Qaỹataỹa'aguet na natameetacot na nqolacpi
1Qaq huo'o so nqueroxonecpi maye nataxala'pi ye Israel, aỹem naỹa da yaqto' nnate' Ñim Nataxala'. 2Qaq huaña nache Ñim Nataxala' aỹem 'enapega, 'eeta': 3«Ne'enaua shiỹaxau', naamaye ỹataqta imauec da nañanoto da natameetracot na nqolacpi, qataq imato'ot da lmeenaxanaxac nam ỹo'ot na lasouaxashetpi. ¿Qaq peta'a sa'aqta'alo naamaye da Aỹem inat? 4Qaq ỹoqo'oye qonapegalo naamaye, qoneta': Da la'aqtac Ñim Nataxala', 'eeta': 'Enauac na Israel le'ecpi maye nañaneguet da natameetacot na nqolacpi, qataq imato'ot da lmeenaxanaxac nam ỹo'ot da lasouaxashet, qaq ime qataq anac da inat na na'aqtaxanaxanec, da maiche Aỹem sanem qome ca la'axaỹaxac, cam ỹo'ot da nque'eenaxac souaxat da qalota na lqolacpi. 5Qalaxaye Aỹem sepoteua'a qome ana lquiyaqtepi 'enauac na Israel le'ecpi maye Aỹem ca'ai co'ollaxa, souaxat na lqolacpi. 6Qaq ỹoqo'oye qonapega qome na Israel le'ecpi, qoneta': ‹Da la'aqtac Ñim Nataxala', 'eeta': Aỹem qañi'iguelaqaỹa qome, qataq qoquiỹa'ai na qarqolaqui qataq qa'axañiiñi da qauo'ocheetac 'enauac nam qaiqaigapi.› 7Qalaxaye da huo'o ca Israel le'ec huo'otaq ca chegaqauec da netaña na Israel da Aỹem ca'ai, da nañaneguet da ỹo'oxoreetac na lqolacpi, qataq imato'ot da lmeenaxanaxac nam ỹo'ot na lasouaxashet, ime nache nqo'ona ca na'aqtaxanaxanec da yaqto' Aỹem inat, nache maiche Aỹem sasateguet qome ca lnataxanaxac camaye: 8Aỹem sataỹa'aguet que'eca ỹale nache sauo'o ca nhuaxanaguec maye naloqnaxanaxat qome, cam ishet da nache 'eetai' da qana'aqtaxaatapigui qataq ñeqateeguesop camaye na ỹalamaxat nhuo' le'ecpi. Qaq huaña nache qami' qauaỹachiñi da nachaỹem maye Aỹem Nataxala'. 9Qaq da huo'o ca na'aqtaxanaxanec maye saq'en ca ỹa'axat, nache camaye maiche Aỹem da satenachet, qaq ñauaxaỹaxaasheguem qome na ihuaq da sauo'o ca nhuaxanaguec camaye, qataq ñeqateeguesop na ỹalamaxat nhuo' Israel le'ecpi. 10Qaq nataqa'en cam ỹale maye inat que'eca na'aqtaxanaxanec, qataq cam na'aqtaxanaxanec, caamaye 'enauaque da sauo'o ca nhuaxanaguec, 11yaqto' ne'ena nhuo' Israel le'ecpi saishet da ỹe'eguelaxalec qaltaq Aỹem ca'ai, qataq saishet queto'ot da ỹo'ottac na lasouaxashetpi. Qaq huaña nache ỹalamaxatpi qome ne'ena nhuo' le'ecpi, qataq Aỹem Natamnaxala'. Qaq 'era da ỹa'aqtac Aỹem Nataxala'.»
