Qaỹa'axata'a dam talec qome ye Egipto
1So na'a'q doce, so ca'agoxoic doce, so vi'i diez, nache Ñim Nataxala' aỹem 'enapega, 'eeta': 2«'Am Ezequiel ña 'auamata'a ñi faraón maye nta'a ye Egipto, nache 'aua'axata'a dam talec qome ñimaye, qataq 'enauac ye Egipto le'ecpi. 3Qoneta':
'Era da la'aqtac Ñim Nataxala', 'eeta':
Aỹem ñechoxot da 'am ñepa'aguenaxaua,
'am faraón maye 'am nta'a ye Egipto, 'am shiguiỹac lta'araic
maye 'annaatangui aso tala nache qoneta', naxa:
Na tala Nilo maiche ỹalamaxat, aỹem ỹo'onatac.
4Aỹem shemaxagui qome na 'armic ca lcat,
nache so'ot da na nỹaqpi maye huetangui
aso 'aralamaqte tala lapaxaua'a ana 'arsopi.
¡Qaq 'am sachegoxotchiguingui qome aso 'aralamaqte tala
da 'am ñeqatsheguem, nache 'arỹasheguemgue'
'enauac na nỹaqpi maye lapaxaua'a ana 'arsopi!
5Qaq ime, nache 'am sasaxauga ye toolec 'alhua,
'arỹaueegue' na nỹaqpi maye chegaqangui so 'aralamaxat tala,
nache qouetalec qome ye ỹasattalec no'onaxa,
nache qaica ca 'am ỹacoosop da 'am ilayiñi.
Qataq so'ot qome da 'am chec na shiguiỹacpi maye huauec
qataq na maỹopi maye chec na lapat.
6Qaq huaña qome, nache 'enauac na Egipto le'ecpi,
ỹaỹaten da Aỹem nachaỹem Nataxala'.
Na nhuo' Israel le'ecpi nmittaique co'ollaxa ca 'artaunaxanaxac,
qalaxaye 'am qoneta'am aca coqta:
7da co'ollaq 'am ỹaconeua'a namayepi, nache 'auacac,
nache 'auque'emaqchet 'aua'areua'a na laỹe,
qaq co'ollaq nshetaique da 'am hua'axaua'a namayepi
nache 'auacac nache huañi 'anqa'en namayepi.
8Qaq ỹoqo'oye Aỹem Nataxala', shenapec: 'Am Egipto, Aỹem so'ot qome da 'am qailoquiaxan, 'am qairolec ca ỹeelonec, qataq qaỹalauat na 'analleppi qataq na 'ana'atetpi. 9Qataq so'ot qome da 'am toolec, qaq huaña nache na shiỹaxauapi ỹaỹaten da Aỹem nachaỹem Nataxala'. 'Am maye qonapec naxa: Ye Nilo maiche ỹalamaxat, aỹem ỹo'onatac. 10Qaq ỹoqo'oye Aỹem ñechoxot da 'am ñepa'aguenaxaua qataq so 'aralamaxat tala. Qaq 'am she'eguelaxata qome da 'am toolec 'alhua maye ncolanaxat, qataq 'am nlachiguiñi ñaqa'en, chegoqchiguiña ye Migdol nache ivira'a ye Asuán, qataq ivira'a so loigue ye Etiopía. 11Qaq ivittrec qome caua cuarenta vi'iye, da saishet da choche 'am ỹa'axasoxoolec ca shiỹaxauapi, qataq ca shiguiỹacpi, qataq qaica qome ca 'am nalec. 12Qaq 'am Egipto, so'ot qome da 'am nlachiguiñi, qaq ivittrec qome caua cuarenta vi'iye, da na 'aralamaxatpi huaqta'a't nỹecpi nlachiguiñi, napacalec da 'eetec na laỹepi huaqta'a't nỹecpi maye nlachiguiñi, qataq ñeqatec qome na 'am hueta'a shiỹaxauapi, nache selagaxat taỹa ñaqa'en na ỹotta'a't 'alhuapi qataq na ỹotta'a't shiỹaxauapi. 13Qaq Aỹem Nataxala', shenapec: Qom inoxoorec caua cuarenta vi'iye, nache llaỹona't qome na Egipto le'ecpi sachegoxotchiguiña nam 'alhuapi maye selagaxata co'ollaxa. 14Qataq so'ot qome da na ncoñeteguishecpi Egipto le'ecpi, ñe'eguelaq nache qaltaq nalec ye pa'aỹa'ague da taguiñi ye Egipto, yem maiche lma' co'ollaxa, yem huaña qome da qaica ca la'amaqchec ca lo'onataxanaxac. 15Qaq que'eca lo'onataxanaxac qaica qome ca la'amaqchec, saishet da 'ena'am na laỹepi nta'alpi, qaq saishet qome da qaltaq nauaqsheguem da nataỹaña na laỹepi ỹotta'a't shiỹaxauapi. So'otec qome da ỹataqta qaica ca la'amaqchec, nache saishet da ilo'ogue na laỹe 'alhuapi, 16qaq huaña qome nache na nhuo' Israel le'ecpi, saishet da qaltaq naquitto'ot ye Egipto, cha'aye de'era nachera da ỹachaxana qome da lsomaxac na namayepi, co'ollaxa nqo'ona yemaye da ilotaique ca ntaunaguec. Qaq huaña qome, nache namayepi ỹe'eguelaxa da Aỹem ỹauatton da nachaỹem Nataxala'.»
17Qaq so la'auaxanec na'a'q, so la'auaxanec ca'agoxoic, so vi'i veintisiete, nache Ñim Nataxala' aỹem 'enapega, 'eeta': 18«Ñi Nabucodonosor maye nta'a ye Babilonia, lỹatac na nalleppi, ỹataqta ỹauo'o da na'añaxataxac da iloquiaxan ye Tiro, nache ivira'a da ñeuec na laue, qataq toccheguilo naua lallaco, qalaxaye ñimaye qataq na nalleppi, qaica ca ỹachegoxotaigui da l-loquiaxanataxanaxac co'ollaq iloquiaxan ye Tiro. 19Qaq ỹoqo'oye Aỹem Nataxala', shenapec: So'ot qome da ñi Nabucodonosor loxonec ye Egipto, nache deuotaxanec da lsallaxa, qataq laỹona't qome 'enauac cam lhuotaxanaxatpi, nache desheetenaxana da isheeten na nalleppi. 20Aỹem so'ot qome da ñi Nabucodonosor loxonec ye Egipto, da lasheue ñaqa'en da iloquiaxan ye Tiro, cha'aye Aỹem do'onataxanot. Qaq 'era da ỹa'aqtac Aỹem Nataxala'. 21Qaq que'eca, na'a'q, Aỹem so'ot qome da nquiguec da la'añaxac na nhuo' Israel le'ecpi, nache 'am Ezequiel, 'am huesochiguiñi qom 'autaqtacot namayepi. Qaq huaña qome nache namayepi ỹaỹaten da Aỹem nachaỹem Nataxala'.»
