Yeua nqaỹa't Samaria qataq Jerusalén
1Ñim Nataxala' aỹem 'enapega nache, 'eeta': 2«Huo'o so na'a'q nache huo'oi soua dos 'alo, qaq 'oonole aso late'e'. 3Qaq chegoqchiguiña co'ollaq ña qa'añolel se'esoua dos 'alo, nache nañaareguet da nquisheguetaxac, co'ollaq huaña ye Egipto nache nasheete' da qaipotta'ape naua ltete, qaq huaña nache deqat so nnogotshe'c. 4Qaq aso ỹe le'enaxat Aholá, maye nacheye ye Samaria, qaq aso lqaỹa le'enaxat Oholibá, maye nacheye ye Jerusalén. Qaq Aỹem saronegueta co'ollaxa soomaye, nache huo'o so ỹalaqpi ỹalleppi qataq 'alpi. 5Qaq aso Aholá, saishet da Aỹem ỹalaxaguet, nache ỹapagaqnauec da lqopiche so ncachaxauapi alaataxaicpi Asiria le'ecpi, 6maye ỹaatrañi naua alogo tocaleguete, qaq 'enauac somayepi nataxala'pi qataq nta'alpi, nsoxoppi maye ỹataqta 'onaxaicpi da netalec so caipi, 7nache nañaneguet da nquishestague' som ỹataqta ỹactec da lyac Asiria le'ecpi. Aso Aholá nañaneguet da nquishestague' somayepi, qataq nshepaxanaqchet da lataxac souaxat da ỹo'oxoreetac so lqolacpi somayepi. 8Qaq nache chegoqta'a co'ollaq hueta'a ye Egipto, nache nañaneguet da nquisheguetaxac, nache saishet da ỹaxaañi damaye. Qaq nache chegoqta'a co'ollaq ñaq qa'añole da qalota som lauañe'pi, qataq ipottac ana ltogue, nache iqataqchet so nnogotshec qataq ỹaneguet da quisheguetaxac. 9Qaq ỹoqo'oye saneguet so nauonaxauapi Asiria le'ecpi, souaxat da asomaye ỹataqta nqopita, 10nache somayepi ỹataqta saiyacnapec asomaye, nache deuotaxanec so llalaqpi, ỹalleppi qataq 'alpi, qataq ỹalauat asomaye irota'a so ỹeelonec. Qaq de'era nhuaxanaguec asomaye, damaye qaivitaqna'aguet na 'alpi. 11Qaq aso lqaỹa Oholibá ỹauaachigui co'ollaxa de'era, qalaxaye asomaye nache 'ena'am nañaneguet co'ollaxa da lqopiche da quisheguetaxac, nache napactelec aso lqaỹa Aholá. 12Qaq asomaye nataqa'en ỹataqta nqopita so Asiria le'ecpi, qaq somayepi 'enauac da nataxala'pi, nta'alpi, alaataxaicpi maye ỹataqta no'on na no'otaxatpi, qataq so netalec so caipi, qataq som ỹataqta 'onaxaic nsoxoppiolec. 13Qaq Aỹem sela'a da nataqa'en asomaye nshepaxanaqchet da lataxac, qataq quegue da lataxac aso lqaỹa Aholá. 14Qalaxaye aso Oholibá, ỹataqta ỹactec da lquisheguetaxac, souaxat co'ollaq ila'a so lqui'ipi so caldeopi maye qoỹettalec so huoque togaxaraiqa naua alogo, 15qataq huo'o so nsaataxaqui qataq so qalotegue lqaic laxataxat. Qaq da lataxac somayepi qalaq 'eeta'am na nataxala'pi, qataq 'eeta'am so Babilonia le'ecpi maye lañoqo' ye Caldea. 16Qaq asomaye co'ollaq ila'a somayepi, nache ỹataqta nqopita, nache ỹauo'oi soua lamaxa'she da ỹamaxalo ye Babilonia, 17qaq so Babilonia le'ecpi anac nache lauañi' asomaye, qataq huetapeeguet nache ishepaxanaqchet asomaye, souaxat da lquisheguetaxac. Qaq souaxat da ỹataqta ỹe'eguelaqtalec da ỹo'ottac damaye, nache asomaye ivitta'a da deqaiga somayepi. 18Qaq asomaye ye ỹataqta ỹaatec naqa'en da lquisheguetaxac, qataq huetauec da ỹachaxan da lo'ocỹaxac, nache ivitta'a da seqaiga asomaye, 'eeta'am da 'eetec co'ollaq seqaiga aso lqaỹa. 