet nam ỹotta'a't shiỹaxauapi maye hueta'a na ỹaqa'a 'alhuapi, qalaxaye damaye saqaỹauec ñaqa'en. Qalaxaye nagui nachaỹem da sheeta'am aca natamnaxaqui namayepi da hueta'a nam 'alhuapi maye taỹa co'ollaxa.› 17Qaq nataqa'en qonapega qome, qoneta': 'Era da la'aqtac Ñim Nataxala', 'eeta': Aỹem ñe'eguelaxat qome namayepi sachegoxotchiguiña nam 'alhuapi, qataq nam ỹotta'a't shiỹaxauapi maye so'ot co'ollaxa da ỹalecta'aguet, nache llaỹona't qome nache sanem ye 'alhua ye Israel. 18Qaq namayepi ỹe'eguelaxa qome ye maiche na'alhua, qaq huaña yemaye nache namayepi ỹaxaañi qome nam qauem qataq qaiqaiga maye ỹo'ottacpi. 19Aỹem ñeqat qome añi lquiyaqte maye qaramchigui 'eeta'am ca coma', nache sanem aca dalaxai lquiyaqte maye huesota. 20Qaq huaña qome nache ỹataqta quetegue da lataxac naua iqataxaco, qataq naua ỹamaxasoxonaxaco, qataq ỹataqta ỹo'o't. Qaq namayepi ỹataqta ỹalamaxatpi qome, qaq Aỹem nachaỹem Natamnaxala'. 21Qalaxaye nam saishet da ỹaxaañi da ỹo'oxoreetac na nqolacpi, qataq da ỹo'ottac nam qaiqaigapi, namayepi sauo'o qome ca nhuaxanaguec dam qauem lataxac. Qaq 'era da ỹa'aqtac Aỹem Nataxala'.»
Da llo'oxoyec Ñim Nataxala' ca'ai ye Jerusalén
22Qaq soua huo'oi naua laua't naỹoyeshegue'm, qaq soua saxannal nataqa'en je'c. Qaq huaña nache da llo'oxoyec Ñim Natamnaxala' na Israel le'ecpi maye huetalec na pa'asheguem soomaye 23ñesheguem, nache ca'ai ye huaqta'a't nỹecpi, nache taỹa da nalec añi qasoxonaxa maye pa'aigue da nala' lliguisheguem yem huaqta'a't nỹecpi. 24Qaq ime, nache da la'añaxac Ñim Nataxala' aỹem nachalataxaañi, nache aỹem ỹe'eguelaxata ye Babilonia maye hueta'a som laỹepi ncoñeteguishecpi. Qaq de'era nache huaigui so ỹauanaqchec maye aỹem ỹachaxana som saqcha'a la'añaxac Ñim Lo'onatac 'Enauacna. Qaq co'ollaq ime se'eso ỹauanaqchec 25nache aỹem sa'aqtaxanem so ncoñeteguishecpi 'enauac som aỹem ỹachaxana co'ollaxa Ñim Nataxala'.
