Qaỹaloqnaxana aso taxaqui nachamtac
1Qaq so na'a'q diez, som ca'agoxoic diez, so vi'i nueve, Ñim Nataxala' aỹem 'enapega, 'eeta': 2«'Am Ezequiel, 'iyiñi ne'ena na'a'q, cha'aye ne'ena na'a'q nache huaigui da ñi nta'a ye Babilonia iloquiaxan ye Jerusalén. 3Qataq 'auauo'o ca 'aualoqnaxana da 'autaxaỹot ne'ena shiỹaxauapi maye saỹalaq. Qataq 'auqata namayepi qoneta', da la'aqtac Ñim Nataxala' maye qaica ca ỹaqalanapec, 'eeta':
'Aỹa'anangui ca norec aca taxaqui nache 'acorengui ca 'etaxat,
4nache 'auachangui acamaye ca lapat laỹe,
qataq ca no'on ltele'eta lapat qataq ca l-laq lapat,
qataq ca ỹataqta no'on lpi'inecpi.
5Qataq 'auaconeua'a qome aca 'oonole anam ỹataqta no'on qaguetapi,
nache ca lpi'inecpi 'auasaxangui na ỹataqta pa'aguiñi aca taxaqui,
qataq ỹataqta nacham 'anqa'en, yaqto' datota nataqa'en ca lpi'inecpi.
6Cha'aye Ñim Nataxala', 'enapec:
¡Aicoue 'am huaqta'a't nỹecpi maye 'am laataxanaxai!
Qoneta'am aca taxaqui mashe decochigui,
maye mashe saishet da qanqat na lcochaxa.
Qataq 'anqonaxattasheguem na laỹepiolec ca lapat da 'anqatsheguem,
nache ivitta'a da qui'itchigui 'anqa'en aca taxaqui.
7Yem huaqta'a't nỹecpi ỹataqta nlaxagui na ntago'q maye huecorec,
qalaxaye saishet da huecorelec na 'alhua da yaqto' ỹapolec na namoxoỹaxa,
nacherata da huecorelec ana coma'pi.
8Qalaxaye Aỹem nataqa'en sa'aqta'a qome na ltago'q da huetalec
añi qaramta coma' yaqto' saishet da qaỹapolec,
cha'aye ỹo'ot da 'eroigui da inogoxonaxac,
qataq ỹo'ot da sepalaique ivi'.
9Cha'aye Ñim Nataxala' 'eeta':
¡Aicoue 'am huaqta'a't nỹecpi maye 'am laataxanaxai!
Aỹem nataqa'en so'ot qome ca qalota nalonaxanaxat.
10Qaq 'am 'andouo qome ca qalota nalonaxanaxat,
qataq 'aue'eraxatoigui ca norec, nache ỹataqta datota 'anqa'en ca lapat,
nache ivitta'a 'anqa'en da imeuo ca lli'i qataq ỹavicta ca lpi'inecpi,
11qaq ime nache 'aỹa'anangui ca norec aca taxaqui qui'itchigui,
nache ivitta'a 'anqa'en da chauec na le'eraxa yaqto' ñeuec na lcochaxa;
¡qaq 'era da 'eetec qome da yaqto' ñeuec na lcochaxa!
12Qalaxaye acamaye ye ỹataqta decochigui,
nache cam norec saishet da qui'itta naqa'en.
13'Am Jerusalén, Aỹem sauotaique co'ollaxa da seỹouec na 'arshepaxanaxapi, souaxat da maiche 'ananoiqueetac naxa da huo'o ye 'auo'ot, qalaxaye saishet da 'am qui'itta. Nacherata qom 'am sematalec da ỹayeloxo, nache cheta'ague da 'am qui'itta. 14Qaq Aỹem Nataxala', ñasaxauec de'era qaq damaye ipacchigui qome. Maiche Aỹem da so'ot qome damaye, nache saishet da saipaigui ñaqa'en, saishet qome da 'am sechoxoreetac, qataq saishet qome da ñetogottac. Sauo'o qome ca 'anhuaxanaguec souaxat da qauem 'arataxac, qataq nam 'auo'otpi. Qaq 'era da ỹa'aqtac Aỹem Nataxala'.»