19Qalaxaye asomaye nache queto'ot da nquigaxattauec da lquisheguetaxac, iuennate soua na'axa'te co'ollaq ñaq qa'añole, co'ollaq hueta'a ye Egipto da nquishestac, 20nache ỹapagaqnauec da lqopiche so nauonaxauapi Egipto le'ecpi, maye ỹaguec da lapaxaỹaxa, 'eeta'am na 'ashenapi qataq na caipi, 21nache iuennate da lyacỹaxac co'ollaq ñaq qa'añole, co'ollaq so Egipto le'ecpi, ipotta'ape naua ltete.» 22Qaq ỹoqo'oye 'am Aholibá, da la'aqtac Ñim Nataxala', 'eeta': Aỹem so'ot qome da nam 'anauonaxauapi maye 'auqaiga nagui, ỹe'eguelaxa qome da 'ampa'aguenaxauapi. Qaq sachegoxoqchiguiñalo qome 'enauaque naua pa'aiguelo da 'am naỹa 23nam Babilonia le'ecpi, Caldea le'ecpi, Pecot le'ecpi, Soa le'ecpi, Coa le'ecpi qataq 'enauac na Asiria le'ecpi, qaq namayepi 'enauac nsoxoppiolec maye ỹataqta 'onaxaicpi, nataxala'pi, nta'alpi, qataq na lataxala' na alleppi, qataq na alaataxacpi, qaq 'enauac namayepi da netalec na caipi. 24Qaq 'am naỹa qome namayepi, huota'a ana qalota naigonapi, qataq na alleppi, nache 'am coleesop qome, na'atchigui na lo'ogoxonaxatpi, qataq ỹaatañi ana naro'opi maye nalaataxaquipi, qataq ana lpaqtaxanaqtepi, qaq Aỹem sanem qome namayepi da 'am nmi't, qaq 'am nmit qome, do'ogoxona da maiche lataxac namayepi da huo'o ñi nmit. 25Qaq Aỹem 'am sematalec qome da ỹayeloxo, nache namayepi ỹataqta 'am saiyacnapec qome, icheguec na 'armic, qataq naua 'artela, qaq ca lca'alaxaicpi qome nache ỹalauat irolec ca ỹeelonec. Qataq saicherapec da ỹauec na 'aỹa'alaqpi ỹalleppi, qataq na 'alpi, qaq 'aupa'atec qome da 'am ỹavigaxat. 26Qataq nqat ana 'arpoto, qataq ỹacona ana 'ano'otaqtepi. 27Qaq 'era da 'eetec qom sha'axaneguet dam 'arataxac maye maiche 'ananoiqueetac naxa da huo'o ye 'auo'ot, qataq da 'arquisheguetaxac, maye 'anañaneguet co'ollaq huaña ye Egipto, nache saishet qome da ỹe'eguelaxa da qaltaq 'anauane' ye Egipto le'ecpi, huo'otaq da 'auennatega yemayepi. 28Qaq 'era da ỹa'aqtac, Aỹem Nataxala': 'Am saneguet qome da lhuaqỹaxac yem 'arquiỹaxatpi qataq yem 'auqaiga co'ollaxa. 29Qaq yemayepi 'am nquiỹa qome, nache ỹauo'o lalamaxat nam chegaqaigui co'ollaxa da 'aro'onataxanaxac, qataq ivitta'a da ỹataqta qouetauec naqa'en, nache imauec da yo'oqta da 'aro'ocỹaxac maye 'aỹa'aneguet co'ollaxa da quisheguetaxac. Dam 'arataxac maye maiche 'ananoiqueetac naxa da huo'o ye 'auo'ot, qataq da 'arquisheguetaxac, 30nachera da huo'omshe huo'o dam 'am talec nagui, cha'aye 'am 'anañaneguet co'ollaxa da 'anquishestague' ye ỹotta'a't shiỹaxauapi, qataq 'anshepaxanaqchet da 'arataxac souaxat da 'avio'oxoreetac na lqolacpi yemayepi. 31Qataq qoquetegue da lataxac aso 'arqaỹa Aholá, qaq ỹoqo'oye 'am sanem qome da 'anỹomgui aso ỹomaxaqui maye ñeỹomaxangui co'ollaxa asomaye.
32Qaq 'era da ỹa'aqtac Aỹem Nataxala':
'Am 'anỹomgui qome aso ỹomaxaqui maye nỹomgui co'ollaxa aso 'arqaỹa,
asom ỹomaxaqui maye late'erai, qalochiguingui qataq qaỹoqchiguingui,
maye nlaqchigui da ne'enaxanaxac qataq da no'otanaxanaxac,
33qataq nlaqchigui da ntaxa qataq da qui'ic.
Asa'aso ỹomaxaqui lalamaqte aso 'arqaỹa Samaria,
asom 'am itaqchet qome qataq ỹo'ot qome da 'anqui'ic.
34Nache 'auchiguiñi asomaye qom 'anỹomgui,
qaq ime qome nache 'aulaxachigui
nache icolaxat qome ana 'artogue,
cha'aye Aỹem ỹa'aqtac. Qaq 'era da ỹa'aqtac Aỹem Nataxala'.
