Ezequiel 39

₁Qaq 'am shiỹaxaua, 'auachegoxotchigui da ỹe'enaxat da 'aua'axat da 'eetec qome ye Gog, nache qoneta': Da la'aqtac Ñim Nataxala', 'eeta': 'Am Gog maye 'am 'amaqtaqaic lataxala' ye Mesec qataq ye Tubal, Aỹem 'am ñechoxota da 'am ñepa'aguenaxaua. ₂'Am ñe'eguelaxat qome, 'am sachegoxottegue da sheu', da 'auanaỹa da 'auloquiaxan nam netalec ana qasoxonaxapi ye Israel. ₃Qalaxaye huaña qome yemaye nache seuotaxanec na 'archecnec maye huetaigui na 'arhuaq 'ane'emaxashec, qataq seuotaxanec ana 'archecnapi maye huetaigui na 'arhuaq 'oiguishec. ₄Qaq 'am, qataq na 'analleppi, qataq nam shiỹaxauapi maye 'annaictague' qaullivi qome qoviỹalec aye qasoxonaxapi ye Israel. Qaq nache huaña qome yemaye da qami' sanegueta da yaqto' qami' che'c nam ỹotta'a't maỹopi maye chec na lapat, qataq na huauec shiguiỹacpi. ₅Qaq nache qoviitalec qome yem no'onaxa, cha'aye Aỹem ỹa'aqtac. Qaq 'era da ỹa'aqtac Aỹem Nataxala'. ₆Aỹem, ñamaxa qome ca norec ye Magog, qataq yem ỹe'emaqtac maye netalec ye 'alhuapi maye hueto'ot na loigue aso auaxai. Qaq huaña qome nache ỹaỹaten da Aỹem nachaỹem Nataxala'. ₇Aỹem so'ot qome da qaỹauatton da qui'itta ỹe'enaxat da huetangui na laiñi na ỹalamaxat nhuo' Israel le'ecpi, qaq saishet qome da sashen da qanayecto'ot da qaishepaxanaqchettac. Qaq nam chegaqauec ỹotta'a't shiỹaxauapi ỹaỹaten qome da Aỹem Nataxala', sachaxan da qui'itta ỹataxac da sootangui na Israel le'ecpi. ₈Qaq cam na'a'q maye sa'axattac, camaye nvi' qome. Qaq 'era da ỹa'aqtac Aỹem Nataxala'. ₉Qaq nam hueta'a na huaqta'a't nỹecpi maye ỹotta'a't naua nañalo ye Israel, mpa'auec qome, nache ỹavigaxat na lo'ogoxonaxatpi ca npa'aguenaxauapi, qataq ana ỹotta'a't lpaqtaxanaqtepi, qataq na lchecnecpi, qataq ana lchecnapi, qataq ana la'araxanaqtepi, qataq ana lataquiaxaipi, qaq huaña qome nache chochaq huañi na l-le' lashec, da yaqto' ỹo'ot ca l-le' ivittrec caua siete vi'iye. ₁₀Nache saiuen qome da tauga ca no'onaxa da ilaique ca l-le' lashec, qataq da ichec da huetauga na aviaq, cha'aye 'enauac qome que'eca no'ogoxonaxatpi da nacheca ca l-le' lashec. Qaq 'era da 'eetec namayepi qome, da nhuo' nam hua'auñi da nhuo' co'ollaxa namayepi, qataq deuotaxanec nam hueto'ot nam hua'auñi da deuotaxan co'ollaxa. Qaq 'era da ỹa'aqtac Aỹem Nataxala'.

₁₁«Qaq qom nvi' que'eca na'a'q, nache so'ot aca laỹe' ye Gog naña ñaqa'en ye Israel, nache huaña da selayiñi, yem pa'aỹa'ague da yo'oxoñi aso auaxai yem Ca'amegue le'enaxat Queuoxoicpi. Qaq souaxat da ỹapogui som llec nam natapeugueyi, nache qaỹamata'ac qome da le'enaxat Ca'amegue Gamón Gog, cha'aye huaña qome yemaye da qailareñi ye Gog qataq 'enauac ca nalleppi. ₁₂Qaq na Israel le'ecpi iuen qome caua siete ca'agoxoiqa da ilattegueñi ca leuaxaicpi, qataq da yaqto' qui'itta naqa'en yi'iye 'alhua. ₁₃Qaq 'enauac qome na shiỹaxauapi da ỹalegueua'a da qailattegueñi namayepi, qaq que'eca na'a'q nache Aỹem huo'o qome da ỹo'oxoyec. Nache namayepi saishet qome da icoua'ai que'eca na'a'q. Qaq 'era da ỹa'aqtac Aỹem Nataxala'. ₁₄Qaq qom inoxoore'c que'ecaua siete ca'agoxoiqa, nache qaỹauo'oi caua qalca'aua'alo shiỹaxau' da yaqto' coleerelec yi'iye 'alhua da yaqto' ilayiñi cam ñaq mpa'atasheguem na leuaxaicpi, qaq 'era da 'eetec da yaqto' iqui'itaxat yi'iye 'alhua. ₁₅Qaq ca 'oonolec que'ecaua shiỹaxau', da mashe coleerelec yi'iye 'alhua, nache da huo'o ca ilalec shiỹaxaua lpi'inec, nache ỹauo'o aca la'anaqte da ỹanaua'a na laỹe camaye, choche ivitta'a da nvi' cam ilattegueñi na leuaxaicpi, nache ilayiña camaye ye Ca'amegue le'enaxat Gamón Gog. ₁₆Qaq 'era da 'eetec da iqui'itaxat namayepi yi'iye 'alhua, qaq ca huaqta'a't nỹecpi le'enaxat qome da Hamona.»