Da l-leuaxa aso lhua so Ezequiel
15Qaq Ñim Nataxala' Aỹem 'enapega, 'eeta': 16«'Am Ezequiel, Aỹem sacona qome asom 'arhua maye ỹataqta 'arauotaqte. Qalaxaye saishet qome da 'auaquico, qataq saishet da 'anỹen, saishet qome da 'aucolde'c naua 'arache'. 17Choche 'añe'emaxatte' qome da 'anqui'ic, qataq saishet da 'auachaxan da 'arasouaxac souaxat asomaye. Qataq saishet qome da 'auauattalec na 'arqaic, qataq da qaicaua caua 'arapela'ate, qataq saishet da 'auapotagui na 'arashec da la'anaxat 'anqa'en da 'anqui'ic, qataq saishet da qollec aca nauole maye qanallec naxa da huo'o da nasouaxac.»
18Qaq so nte'eta setaqtague' so shiỹaxauapi, qaq so avit nache ileu aso ihua; qaq so nte'eta so lỹa na'a'q, nache so'ot dam aỹem ỹamaxalec Ñim Nataxala'. 19Qaq huaña nache so nhuo' le'ecpi aỹem inattac, 'eeta': «Ñaq qomi' 'aua'aqtaxanema cam naigui, qataq cam ỹa'axattac de'era maye 'auo'ottac.»
20Nache aỹem shenapec. «Ñim Nataxala' aỹem 'enapega, 'eeta': 21'aua'aqtaxanem qome na Israel le'ecpi, qoneta': 'Era da la'aqtac Ñim Nataxala': Aỹem seshepaxanaqchet qome añi ỹalamaqte atamnaxaqui, maye qarqopichiỹa naxa da qaualleetaua'a, qataq qarauotaqche, qataq ỹo'ot da qaño'oxonnaxaqui qataq qara'añaxaqui, qaq yem qaỹa'alquipi ỹalleppi, qataq 'alpi maye qano'onaxachiỹaña co'ollaxa ye Jerusalén, qalaq qaỹalauat qome qairolec ca ỹeelonec. 22Qataq qonapega qome, qoneta': Qami' nataqa'en qauo'oche qome dam so'ottac: saishet qome da qauapoigui na qarashequi, da la'anaxat da qanqui'iqui, qataq saishet da qollequi aca nauole maye qanallec da huo'o da nasouaxac. 23Saishet qome da qauauacheetalec na qarqaiqui, qataq saishet da qaicaua caua qarapela'achilli'. Qataq saishet qome da qauaquicoi qataq da qanỹiñiitac. Qami' qaica qome ca qara'añaxaqui souaxat na qauem maye qauo'oche, qataq ñi 'oonolec da qoñiita qauaquicoita qome. 24Qaq na Ezequiel, nachena na qaraloqnaxanaxache qome, da yaqto' qaue'enaxachiichigui dam ỹo'ottac. Qaq qom ipacchigui de'era, nache qauaỹachiñi qome da Aỹem nachaỹem Nataxala'.
25Qaq qom seuotaxanec ye lpaqtaxanaxat na Israel le'ecpi, maye nachañi añi atamnaxaqui, maye ỹo'ot naxa da lamaicỹaxac namayepi souaxat da lyac, qataq nqopita da ilotaua'a qataq lauotaqte. Qaq nataqa'en seuotaxanec qome na llalaqpi ỹalleppi qataq 'alpi. 26Qaq que'eca na'a'q, cam ishet da naleltaxan, nache anac qome da 'am nda'a ca 'ara'axaỹaxac. 27Qaq que'eca na'a'q, nache huo'oi qome naua 'ara'aqtaqa, nache ishet da 'ana'aqtaxane' qome que'eca 'eltaxaic. Qaq 'am nache 'am laloqnaxanaxat qome na nhuo' le'ecpi, qaq huaña qome nache namayepi ỹaỹaten da Aỹem nachaỹem Nataxala'.»
