Ñim Nataxala' ỹauo'o qome da nhuaxanaguec nam saq'en na'aqtaxanaxanecpi
1Ñim Nataxala' aỹem 'enapega nache, 'eeta': 2'Aua'aqtaxan qome 'auachegoxotchigui da ỹe'enaxat da 'auataỹa'aguet na na'aqtaxanaxanecpi na Israel, nam na'aqtaxanaxanecpi maye maiche nallegoxoola't da da'aqtaxan da huo'o ye ỹa'axat, nache qonapega, qoneta': Ñaq qana'axaỹaxañiỹa da la'aqtac Ñim Nataxala': 3¡Choxoraxaso' nam na'aqtaxanaxanecpi maye qaica ca ỹaỹaanapec, qataq quetague' na maiche lalamaxat lauanaqchec, nache na l-loxocpi saishet da ỹoqta 'eesa! 4'Am Israel, na 'ara'aqtaxanaxanecpi qalaq 'eeta'am aca huaxaỹaxa maye netauga ca nlachiguiñi. 5Qataq namayepi qaica cam ỹo'ot cam ishet da mpaxaalec na Israel, da yaqto' namayepi ishet da dataỹa'aguet ca alaataxac, qom nvi' cam na'a'q maye lalamaxat Ñim Nataxala'. 6Na l-loxocpi qalaq saq'en, qataq nam la'aqtaxanaxacpi qalaq chochaq ashepegaxanaxacpi. Namayepi 'eetega ỹa'aqtaxanaxanecpi naxa, qalaxaye Aỹem saishet da samaq co'ollaxa namayepi. ¡Qaq ñaqaiyeta namayepi iuatta'a naxa da ipacchigui nam la'aqtaxanaxacpi! 7¡Qami' naua qal-loxocolli' qalaq saq'e'n! ¡Naua qara'aqtaxanaxacolli' qalaq choche ashepegaxanaxaco! Qoñeetega qami' ỹa'aqtaxanaxanaqa, qalaxaye Aỹem saishet da qami' setaxaỹoto co'ollaxa. 8Qaq ỹoqo'oye Aỹem, maye Aỹem Nataxala', shenapec: Qaq cha'aye qami' ye qaua'axacheeta'ape naua saq'en, qataq naua qarauanaqchecolli' choche ashepegaxanaxaco, nache Aỹem qami' sataỹa'agueta. Qaq 'era da ỹa'aqtac Aỹem Nataxala'. 9Aỹem ñauaxaỹaxaasheguem qome na ihuaq da sauo'o ca nhuaxanaguec nam na'aqtaxanaxanecpi maye saq'e'n naua l-loxoco, qataq naua la'aqtaxanaxaco choche ashepegaxanaxaco. Qaq namayepi qome saishet da ỹalegueua'a na laponaxacpi na ỹalamaxat nhuo' Israel le'ecpi, qataq nam le'enaxatpi saishet qome da nanettaua'a aca le'enaxat lmalate na Israel le'ecpi, qataq saishet da inoxoneua'a ye na'alhua na Israel le'ecpi. Qaq huaña qome nache qami' qauaỹachiñi da nachaỹem maye Aỹem Nataxala'.
