Ezequiel 2

₁Qaq so ime de'era, nache sa'axaỹa so nvilỹaxac, 'eeta': «'Am shiỹaxaua 'anachaañi, cha'aye Aỹem 'am setaxaỹapegue'.» ₂Qaq so ñaq sa'aqtega se'eso nvilỹaxac, nache taigui aỹem so La'añaxac Ñim Lo'onatac 'Enauacna, nache aỹem nachalataxaañi. Qaq huaña nache se'eso nvilỹaxac maye sa'aqtega ₃nache queto'ot da aỹem 'eetega, 'eeta': «'Am shiỹaxaua nache 'am da 'am samaxa na Israel le'ecpi, nam nhuo' le'ecpi maye Aỹem saỹalaxaguet. Namayepi qataq som hua'au lta'alpi, Aỹem dataỹa'aguet co'ollaxa nache choche ivitta'a ne'ena na'a'q. ₄Qaq nataqa'en na llalaqpi namayepi qaramchigui, qataq sana'axaỹaxan. Qaq 'am samaxa namayepi da yaqto' qonapega, qoneta': ‹'Era da la'aqtac Ñim Nataxala'.› ₅Saiuena'a da 'am ỹalaxaguet huo'otaq saishet, cha'aye namayepi ỹataqta saỹalaq, qalaxaye dam choche ỹaỹaten da huo'o na na'aqtaxanaxanec da netangui namayepi. ₆'Am shiỹaxaua, saishet qome da 'añe'eỹa namayepi, qataq naua la'aqtac maye 'am ỹasaxaleguete, na'aictaxa da 'eco' 'am coleesop ana ỹaxat, huo'otaq da 'eco' qonetangui na pe'elaqtoicpi. Saishet da 'añe'eỹa nam la'aqtacpi, qataq saishet da 'am icolanaqchet da lasheguiỹaxac na'aictaxa da ỹataqta chaqaic. ₇Qalaxaye 'am, 'aua'aqtaxanem qome namayepi naua ỹa'aqtaqa, saiuena'a da 'am ỹalaxaguet huo'otaq saishet, cha'aye namayepi ỹataqta saỹalaq. ₈Qaq ỹoqo'oye 'ana'axaỹaxaachigui dam ỹa'aqtac, qaq saishet qome da sa 'aualaq da qoneta'am namayepi. Ñaq 'auauachigui na 'ap nache qollec nam 'am sanem.» ₉Qaq huaña nache sauaateguet so nhuaq da aỹem naỹaña, qaq somaye nasoqta'a aso nere maye qalpatta'ague. ₁₀Qaq sauaachigui se'eso nhuaq da nchennaxanec asa'aso nere, qaq asomaye qoỹettaleguete 'enauaque naua laỹel, qaq da huetalec asomaye nachera da noinaxac qataq da na'alaxac souaxat da qui'ic, qataq na nasauaqtaxanaxacpi.