1Ñim Nataxala' aỹem 'enapega, 'eeta': 2¿Ta'ainco' na hueta'a na Israel, ye saishet da ỹaxaañi da ỹe'eguelaxattalec naxa da na'aqtacaic maye, 'eeta': Na nta'alpi chectac ana uva ñe'eua, qaq na llalaqpi qalaq lto ana lhuepi? 3Aỹem Nataxala', ñañan da san da ỹa'aqtac, da saishet qome da qavi'eguelaqaitalec da qanasaqaitauec de'era na'aqtacaic naxa, ne'ena Israel. 4Cha'aye Aỹem ỹalamaxat 'enauac na shiỹaxauapi, na nta'alpi qataq na ñalaqpi. Qaq cam huo'o ca lasouaxashet qalaq ileu qome. 5Ca shiỹaxaua no'on da lataxac, nacheca ca ỹo'ot ca no'on qataq ca nalochiguiñi lataxac: 6camaye saishet da ỹalegueua'a ca nquia'axac maye huaña ana lcomaraxalatepi da yaqto' qaỹo'oxoren na nqolacpi, qataq saishet da ỹa'amaqten nam saq'en atamnaxala'pi na Israel, qataq saishet da deuotaxanec aca lhua ca lqaỹa, qataq saishet da hue'eguet aca lhua da ñaq huetaigui da na'axac, 7qataq saishet da saỹaỹamaxatapec ca lỹa, nacherata da ỹe'eguelaxatot cam lalamaxat ca lỹa maye qaipatano'ot co'ollaxa, qataq qaica ca decachiỹot, qataq ỹachet cam huo'o na lqouaxa qataq ỹanema caua alogo ca huetauec, 8qataq da ỹanec aca alom, qaq saishet da ỹagaqnauec aca iỹaxanaique da ivita da qaisheeten, qataq saishet da ỹo'otec ca qauem ca lỹa, qataq nalochiguiñi da lataxac da lo'onataxanaxac da nmi't caua dos shiỹaxau' maye ncotatega't, 9qataq ipagaqchiichigui da lataxa'c naua iqataxaco, qataq ipacchigui da lataxac na ỹamaxasoxonaxacpi. Qaq que'eca ỹale nacheca ca ỹoqta 'eesa da no'on da lataxac, qaq ỹoqo'oye camaye nca'alec qome. Qaq 'era da ỹa'aqtac, Aỹem Nataxala'. 10Qalaxaye que'eca ỹale da huo'o ca llalec maye qaica ca iren, qataq laataxanaxaic da huo'otaq ỹo'ot camachaqca nam 11saishet da ỹo'ottac co'ollaxa ca lta'a, qaq damaye, 'eeta': Da ỹalectaua'a ca nquia'axac maye huaña ana lcomaraxalatepi da qaỹo'oxoren na nqolacpi, qataq deuotaxanec aca lhua ca lqaỹa, 12qataq saỹaỹamaxatapec ca choxoraq qataq cam huo'o da lhuenaxanaxa, qataq decachiỹot na laỹepi, qataq sa ỹe'eguelaxatot ca lỹa cam nogoxoshet maye qaipatano'ot co'ollaxa, qataq ỹa'amaqten nam atamnaxala'pi maye saq'en, qataq da ỹo'ot nam lataxacpi maye seqaiga, 13qataq nquigaxattec añi iỹaxanaique da qaisheeten aca na'aale alom, qaq que'eca ỹale saishet qome da nca'altauec. Qaq da ime da ỹo'ot 'enauac ne'ena lataxacpi maye Aỹem seqaiga, nache camaye ileu qome, qalaxaye da l-leuaxa camaye, chegoqchigui ca maiche lasouaxashet. 14Qalaxaye que'eca ỹale, da huo'otaq huo'o ca llalec da ỹauaachigui 'enauac nam qauempi maye ỹo'ottac que'eca lta'a, qalaxaye da saishet da quegue namayepi da ỹo'ot, 15qaq damaye, 'eeta': saishet da ỹalegueua'a ca nquia'axac maye huaña naxa ana lcomaraxalatepi da yaqto' qaỹo'oxoren na nqolacpi, qataq da saishet da pi'iỹa'a na saq'en atamnaxala'pi na Israel, qataq saishet da deuotaxanec aca lhua ca lqaỹa, 16qataq qaica ca saiyacnapec, qataq saishet da iỹaxanaique ca npatanec da qaỹa'aalaxanot, qataq saishet da decachiỹot ca lỹa, nacherata da ỹachet cam huo'o na lqouaxa, qataq ỹanema caua logo ca huetauec, 17qataq saishet da ỹo'otec ca qauem ca lỹa, qataq saishet da ỹagaqnauec aca iỹaxanaique da qaisheeten aca na'aale alom, qataq ipaqueelec na iqataxacpi qataq ipacchigui na ỹamaxasoxonaxacpi. Qaq que'eca ñalec saishet qome da ileu souaxat na lasouaxashetpi ca lta'a. Camaye ỹoqta 'eesa qome da nca'alec. 18Qaq cam lta'a maye qaica co'ollaxa ca iren, qataq decachetac, qataq ỹo'ottac na qauem da ỹalectaigui na lauo' le'ecpi, camaye huo'o qome da nhuaxanaguec nache ileu souaxat na lasouaxashetpi. 19Qaq huaña qome, nache qami' qaunataxañi, qoñeeta': «¿Ta'ainco' da so ñalec saishet nataqa'en da isheeten nam lasouaxashetpi so lta'a?» Qaq cha'aye que'eca ñalec, ỹo'ot da no'on qataq da ỹaỹamaqchiguiñi lataxac, qataq ipacchigui da lataxac, qataq ỹo'ot 'enauac nam iqataxacpi: qaq ỹoqo'oye camaye ỹoqta 'eesa qome da nca'alec. 20Qaq nachecata cam huo'o ca lasouaxashet da ileu qome. Qaq cam ñalec saishet da isheeten ca lasouaxashet ca lta'a, qataq cam nta'a saishet da isheeten ca lasouaxashet ca llalec. Qaq ca no'on da lataxac, qalaq ỹaconeguet qome ca lasheechiỹaxac ca nalochiguiñi lataxac maye ỹo'ot, qaq ca qauemaic qalaq ỹaconeguet qome ca nhuaxanaguec souaxat dam qauem lataxac.
