So Ezequiel ỹa'axata'a da qaỹauec qome so nhuo' le'ecpi
1Ñim Nataxala' aỹem detaxaỹot nache, 'eeta': 2«'Am shiỹaxaua, 'am qonetangui na nhuo' le'ecpi maye ỹataqta qauemaicpi. Huo'oi naua la'ai'te, qalaxaye sanauaañi, qataq huo'oi naua ltela lauaco qalaxaye sa hua'aqa, cha'aye ne'ena nhuo' le'ecpi ỹataqta qauemaicpi. 3Qaq ỹoqo'oye 'auqataxanai' qome cam ỹataqta 'auen da yaqto' qoca'ai ne'ena 'alhua, qaq laiñi qome ca na'a'q, qataq 'am ỹauaategue qome 'enauac nam shiỹaxauapi da qoca'ai na 'arma', da 'anqo'ona ca lỹa nma', saiuena'a da ne'ena nhuo' le'ecpi ỹaỹaten da qauemaicpi 4Qaq na'a'q laiñi qome, qataq 'am ỹauaachigui 'anqa'en 'enauac na shiỹaxauapi da 'anqatec na 'ogoxoshetpi da yaqto' qoca'ai ne'ena 'alhua, qaq qom avit nache nataqa'en 'am ỹauaachigui 'anqa'en 'enauac na shiỹaxauapi, da 'eeta'am da 'am qaỹauec da 'am qaicoñe'. 5Qaq ime qome, nache 'auo'ot ca lauac so mpaqtaxanaxat qaỹauaachigui 'anqa'en 'enauac na shiỹaxauapi, nache 'acheviigui qome camaye 'arỹatec na 'ogoxoshetpi. 6Qaq qom mashe napalñi, nache 'auasaxalec na 'arallac cam 'ogoxoshetpi nache 'am qaỹauaategue 'anqa'en da 'arỹatec camayepi. Qaq 'auapotagui qome na 'arashec da yaqto' saishet da 'aulolec ne'ena 'alhua. Aỹem sauotaique da 'am la'anaxat da yaqto' 'aucoyeguen ne'ena nhuo' Israel le'ecpi.»
7Nache aỹem saỹamaxaañi so ỹogoxoshetpi nache so'ot dam aỹem ỹamaxalec Ñim Nataxala', qaq so laiñi so na'a'q nache senoxonec iỹatec som ỹogoxoshetpi, sheeta'am cam qaỹauega ca ncoñetaqa'. Qaq so avit nache so'ot so lauac so mpaqtaxanaxat, nache so mashe napalñi, nache ỹauaachigui ñaqa'en 'enauac so shiỹaxauapi da sasaxalec na ỹallac so ỹogoxoshetpi nache ashec. 8Qaq so nte'eta so lỹa na'a'q, nache Ñim Nataxala' aỹem detaxaỹot, 'eeta': 9«Yo'oqta da na Israel le'ecpi, nam nhuo' maye qauemaicpi 'am inat qome, 'eeta', ¿Negue't dam 'auo'ottac? 10Qalaxaye 'am 'auasateguet qome qoneta', de'era so'ottac damaye na'aqtaxanaxac maye talec ñi nta'a ye Jerusalén, qataq 'enauac na Israel le'ecpi maye hueta'a yemaye. 11'Am 'aua'aqtaxanem qome da 'am la'anaxat da yaqto' 'aucoyeguen namayepi, qataq da namayepi iuen da ỹo'ot dam 'auo'ottac, cha'aye namayepi qaỹauega qome ca ỹaqa'a 'alhua. 12Qaq ñim lataxala' namayepi qalaq ỹasaxalec qome na lallac ca logoxoshetpi, qaq qom napalchiguiñi nache jec tachiviigui cam lauac ca mpaqtaxanaxat maye itagoxotec qome. Qaq qom jec nache ỹapotagui na lashec da yaqto' saishet da ilolec ne'ena 'alhua. 13Aỹem sasaxalec qome ca ỹaleguec nache ỹoxonec qome. Qaq ime nache sauega qome ye Babilonia maye na'alhua na caldeopi, yem 'alhua maye saishet qome da ila'a cha'aye qaicaua naua la'ai'te, qataq nache huaña qome yemaye da ileu. 14Qataq selagaxaalec qome ana 'alhua nam nauaatalec naxa ñimaye da yaqto' iueelec, qaq nache 'eeta'am nataqa'en nam laỹepi nalleppi, qataq ñasoqta'a qome ca ỹainec da secanapec namayepi. 15Qaq qom ime da selagaxat da taỹa ñaqa'en nam ỹaqa'a 'alhuapi, qataq nam ỹotta'a't shiỹaxauapi, nache huaña qome da ỹaỹaten da nachaỹem maye Aỹem Nataxala'. 16Qalaxaye so'ot qome da huo'o ca saq 'amaqtaq da nca'aleeguesop ca alaataxac, ca nqouaxa qataq ca nalolaxa, yaqto' camayepi ỹa'axatem qome cam ỹotta'a't shiỹaxauapi maye ỹalecta'aguet qome, 'enauac nam qaiqaiga maye ỹo'ottacpi co'ollaxa, qataq huaña nache ỹaỹaten da nachaỹem maye Aỹem Nataxala'.»
