Qaỹa'axata'a dam talec qome aye qasoxonaxapi ye Israel
1Qaq 'am shiỹaxaua, 'aua'axata'a dam talec qome aye qasoxonaxapi ye Israel, nache qonapega da na'axaỹaxanalo naua ỹa'aqtaqa. 2Aỹem Nataxala', shenapec: Na mpa'aguenaxauapi ye Israel, ipettega da mashe lalamaqtepi aye qasoxonaxapi maye chochaq tatec. 3Qaq ỹoqo'oye 'aua'axata'a qome dam talec yemayepi, qoneta': Da la'aqtac Ñim Nataxala', 'eeta': Chegoqteugalo nam qami' iloquiaxa'n, qataq qami' ilaxachiguilo, qataq 'enauac na chegaqauec shiỹaxauapi, da qami' loxonqa, qataq na shiỹaxauapi qami' ỹe'e'n, qataq qami' deqaigalo. 4Qaq ỹoqo'oye qami' qasoxonaxapi ye Israel, ñaq qana'axaỹaxañiỹa da la'aqtac Ñim Nataxala' maye talec aye qasoxonaxapi, qataq aye lcomaraxalatepi, qataq ye talapi, qataq ye ca'ameguepi, qataq ye nlachiguiñi maye qaica ca netalec, qataq ye huaqta'a't nỹecpi maye toolecpi ye Israel, maye nhuotta co'ollaxa so shiỹaxauapi maye lauoreuapi, qataq ne'eetapigui co'ollaxa somayepi.
5Da la'aqtac Ñim Nataxala', 'eeta': Naua ỹa'aqtaqa 'ettaiguilo souaxat da ỹayeloxo da sataỹa'aguet na laỹepi shiỹaxauapi, qalaxaye ỹactec da salamaqchigui 'enauac ye Edom, cha'aye yemayepi lta'araic co'ollaxa da ntonaxac co'ollaq ỹauo'o lalamaxat ye ña'alhua, qataq lta'araic da le'enaxanaxac co'ollaq deuotaxanec ye no'onaxapi maye hueta'a yemaye.
6Qaq ỹoqo'oye 'aua'axata'a dam talec qome ye 'alhua ye Israel, nache qoneta': Da la'aqtac Ñim Nataxala' maye taalec aye qasoxonaxapi, qataq aye lcomaraxalatepi, qataq ye talapi qataq ye ca'ameguepi, 'eeta': Aỹem huo'oi naua ỹa'aqtaqa maye huaiguilo da inogoxonaxac, qataq da ỹayeloxo, souaxat da qansheunaguiqui maye qanque'etaxañiigui, maye qami' ỹo'oteque na ỹotta'a't shiỹaxauapi maye chegaqauecpi. 7Qaq ỹoqo'oye Aỹem Nataxala', maiche ñañan da san da ỹa'aqtac, da ne'ena nhuo' le'ecpi maye qareuoreuaipi, namayepi nlaqchigui qome da la'agaxa. 8Qalaxaye qami' qasoxonaxapi ye Israel qami' nlaqaaleguete qome ana late'erai qo'oipaqpi, qataq qalota qome ana ala, da yaqto' lalamaqte na ỹalamaxat nhuo' Israel le'ecpi, maye mashe yaqta'a da ñe'eguelaq. 9Qaq Aỹem ñepaxattalec qome qataq so'ot da qana'atsheguem qataq qoỹanaxaalec. 10Qataq so'ot qome da nquictauec na nhuo' Israel le'ecpi qom netaña yemaye. Na huaqta'a't nỹecpi qalaq nlaqchigui qome na shiỹaxauapi, qataq qano'oxoosheguem nam dolagui co'ollaxa. 11Qataq so'ot da nquictauec da qoñeeta na ỹalleppi, qataq na shiguiỹacpi, nache ỹataqta qalota qome. Qaq ỹataqta qalota qome na hueta'a, 'eeta'am so hua'au co'ollaxa, qaq qami' ỹactec qome da qauaỹamqaichiguiñi saishet da 'eeta'am so hua'auchiguiñi co'ollaxa. Qaq huaña qome nache qauaỹachiñi da Aỹem nachaỹem Nataxala'. 12Qaq Aỹem so'ot qome da na ỹalamaxat nhuo' le'ecpi, qami' queuotegueleguete, qami' qasoxonaxapi na Israel, nache yemayepi qome qami' naleguete da qami' lalamaqtepi, nache qami' saishet qome da qavi'eguelaxachiỹa da qaica qanqa'eñi ca llalaqpi.