21Qalaxaye ca qauemaic da ỹaxaañi 'enauac nam lasouaxashetpi maye ỹo'ottac co'ollaxa, nache ipaqueelec 'enauac nam iqataxacpi, qataq ỹo'ot nam ỹaỹamaqchiguiñi qataq no'on lataxac, nache camaye ỹoqta 'eesa da nca'alec, qaq saishet qome da ileu. 22Qaq Aỹem, saishet qome she'eguelaxa da seuennatega 'enauac nam qauem maye ỹo'otpi co'ollaxa, qaq camaye nca'alec qome cha'aye ỹo'ot cam ỹaỹamaqchiguiñi lataxac. 23Aỹem saishet da saỹamaxaren da ileu ca qauemaic, maye nacherata da camaye naralaxat da lataxac, nache nca'alec. Qaq 'era da ỹa'aqtac Aỹem Nataxala'. 24Qalaxaye cam no'on da lataxac da ỹaxaañi ca no'on maye ỹo'ottac, nache ỹo'ot 'enauac nam qauempi, qataq nam qaiqaiga maye ỹo'ottac cam qauemaic, nache ¿qaupicheetega peta'a da queta da nca'altauec? Aỹem saishet qome da she'eguelaxa da seuennatega 'enauac nam no'on maye ỹo'otpi co'ollaxa: qaq camaye ileu qome souaxat da saỹalaq, qataq souaxat nam lasouaxashetpi. 25Qami', qoñiỹapec qome da saishet da so'onataxaatega da nalochiguiñi lataxac; qalaxaye ña qana'axaỹaxañi qami' nhuo' Israel le'ecpi, ¿qaupicheetega peta'a da saỹaỹamaxañi da so'ottac? ¿Qaq saishet peta'a da nache qami' maye qauo'ocheetac nam qauem? 26Qaq ca no'on da lataxac da ỹaxaañi da ỹo'ottac ca no'on, nache camaye ileu qome souaxat nam qauem maye ỹo'ottac. 27Qalaxaye ca qauemaic da ỹaxaañi nam qauempi, nache ỹo'ot ca ỹaỹamaqchiguiñi, qataq no'on lataxac, nache camaye nca'alec. 28Qaq da ỹauachiguilo naua la'ai'te, qataq ca'ai 'enauac nam qauem maye ỹo'ot co'ollaxa, nache camaye ỹoqta 'eesa da nca'alec qaq saishet da ileu. 29Qalaxaye na nhuo' le'ecpi na Israel, nasaxauec qome da saishet da so'onataxaatega da nalochiguiñi lataxac. ¿Peta'a saishet da so'onataxaatega da nalochiguiñi lataxac? ¿Saishet peta'a da nachena nam nhuo' le'ecpi na Israel, nam saishet da do'onataxaatega dam nalochiguiñi lataxac? 30Qaq Aỹem ñemit qome ñi 'oonolec da qoñeeta qami' Israel le'ecpi, qaq ipacchigui ñaqa'en cam ỹo'ot ñim 'oonolec. Qaq 'era da ỹa'aqtac Aỹem Nataxala'. Qaq ỹoqo'oye no'on da ỹataqta qoquiỹa'ai qome 'enauac nam qauem, yaqto' da qauem saishet da nachera da qami' ỹasouaxa't da qami' qanlaxaayeñi. 31Qoquiỹa'ai qome 'enauac nam qauemsat maye ỹo'ot da Aỹem qauataiỹa'aguet, nache qanpogoxoiñiỹapegue' da dalaxaic da qarquiyaqteỹaxaqui, qataq da saq cha'a qarca'alaqai. ¿Ta'ainco' taxa da qaullivi qami' Israel le'ecpi, 32ye Aỹem sa saỹamaxaren da huo'o ca ileu? Ña qoquiỹa'ai qome da qauem nache qanca'alleeuec. Qaq 'era da ỹa'aqtac Aỹem Nataxala'.