Ye Jerusalén qaỹauo'o ca nhuaxanaguec
12Ñim Nataxala' aỹem 'enapega, 'eeta': 13Da huo'o ca 'alhua da Aỹem ỹacho'ot ca lasouaxashet, qataq Aỹem saỹalaxaguet, nache Aỹem ñauaxaỹaxaasheguem qome na ihuaq da sauo'o ca nhuaxanaguec, qataq seuotaxanec 'enauac na hueto'ot nallec, nache ñamaxa ca nqouaxa, nache so'ot qome da ileu na shiỹaxauapi qataq na shiguiỹacpi. 14Qaq que'eca 'alhua, taxa da netraña soua Noé, Daniel qataq so Job, nache se'esoua tres, nachesouate' taxa da nca'alde'c, souaxat da ỹo'ottrac co'ollaxa da nalochiguiñi lataxac. Qaq 'era da ỹa'aqtac Aỹem Nataxala'.
15Qaq da ñamaxa ca shiguiỹacpi maye qauemaicpi ca lỹa 'alhua da yaqto' ỹalauat ca netalecpi camaye, nache ỹe'eguelaxa da toolec naqa'en qataq qaica ca ishet da ỹa'axasoxoolec camaye, souaxat da ñe'etaique na shiguiỹac maye qauemaicpi, 16qaq da netraña taxa que'eca 'alhua se'esoua tres ỹale't, nache saishet taxa da nca'alec 'enauac ca llalaqpi ỹalleppi qataq aca llalpi, qaq nachesouate' taxa soomaye da nca'alde'c, nache que'eca 'alhua ỹe'eguelaxa da toolec. Qaq Aỹem Nataxala', maiche Aỹem da san da ỹa'aqtac. 17Qaq da ñamaxa ca alaataxac que'eca 'alhua, qataq da samaxasoxoolec da qaỹalauat na shiỹaxauapi qataq na shiguiỹacpi, 18nache da hueta'a ctaxa que'eca 'alhua se'esoua tres ỹale't, nache saishet taxa da nca'alec ca llalaqpi ỹalleppi qataq aca llalpi 'alpi, qaq nache ndotrec taxa soomaye da nca'alde'c. Qaq Aỹem Nataxala', maiche Aỹem da san da ỹa'aqtac. 19Qaq da ñamaxa taxa que'eca 'alhua ca napiina, qataq da ỹayeloxo da ỹo'ot da nleuaxa, qataq da ileu ñaqa'en na shiỹaxauapi qataq na shiguiỹacpi, 20nache taxa da netraña que'eca 'alhua se'esoua ỹale't Noé, Daniel qataq so Job, nache saishet taxa da nca'alec ca llalaqpi ỹalleppi qataq aca llalpi 'alpi, qaq nachesouate' taxa soomaye da nca'aldec, souaxat da ỹo'ottrac co'ollaxa da nalochiguiñi lataxac. Qaq Aỹem Nataxala', maiche Aỹem da san da ỹa'aqtac. 21Qaq Aỹem Nataxala', shenapec: «Ỹataqta ỹactec taxa da qauem da ñamaxa ye Jerusalén naua cuatro iuaxanaxanaxaco maye chaqaiqa: Alaataxac, nqouaxa, qataq na shiguiỹacpi maye huauec, qataq na nhuetaxanaxasat, nache ỹalauat na shiỹaxauapi qataq na shiguiỹacpi. 22Qaq saq 'amaqtache qome caua no'oirañi da nca'altraue'c, nache ishet da quera'ai que'eca 'alhua lỹatec ca llalaqpi ỹalleppi qataq aca llalpi 'alpi. Qaq caamaye da ivita ca qoviita'a, nache qami' qauloỹa'a da 'eetec da lataxa'c, qataq nam ỹo'otpi nache qami' huo'o qome da qaramaicỹaxaqui, cha'aye qauaỹachiñi da huo'omshe ñamaxa da nhuaxanaguec ye Jerusalén. 23Qami' qauamaichiguiñi qom qauloỹa'a da lataxac caamaye qataq na ỹo'otpi. Qaq huaña nache qauaỹachiñi da saishet da choche sauo'o da nhuaxanaguec ye Jerusalén. Qaq 'era da ỹa'aqtac Aỹem Nataxala'.»