35Qaq ỹoqo'oye Aỹem Nataxala', shenapec: «Qaq cha'aye Aỹem 'aucoua'ai, qataq Aỹem 'aỹa'aneguet na 'al-laq, nache 'anque'etaxangui qome da 'anhuaxanaguec souaxat da maiche 'ananoiqueetac da huo'o ye 'auo'ot, qataq nam 'arquisheguetaxacpi.»
36Qaq Ñim Nataxala' aỹem 'enapega, 'eeta': «'Am Ezequiel, ¿'auauotaique peta'a da 'anmit na lasouaxashet aso Aholá qataq aso Oholibá? Hua' qone', 'auachaxana nam ỹo'ottacpi maye qaiqaiga. 37Soomaye saishet da Aỹem ỹalaxareguet, qataq huaguilo naua lhuaxaye na ntago'q. Soomaye Aỹem saỹalaxareguet nache ỹo'oxoreetrac so lqolacpi, qataq souaxat da llo'oxonnataxanaxac somayepi, nache ỹaneuo da qaỹavigaxat so lalamaxat llalaqpi maye sanema co'ollaxa soomaye. 38Qataq da yaqto' Aỹem dataỹa'agueta, nache ỹo'o't de'era, 'eeta': So 'oonolec na'a'q nache huaigui naqa'en da ishepaxanaqche't añi qui'itta ỹalamaqte atamnaxaqui, qataq qaica ca 'enec naqa'en ye na'a'q mataxaqui maye ỹalamaxat. 39Qaq nacheso se'eso na'a'q co'ollaq ỹavigaxat so llalaqpi da ỹo'oxoren so lqolacpi, nache naua'a añi qui'itta atamnaxaqui maye ỹalamaqte, nache ishepaxanaqchet. ¡Qaq 'era dam ỹo'ot co'ollaq huaña ñim ỹalamaxat ima'!
40Qataq ỹamaq so lamaxashecpi, da yaqto' anac naqa'en som ỹalleppi maye qaỹoqta na hueta'a, qaq nache anac somayepi. Nache soomaye nache'l, qataq ỹa'ame'n naua la'ai'te, qataq ỹaayiñi ana no'otaqtepi da yaqto' ilo'oguet somayepi, 41ime nache nso'oorelec so ỹataqta 'onaxaic mala', maye saqaỹapeque so nquia'axala' maye mashe lhuotta so huetalec nallec, qataq ỹaaralec somaye so nchenaxanaxat maye ama na laita, qataq so aceite maye ỹalamaqa'ate. 42Nache qaỹa'aqtega da la'alaxac so qalota shiỹaxauapi maye ỹo'ottac so la'ashaxac, qaq se'eso ỹalleppi chegaqauga so toolec 'alhua, qaq somayepi ỹaateguengui na no'on no'otaxat so 'alpi, ỹangui na lhuaxashecpi, qataq ỹanagui na lqaic aso ỹataqta 'onaxai aro'opi. 43Qaq huaña nache seuennataxaaleguete se'esoua 'alo maye mashe qaica ca lya'c souaxat da lquisheguetaxa'c, nache sheeta': Nagui namayepi nache queto'ot da iqopitaxaatac da lauañeto se'esoua alo maye quisheguetaxail. 44Qaq nache lauañeto soomaye, 'eeta'am ca lauañi' aca quisheguetaxai. Qaq 'era da 'eetec somayepi da lauañeto soua 'alo maye maicheye ca ỹo'o't, qaq soomaye le'enaxat da Aholá qataq Oholibá. 45Qalaxaye nam ỹalleppi maye no'on da lataxac, nmi't qome na lasouaxashe't nache ỹanegueta ca nhuaxanaguec maye naigui nam ỹo'o't se'esoua quisheguetaxail qataq laataxanaxail. Qaq cha'aye nachera dam lataxa'c soomaye: quisheguetaxail qataq laataxanaxail.»
46Qaq 'era da la'aqtac Ñim Nataxala': «Ñaq laỹona't qome na nhuo' le'ecpi da dataỹa'agueta soomaye, qataq ỹo'otec da lcolanaxa qataq decachiỹoto, 47qataq 'enauac qome na nhuo' le'ecpi da ỹasa'q soomaye, irolec ca coma', qataq ỹapacaviiguilo naqa'en ca lainec da ỹalaua't, nataqa'en ỹalauat ca llalaqpi ỹalleppi qataq 'alpi, qataq ỹavigaxat ca lma'pi. 48Qaq Aỹem so'ot qome da ne'ena 'alhua imeuo de'era qauem nataxac. Yaqto' 'enauac na 'alpi ỹaỹaten qome de'era nhuaxanaxanaxac, nache saishet da quegue de'era nataxac maye qauem. 49Qaq se'esoua dos nqaỹa't ỹaconegueta qome ca nhuaxanaguec souaxat dam qauem lataxa'c, qataq nam lasouaxashetpi souaxat da ỹo'oxoreetrac na nqolacpi. Qaq huaña qome nache qami' qauaỹacheñi da Aỹem nachaỹem Nataxala'.»