10Aja', namayepi ỹatenachet co'ollaxa na ỹalamaxat nhuo' le'ecpi, da 'eetega qaica ca machaqca da llecỹaxac, qamaq saishet da 'eetec de'era. Namayepi 'eeta'am ca saỹaỹamaxatapec ca lque ca nỹec da no'oxoosheguem, ime nache ỹa'amen ỹauota'a na na'amnaxanaxat lapagaxaic. 11Qaq ỹoqo'oye qonapega qome nam da'amnaxaatega na na'amnaxanaxat lapagaxaic da ỹa'ameetac na lque na nỹec, da namaye hua'axauec qome. Cha'aye anac qome ca lta'araic auot, qataq aca lache maye 'eeta'am na coma', qataq anac qome ca la'ana't la'at, 12nache que'eca lque hua'axauec qome. Qaq huaña nache namayepi qainat qome qoỹeeta': ¿Ca 'eetec som na'amnaxanaxat lapagaxaic maye qaua'amñiiuo co'ollaxa? 13Qaq ỹoqo'oye Aỹem Nataxala' shenapec: Qom salemata nache so'ot da anac ca la'ana't la'at, qataq qom salemata nache so'ot da anac ca lta'araic auot, qataq naañi ñaqa'en aca lache maye 'eeta'am na coma', yaqto' ilaxachigui 'enauac camaye. 14Qataq seqalagoxotec qome ca lque maye qaua'amiñi qauauoita'a lapagaxaic, huetaiya' ñaqa'en qataq sauaalec ca lo'oxonaxala'pi. Aja', que'eca lque hua'axauec qome, qaq qami' nache qoquiỹangui qome da qaullivi. Qaq huaña qome nache qauaỹachiñi da nachaỹem maye Aỹem Nataxala'. 15Sematalec qome 'enauac da ỹayeloxo que'eca lque, qataq 'enauac cam ỹa'amen ỹauota'a lapagaxaic, nache na shiỹaxauapi 'enapec qome: «Ỹataqta qaica ca no'onañi som lque, qataq som shiỹaxauapi maye ỹa'amen co'ollaxa, 16som na'aqtaxanaxanecpi ne'ena Israel maye saq'e'n naua l-loxoco, qataq ỹa'axatta'a co'ollaxa da no'on da llecỹaxac na Jerusalén, qamaq saishet da 'en.» Qaq 'era da ỹa'aqtac Aỹem Nataxala'.
Ñim Nataxala' dataỹa'aguet aso na'aqtaxanaxanapi
17Qaq nagui 'am shiỹaxaua, 'auataỹa'aguet qome na 'alpi nam 'aralamaxat nhuo' le'ecpi, maye maiche lhuennataxaco naua ỹa'axatta'ape, 18nache qonapega, qoneta': Da la'aqtac Ñim Nataxala', 'eeta': ¡Choxorailole qami' maye qauo'ocheetac na hualoxolaỹi da yaqto' 'enauac na shiỹaxauapi da ỹauota'a lhuaxashec, qataq qauo'oche na hualoxolaỹi da yaqto' ipegueelec na lqaic na shiỹaxauapi da yaqto' qo'oxoñiqui! ¿Qaupichiitega peta'a da qo'oxoñiqui da nachaalataxac na ỹalamaxat nhuo' le'ecpi, nache qanca'alaxacheeuec da maiche qanachaalataxaqui? 19Qami', Aỹem qaunogoqchichi, souaxat na saq 'amaqtaq cebada, qataq nam saq 'amaqtaq nauole laỹe, qataq qanca'alaxacheetauec nam shiỹaxauapi maye saishet taxa da nca'altauec, qataq qaualauache na shiỹaxauapi maye saishet taxa da ileu. Qaq 'era da qoñeetec da qauatenachichi na ỹalamaxat nhuo' le'ecpi, maye ỹalaxaguet nam natenataxanaxacpi. 20Qaq ỹoqo'oye Aỹem Nataxala', sheeta': Aỹem sasaỹamaxaren ne'ena hualoxolaỹipi maye qauo'ocheetac, nam chegoqchigui da qo'oxoñiqui na shiỹaxauapi, 'eeta'am qanqa'eñi ca qoỹo. Qalaxaye Aỹem sesoueeguesop qome da qara'añaxaqui ne'ena shiỹaxauapi, nache sa'aqta'a qome da huaỹo 'eeta'am ca qoỹo, 21qataq sesoueeguesop ne'ena ỹalamaxat nhuo' le'ecpi da qara'añaxaqui qataq ñeqat na lapoxotpi na lqaic maye qaỹa'añiỹaigui, nache saishet da qaltaq ỹe'eguelaxalec da qo'oxoñiqui. Qaq huaña qome nache qauaỹachiñi da nachaỹem maye Aỹem Nataxala'. 22Qami' qauroilec da qaratenataxanaxaqui, da qaucolanaqchichi na no'on da lataxac, dam saishet da sauotaique da so'ot co'ollaxa, qataq qaua'añaqchichi nam qauemaicpi da queto'ot dam qauem lataxac da yaqto' saishet da sanem da lca'alaxa. 23Qaq ỹoqo'oye qami', saishet qome da ỹe'eguelaxa da huo'o na saq 'en qarauanaqchiqui, qataq saishet da huo'o ca napaxagueetega da ilaviigui ca lỹa. Aỹem ñeca'alaxateeguesop qome da qara'añaxaqui nam ỹalamaxat nhuo' le'ecpi, qaq huaña nache qauaỹachiñi da nachaỹem maye Aỹem Nataxala'.