₁₇Qaq Ñim Nataxala' aỹem 'enapega, nache, 'eeta': «Qonapega 'enauac na maỹopi, qataq 'enauac nam huauec shiguiỹacpi da chegoqteugalo da laỹona't, nache naỹa aye qasoxonaxapi ye israel, da ỹalectaua'a ca savigaxat qome da hualec ayemayepi da sanem namayepi. Qaq huaña nache chec qome ca lapat qataq nỹomgui ca ntago'q, ₁₈chec qome na lapat ca alleppi, qataq nỹomgui na ltago'q ca nta'alpi ana 'alhua, 'eeta'am naqa'en ca qagueta lhuaraicpi, qataq qagueta llalaqpi, huo'otaq ca quetaqpi, huo'otaq ca chaxarai huaca llalec maye qaỹachegoxota'a ye Basán. ₁₉Qaq que'eca savigaxatpi maye so'ot qome da yaqto' sanem namayepi, chec qome ca lcheta camayepi nache ivitta'a da ỹaỹemec, qataq nỹomgui ca ltago'q camayepi nache ivitta'a da taxaicpi. ₂₀Qaq so'ot qome ca lquia'axac, da yaqto' sequiaxanec na lapat ca caipi, qataq ca shiỹaxauapi maye nnotaxala' na caipi, qataq ca alleppi, qataq ca ỹotta'a't alaataxaicpi. Qaq 'era da ỹa'aqtac Aỹem Nataxala'.

₂₁Aỹem sachaxana qome da ỹo'oxoyec na ỹotta'a't shiỹaxauapi. Qaq 'enauac qome na laỹepi ỹotta'a't shiỹaxauapi ỹauaachigui da 'eetec da ñimit qataq da sauo'o ca nhuaxanaguec. ₂₂Qaq nache chegoqchiguiña qome que'eca na'a'q da na Israel le'ecpi, ỹaỹaten da Aỹem nachaỹem Nataxala' maye Natamnaxala'. ₂₃Qataq na ỹotta'a't shiỹaxauapi ana 'alhua ỹaỹaten qome da na Israel le'ecpi, qaỹauega co'ollaxa ye ỹaqa'a 'alhua souaxat na lasouaxashetpi, cha'aye Aỹem saỹalaxaguet co'ollaxa, qataq saneguet na ilaq nache saxaỹa'a da na mpa'aguenaxauapi loxonec namayepi, nache 'enauac da ỹalauat huaigui so alaataxac. ₂₄Aỹem saneguet nam naiguipi dam nshepaxan lataxac, qataq da saỹalaq, nache saneguet na ilaq.»

₂₅Qaq ỹoqo'oye Aỹem Nataxala', shenapec: «Aỹem nagui sechoxoren 'enauac na nhuo' Israel le'ecpi, nam chegoxoguetpi so Jacob. Aỹem ñaralaxat qome da na'achecỹaxac, da yaqto' samaxalec da ỹo'oxoren da qui'itta ỹe'enaxat. ₂₆Qaq qom ỹe'emaqtac da hueta'a ye maiche na'alhua, qataq qom qaica ca saỹalemaxat namayepi, nache huo'o qome da la'agaxa souaxat 'enauac nam qauem maye ỹo'otpi, qataq souaxat da Aỹem hueto'ot da lasouaxashet. ₂₇Qaq qom llaỹona't qataq so'ot da ca'ai nam na'alhuapi na mpa'aguenaxauapi, ỹauaachigui ñaqa'en na ỹotta'a't shiỹaxauapi qataq chegoqchigui qome namayepi da sachaxan da qui'itta ỹataxac, ₂₈huaña nache ỹaỹaten da Aỹem Nataxala' maye Natamnaxala', maye so'ot co'ollaxa da qaỹauega namayepi na ỹotta'a't shiỹaxauapi, qalaxaye co'ollaq ime nache qaltaq she'eguelaxa da llaỹona't da sanalec ye maiche na'alhua nache qaica co'ollaxa ca ño'onaxatañi. ₂₉Nache saishet qome da qaltaq saneguet na ilaq, cha'aye mashe secorelec da ỹa'añaxac na nhuo' Israel le'ecpi. Qaq 'era da ỹa'aqtac Aỹem nataxala'.»