1Qaq huaña nache aỹem 'enapega, 'eeta': «'Am shiỹaxaua, qollec ana'ana nere, qaq da ime nache 'anqo'ona da 'aua'aqtaxanem na nhuo' Israel le'ecpi.» 2Qaq aỹem sauachigui na aỹap nache aỹem iquia'axanec asa'aso nere, 3huaña nache aỹem 'enapega, 'eeta': «'Auoxonañi ana'ana nere maye 'am sanem, nache 'anlaxatchigui qome ana 'ara'am anamaye.» Nache aỹem sachec nache ñanomteguet da ỹataqta ama 'eeta'am na dapic lli'i. 4Qaq ime, nache qaltaq aỹem 'enapega, 'eeta': «'Asoma 'aua'aqtaxanem na nhuo' Israel le'ecpi, dam ỹa'aqtac maye sanem namayepi. 5Aỹem saishet da 'am samaxa ca nhuo' le'ecpi maye ỹoxosa'alo naua la'aqtaqa, qataq huo'o da lqalai'c da qaỹaỹate'n, nacherata da 'am samaxa na nhuo' Israel le'ecpi. 6Saishet da 'am samaxa ca qalota ỹotta'a't shiỹaxauapi maye ỹoxosa'alo naua la'aqtaqa, huo'otaq huo'o da lqalai'c da ishet da 'auaỹate'n. Qaq da huo'otaq 'am samaxa ctaxa que'eca nhuo' le'ecpi maye 'eetec de'era, nache camayepi ishet da 'am ỹalaxaguet. 7Qalaxaye na Israel le'ecpi saishet da huotaique da 'am ỹalaxaguet, cha'aye namayepi saishet da Aỹem ỹalaxaguet. 'Enauac na Israel le'ecpi qaramchigui qataq sana'axaỹaxan. 8Qalaxaye Aỹem, 'am so'otec qome da sa 'ana'axaỹaxan, qataq 'am qaramchigui qoneta'am namayepi. 9Aỹem 'am so'otec qome da ỹataqta 'am qaramchigui qoneta'am na diamante, maye napacalec na coma' da qaramta, saishet qome da 'añe'eỹa namayepi, qataq saishet da 'am icolanaqchet da lasheguiỹaxac na'aictaxa da ỹataqta chaqaic.» 10Qaq ime, nache qaltaq aỹem 'enapega, 'eeta': «'Ana'axaỹaxaachigui 'enauac nam 'am sa'axatem, ime nache 'aỹa'anaigui ye 'antoonaxac. 11Nache qojec qome, da 'anqo'ona ye 'arhuo' le'ecpi maye hueta'a ye ỹaqa'a 'alhua, saiuena'a da 'am ỹalaxaguet huo'otaq saishet, da qonapega da qoneta': 'Era da la'aqtac Ñim Nataxala'.» 12Qaq huaña nache da la'añaxac Ñim Nataxala' aỹem nachaalataxaañi, nache chemaxague na ilaq so lta'araic nllimiaxa 'eeta'am da l-lamaxa na 'alhua da qalagoxoñi, co'ollaq ca'ai ye hueta'a da llo'oxoyec Ñim Nataxala'. 13Qaq se'eso nlamaxa nache l-lamaxa naua laua't se'esoua huo'o da lca'alaqa' souaxat da ivira'a't, qataq soua saxannal maye nnaictagueto soomaye, qaq da l-lamaxa qalaq 'eeta'am da l-lamaxa ca qalagoxoñi 'alhua. 14Qaq huaña nache da la'añaxac Ñim Nataxala' aỹem nachaalataxaañi, nache aỹem nqateeguesop yemaye, qaq aỹem ashec qalaxaye ỹataqta saquico, qataq qaica ca ỹamaic, qaq Ñim Nataxala' nache queto'ot da aỹem nllechiguiñi na lhuaq. 15Qaq 'era da 'eetec da sevira'a ye Tel Abib maye hueto'ot na loigue so tala Quebar, yem hueta'a so Israel le'ecpi maye ncoñeteguishecpi, nache ivittrec soua siete na'axa'te da soota'aguet somayepi, qaq sasaỹaten ca sheetec qataq ca ỹa'aqtac.