13«Qaq Aỹem Nataxala', shenapec: Qami' qasoxonaxapi, qami' qanmaqtegueleguete naxa da qollequiitac na shiỹaxauapi, qataq qaica qanqa'eñi ca llalaqpi na nhuo' maye qami' netaleguete. 14Qalaxaye qami' saishet qome da qavi'eguelaqaỹa da qollequiitac na shiỹaxauapi, qataq da qaica qanqa'eñi ca llalaqpi na nhuo' maye qami' netaleguete. Qaq 'era da ỹa'aqtac Aỹem Nataxala'. 15Qataq saishet qome da qaltaq qaua'aqaitega ca lsheunaxanaxac na ỹotta'a't shiỹaxauapi maye chegaqauec, qataq saishet da qami' denotegalo ne'ena nhuo' le'ecpi, cha'aye qami' saishet da ỹe'eguelaxa da qaica qanqa'eñi ca llalaqpi na nhuo' maye qami' netaleguete. Qaq 'era da ỹa'aqtac Aỹem Nataxala'.»
16Ñim Nataxala' aỹem 'enapega, nache 'eeta': 17«Na Israel le'ecpi co'ollaq hueta'a ye lalamaxat na'alhua, nache ỹataqta ishepaxanaqchet souaxat nam qauem maye ỹo'ot namayepi. Da lataxac co'ollaxa namayepi, damaye ỹataqta nshepaxan ñaqa'en qataq seqaiga. 18Qaq ỹoqo'oye sematalec co'ollaxa da ỹayeloxo namayepi, souaxat da lalaataxanaxac maye ỹo'ot da huaña yi'iye 'alhua, qataq da 'eetec co'ollaxa da nshepaxanaqchet yemaye, souaxat da ỹo'oxoreetac na nqolacpi. 19Qaq ỹoqo'oye sauo'o da nhuaxanaguec souaxat nam qauem maye ỹo'otpi, nache lagoigui ñaqa'en na ỹotta'a't shiỹaxauapi, qataq 'enauac na 'alhuapi. 20Qaq co'ollaq ivita na ỹotta'a't shiỹaxauapi maye qaỹauega co'ollaxa, nache namayepi ishepaxanaqchet da qui'itta ỹe'enaxat, cha'aye nam shiỹaxauapi maye ỹalectaigui 'enapec naxa: Ne'ena nhuo' le'ecpi namayepi maiche lalamaxat Ñim Nataxala', qalaxaye chaq ¿ta'ainco' da ỹalat ye na'alhua? 21Qaq ỹoqo'oye huo'o co'ollaxa da ñequi'ic da sela'a da lasouaxashet na Israel le'ecpi, da 'enauac na ỹotta'a't shiỹaxauapi maye ivira'a namayepi, nshepaxanaqchet da qui'itta ỹe'enaxat.