Qaltaq qaỹa'axata'a ca nhuaxanaxanaxac na Israel le'ecpi
17Ñim Nataxala', qaltaq ỹe'eguelaxalec da aỹem detaxaỹot nache, 'eeta': 18«'Am shiỹaxaua, 'aviloxol qom 'auque'e, qataq 'auachaxan da 'araquicoxo da 'anỹom. 19Nache qonapega na shiỹaxauapi maye lma' ne'ena 'alhua qataq na Jerusalén qataq 'enauac na Israel le'ecpi, qoneta': ‹'Era da la'aqtac Ñim Nataxala': Da qollequiitac qome ca qo'oqoi qalaq qami' nlaqchiguilo da qaraquicoqoi, qataq da qanỹomiigui ca qaraquipi qalaq qami' nlaqchiguilo qome da qarcolanqai, cha'aye ne'ena 'alhua dolagui qome qataq toolec, souaxat dam qauem maye ỹo'ottac nam netalec namaye. 20'Enauac nam huaqta'a't nỹecpi maye ỹotta'a't naua nañalo maye qanayeetaiguipi, qailaxachigui qome, qaq ne'ena 'alhua qalaq ỹe'eguelaxa qome da toolec. Qaq huaña nache qami' qauaỹachiñi da nachaỹem maye Aỹem Nataxala'.›»
21Ñim Nataxala' aỹem detaxaỹot nache, 'eeta': 22«¿Negue't cam naigui naxa da la'aqtac na Israel le'ecpi maye, 'eeta': ‹mashe qaỹoqteguelo soua inoxoorec na'axa'te, qaq saxanaxa da ipacchiguilo naua l-loxoco som na'aqtaxanaxanec›? 23Qaq ỹoqo'oye qonapega qome, qoneta': ‹'Era da la'aqtac Ñim Nataxala': Aỹem so'ot qome da saishet da qaltaq qaỹe'eguelaxalec de'era na'aqtac ne'ena Israel.› Qataq nataqa'en 'aua'aqtaxanem qome da mashe nayeetai' ca na'a'q maye huaigui da ipacchigui qome 'enauac nam ỹa'axatta'a co'ollaxa so nloxocpi. 24Qataq saishet qome da ỹe'eguelaxalec da huetaigui na Israel le'ecpi ca nloxocpi maye saq'en qataq ca na'aqtaxanaxac maye choche natenataxanaxac, 25cha'aye Aỹem Nataxala' setaqa, qaq cam sa'axat qalaq saqaỹaloq da ipacchigui. Qaq qami' maye qami' qauemaicpi qalaq qauauañiichigui qome camaye, Aỹem Nataxala' setaqa qataq so'ot da ipacchigui cam sa'axat. Qaq 'era da ỹa'aqtac Aỹem Nataxala'» 26Ñim Nataxala' aỹem detaxaỹot nache, 'eeta': 27«Na Israel le'ecpi, ỹa'axatteguec da 'eetega na 'al-loxocpi maye 'aua'axattac co'ollaxa, namayepi qaỹoqta ca laloqo' da ipacchigui. 28Qaq ỹoqo'oye qonapega qome namayepi, qoneta': ‹'Era da la'aqtac Ñim Nataxala': Naua ỹa'aqtaqa saishet da qaỹoqta ca laloqo' da ipacchiguilo, dam sa'axat qalaq ipacchigui qome. Qaq 'era da ỹa'aqtac Aỹem Nataxala'.›»