Ñim Nataxala' ỹanagui da 'eeta'am ca nauanaxanaxanec so Ezequiel
16Qaq so mashe inoxoore'c soua siete na'axa'te, nache Ñim Nataxala' aỹem 'enapega, 'eeta': 17«'Am shiỹaxaua, Aỹem 'am sanagui da 'am lauanaxanaxanec na nhuo' Israel le'ecpi. Qaq da ivita da 'am sanem ca ỹa'aqtac nache 'aua'aqtaxanem namayepi da aỹem ỹa'aqtac, yaqto' namayepi ỹaỹaten cam ỹo'ot. 18Qaq da huo'otaq aỹem sa'aqtaxanem cam qauemaic da camaye taỹa'aguet da l-leuaxa, qaq 'am da saishet da 'aua'aqtaxanem que'eca qauemaic, qataq da sa qonapega da ỹaxanec da qauem lataxac da yaqto' nache nca'altauec, nache camaye ileu souaxat ca lasouaxashet, qalaxaye 'am 'aupa'aiguet da 'arasouaxashet da l-leuaxa camaye. 19Qalaxaye 'am da 'aua'aqtaxanem ca qauemaic, qaq camaye da huo'otaq saishet da ỹaxaañi nam qauem, qataq dam qauem lataxac, nache camaye ileu souaxat ca lasouaxashet, qalaxaye 'am 'anca'alec. 20Qaq nataqa'en ishet da huo'otaq huo'o ca ỹale no'on da lataxac da ỹaxaañi da no'on lataxac nache ỹo'ot na qauem, qataq da sa'aqta'a da huañi, qaq 'am da huo'otaq sa 'aua'aqtaxanem camaye, nache camaye ileu. Qaq Aỹem saishet da shectega nam no'on maye ỹo'ot, nache camaye ileu souaxat na lasouaxashetpi, qalaxaye 'am 'aupa'aiguet da 'arasouaxashet da l-leuaxa camaye. 21Qalaxaye 'am da 'aua'aqtaxanem que'eca ỹale da yaqto' saishet da ỹo'ot ca lasouaxashet, qaq camaye da saishet da ỹo'ot ca lasouaxashet, nache camaye queta da nca'altauec, souaxat da ỹalaxaguet da 'arvitaqtaxanaxac, qaq 'am nataqa'en 'anca'alec.»
So Ezequiel qaicaua naua la'aqtaqa
22Nache Ñim Nataxala' aỹem ỹashel-lec, nache aỹem 'enapega, 'eeta': «Qoñesheguem nache 'anqo'ona ye nalochiguiñi 'alhua nache huaña yemaye da 'am setaxaỹapegue'.» 23Nache aỹem soosheguem nache ñeqo'ona ye nalochiguiñi 'alhua, qaq nache huaña yemaye da sauaachigui da llo'oxoyec Ñim Nataxala', 'eeta'am da 'eetec so sela'a co'ollaq huaña ye loigue so tala Quebar, qaq huaña nache sa'alyiñi naua illecte nache seviraxata'aguet na ỹatap na 'alhua, 24qalaxaye so la'añaxac Ñim Nataxala' taigui aỹem, nache aỹem nachalataxaañi. Qaq huaña nache Ñim Nataxala' aỹem 'enapega, 'eeta': 'Asoma, 'anqo'oneua'a ñi 'arma' nache 'anapola't. 25Qaq 'auaỹateeta qome da qaỹo'ot ca 'arquet da 'am qaicoñerai', nache saishet qome da 'aunoxonec da 'aualectaigui na shiỹaxauapi. 26Qaq nataqa'en so'ot qome da ñi 'arachaxat lapaxaguet na 'anaquiaq, nache qaicaua naua 'ara'aqtaqa. Nache sa 'aushet qome da 'anhuogaxa namayepi, na'aictaxa da sa ỹalaq ne'ena nhuo' le'ecpi. 27Qalaxaye da huo'o ca 'am sanem ỹa'aqtac nache 'am she'eguelaxatema naua 'ara'aqtaqa, qaq huaña qome nache qonapec: «'Era da la'aqtac Ñim Nataxala'». Qaq cam huotaique da na'axaỹaxan qalaq no'on da na'axaỹaxan, qalaxaye cam saishet da na'axaỹaxan qalaq no'on da saishet da na'axaỹaxan. Cha'aye ne'ena nhuo' le'ecpi ỹataqta sa ỹalaq.