22Qaq ỹoqo'oye qonapega qome na nhuo' Israel le'ecpi, qoneta': Da la'aqtac Ñim Nataxala', 'eeta': Dam so'ot qome saishet da souaxat da qoñeeta qami' Israel le'ecpi, maye souaxat dam qui'itta ỹe'enaxat, maye qami' qanshepaxanaqcheche co'ollaq qaviyiỹa na ỹotta'a't shiỹaxauapi. 23Aỹem sachaxana na ỹotta'a't shiỹaxauapi da lta'araic qui'itta ỹe'enaxat, maye qami' qanshepaxanaqcheche co'ollaq qaualliquiitaigui namayepi, qaq qom so'ot damaye, nache namayepi ỹaỹaten qome da Aỹem nachaỹem Nataxala'. Qaq 'era da ỹa'aqtac Aỹem Nataxala'. 24Aỹem qami' ñeqateeguesopa qome 'enauac ne'ena ỹotta'a't shiỹaxauapi, qataq nam 'alhuapi, nache qami' llaỹona't qome, nache qami' she'eguelaxatalo yem maiche qana'alhuai. 25Nache qami' seỹoi' qome seỹoxona ca ỹataqta qui'itta 'etaxat, nache seỹouec 'enauac na qarshepaxanaqai, qataq seỹouec da qavio'oxoreñiitac na nqolacpi, 26nache qami' sanaiguilo aca dalaxai nquiyaqte, qataq ca dalaxaic saqcha'a nca'alaxa. Nache ñeqateeguesopa qami' ana nquiyaqtepi maye ỹataqta qaramchigui 'eeta'am ca coma', nache qami' sanaiguilo aca nquiyaqte maye ỹataqta huesota. 27Qami' sanaiguilo qome so Saqcha'a Ỹa'añaxac, nache so'ot da qaupaquiitelec qome na iqataxacpi, qataq na ỹamaxasoxonaxacpi, 28qataq qoñiỹalec qome yem 'alhua maye sanem co'ollaxa so hua'au qarta'ailpi, qaq qami' nhuo' qami' ỹalamaqa'ate qome, qaq Aỹem nachaỹem Qanatamnaxala'ai. 29Qataq seỹouec qome 'enauac na qarshepaxanaqai, qataq so'ot qome da qalota na trigo, nache saishet da qaltaq qami' ñamaxalo ca nqouaxa. 30Qataq nataqa'en so'ot qome da ana qo'oipaqpi, qataq na no'onaxapi ỹataqta qalota aca ala, yaqto' qami' saishet da ỹe'eguelaxa da qami' nlaqchiguilo da qara'agaqai da qaualliquiitaigui na laỹepi shiỹaxauapi souaxat na qarqouaqai. 31Qaq qom qauennache dam qauem qarataxaqui co'ollaxa, qataq nam qauem maye qauo'oche, nache maiche qami' pa'aỹo'oto qome da huo'o da qara'agaqai, souaxat nam qarasouaxashechi, qataq nam qauem maye qauo'oche co'ollaxa. 32Aỹem Nataxala', shenapec: Qami' Israel le'ecpi, qauaỹaañita da saishet da so'ot de'era souaxat qami', nacherata da so'ot damaye yaqto' qami' ishet da huo'o da qara'agaqai, souaxat da qauem qarataxaqui.
33Aỹem Nataxala', shenapec: Qom seỹouec 'enauac na qarasouaxashechi, nache so'ot qome da qoñeetaigui nam maiche qaralamaxache huaqta'a't nỹecpi maye ỹotta'a't naua nañalo, qataq nam qailaxachigui co'ollaxa qaltaq qano'oxoñiisheguem qome. 34Qaq nam 'alhua maye toolec co'ollaxa, qalaq saishet qome da queta da toolec, nacherata da qoỹanaxaalec qome, nache imeteetac nam nlectot namaye, 35nache 'enapec qome: Ne'ena 'alhua nam toolec co'ollaxa, nagui qalaq 'eeta'am so nanaxanaqa' maye huaña co'ollaxa ye Edén, qaq na huaqta'a't nỹecpi maye ỹotta'a't naua nañalo, maye toolec qataq huetaiya' qataq dolachigui co'ollaxa, qalaq ỹataqta qampaxatteua'a, qataq qanayeetaigui. 36Qaq huaña qome, nache nam qarhuoreuai nhuo' le'ecpi maye ñaq nca'altauec, ỹaỹaten qome da Aỹem Nataxala', maye qaltaq ño'oxoosheguem nam qailaxachigui co'ollaxa, qataq she'eguelaxa da saalec nam toolec co'ollaxa. Qaq 'era da ỹa'aqtac Aỹem Nataxala', qaq damaye ipacchigui qome ñaqa'en.
37Qaq Aỹem Nataxala', shenapec: Nataqa'en huo'o da lỹa so'ot qome. Sanem qome na nhuo' Israel le'ecpi cam iỹaxanaique da so'otec namayepi, qataq ñequigaxatec qome ye lcata na lauo' le'ecpi, 'eeta'am ñaqa'en ana qaguetapi. 38Qataq yem huaqta'a't nỹecpi maye ỹotta'a't naua nañalo maye dolachigui co'ollaxa, nlaxagui qome na qalota shiỹaxauapi, qaq 'eeta'am ana qaguetapi naxa da qaỹauega ye Jerusalén da ivita da huo'o ye naponaxac, da yaqto' qoỹaneuo da nachetaqtaxanaqte qaỹavigaxatta. Qaq huaña nache namayepi ỹaỹaten da Aỹem nachaỹem Nataxala'.»
