1Ñim Nataxala' aỹem 'enapega, nache 'eeta': 2«'Am shiỹaxaua 'auamata'a ye Amón le'ecpi, nache 'aua'axata'a dam talec qome yemayepi. 3Nache qonapega da na'axaỹaxana da la'aqtac Ñim Nataxala' maye taalec yemayepi, 'eeta': Qami' qaua'alqaitagui da qantonaxaqui co'ollaq qauloỹa'a añi ỹalamaqte atamnaxaqui da qanshepaxanaqchet, qataq co'ollaq qailaxachigui ye 'alhua Israel, qataq co'ollaq noxonec na Judá le'ecpi nache qaỹauega ye ỹaqa'a 'alhua. 4Qaq ỹoqo'oye qami' sanegueta qome da la'añaxac na shiỹaxauapi maye lma' ye pa'aigue da nala' lliguisheguem, yaqto' yemayepi deuotaxanec qome na qana'alhuai, nache ỹo'ot na lanataqa'pi, qataq ỹanaña namaye na lma'pi. Qaq yemayepi qome chectac na ala na qorañiguishiqui qataq nỹomtapigui na lche' ana qareloi huacapi. 5Qaq ye Rabá, qalaq so'ot qome da ñaxaalec na 'auaqpi nache lquia'aqa' ana nauanaxanaxapi, qaq ye Amón qalaq lquia'aqa' qome ana qaguetapi. Qaq huaña qome nache qauaỹachiñi da Aỹem nachaỹem Nataxala'.
6Qaq Aỹem Nataxala', shenapec: Qami' Amón le'ecpi qauaxañiita'a't co'ollaxa naua qarhuaxayilli' qataq qauparenaxañeetai' souaxat da qantonaxaqui, nache qavi'iñiitac na Israel le'ecpi. 7Qaq ỹoqo'oye Aỹem ñauaxaỹaxaasheguem qome na ihuaq da sauo'o ca qanhuaxanaguiiqui, qataq qami' sanegueta na ỹotta'a't shiỹaxauapi da yaqto' deuotaxanec 'enauac na qaralamaxache. Qataq qami' ñeqateeguesopa na nhuo' le'ecpi, nache qami' ñematchiyiñi da qami' selaxachiguilo. Qaq huaña qome nache qauaỹachiñi da Aỹem nachaỹem Nataxala'.
Qaỹa'axata'a dam talec qome ye Moab
8Aỹem Nataxala', shenapec: Ye Moab qataq ye Seír, 'eetega 'eeta'am naxa na laỹepi ỹotta'at shiỹaxauapi ye Judá. 9Qaq ỹoqo'oye sauatec qome na laỹe ye Moab, nache imauec qome da qaica ye huaqta'a't nỹecpi, yem ỹataqta ỹo'oxoraq huaqta'a't nỹecpi yi'iye 'alhua: Bet Yesimot, Baal Megón qataq Quiriatayin. 10Nache so'ot qome da na nhuo' le'ecpi maye lma' da pa'aỹa'ague da nala' lliguisheguem, da ỹacona da ỹauo'o lalamaxat na na'alhua namayepi, qataq nataqa'en ye na'alhua na amoniitapi, yaqto' nam ỹotta'a't shiỹaxauapi qaica qome ca qaltaq iuennatega namayepi. 11Qaq nataqa'en ñemit qome ye Moab, qaq huaña qome nache ỹaỹaten yemayepi da Aỹem nachaỹem Nataxala'.
Qaỹa'axata'a dam talec qome ye Edom
12Aỹem Nataxala' shenapec: Ye Edom ỹauo'o co'ollaxa da lvi' da ỹe'eguelaxateguet ye Judá, qaq damaye nachera da ỹo'ot da lta'araic lasouaxashet. 13Qaq ỹoqo'oye Aỹem Nataxala', shenapec: Ñauaxaỹaxaasheguem qome na ihuaq da yaqto' seuaxan ye Edom, qataq selaxachigui na nalleppi qataq na na'atetpi. Nache ỹataqta nlachiguiñi ñaqa'en. Qaq chegoqchiguiña qome ye Temán nache ivira'a ye Dedán, da nam shiỹaxauapi qaỹalauat qairolec ca ỹeelonec. 14Sauo'o qome ca ivi' da she'eguelaxateguet ye Edóm chegoqchigui ñaqa'en na ỹalamaxat nhuo' Israel le'ecpi, qaq chegoqchigui qome namayepi da sematalec ye Edóm 'enauac da ỹayeloxo qataq da inogoxonaxac. Qaq huaña qome nache ỹaỹaten da 'eetec da so'ot da ivi'. Qaq 'era da ỹa'aqtac, Aỹem Nataxala'.
Qaỹa'axata'a dam talec qome na filisteopi
15Aỹem Nataxala', shenapec: Na filisteopi ipalaique lvi' co'ollaxa souaxat da ỹataqta ỹapacauec da lquiỹaxa ye Judá. Nache ilaxachigui souaxat da nache 'eetai' da chegoqta'ague da npa'agueetague'. 16Qaq ỹoqo'oye Aỹem Nataxala' shenapec: Ñauaxaỹaxaasheguem qome na ihuaq da sataỹa'aguet na filisteopi, ñematchiguiñi qome na cretensepi, qataq selaxachigui nataqa'en cam no'onañipi maye hueto'ot na loigue aso auaxai. 17Qaq ỹataqta chaqaic qome ca ỹayeloxo qom she'eguelaxateguet namayepi. Qaq qom so'ot damaye, nache namayepi ỹaỹaten qome da Aỹem, nachaỹem Nataxala'.»
