Ezequiel 45

₁Qom ivita da qancolaxachiigui na 'alhua da yaqto' ñi 'oonolec na nhuo' le'ecpi taỹot cam lalamaxat, nache iuen da qauỹochiỹauga ca 'alhua maye ivi' doce kilómetros y medio ye lalogaxa, qataq diez ye lcateueegue, da yaqto' lalamaxat qanqa'eñi Ñim Nataxala'. Qaq 'enauac qome que'eca 'alhua da saqaishetapec. ₂Nache huaigui qome que'eca 'alhua da qaiỹotauga cam lalamaxat lma' aca atamnaxaqui, qaq camaye ivi' doscientos cincuenta metros naua cuatro laỹel, qaq naua laỹel que'eca 'alhua nache qui'itteleguete qome qanqa'en ca veinticinco metros ye lcateueegue. ₃Qaq cam qaiỹotauga da lalamaxat Ñim Nataxala' nache huaigui qome da qaỹa'an ca 'alhua, maye ivi' doce kilómetros y medio ye lalogaxa, qataq cinco ye lcateueegue, qaq camaye nache naña qome aca atamnaxaqui, nache camaye ỹataqta saqaishetapec qome. ₄Qaq que'eca 'alhua, nache lalamaxat qome ca ntaxaỹaxanaxanecpi maye ilotague' aca atamnaxaqui maye lalamaqte Ñim Nataxala', maye ishet da nquigueua'a da do'onataxanot Ñim Nataxala'. Qataq nache naña qome camaye ca lma'pi. Qaq camaye saqaishetapec, cha'aye lma' aca atamnaxaqui. ₅Qaq nataqa'en huo'o qome ca lỹa 'alhua, maye ivi' doce kilómetros y medio ye lalogaxa, qataq cinco ye lcateueegue, cam qaiỹotauga qome da yaqto' lalamaxat na leviitapi maye huetague' aca atamnaxaqui, da yaqto' ishet da huo'o ca huaqta'a't nỹecpi da lalamaxat lma'. ₆Qaq cam 'alhua maye qoỹanalec qome ca huaqta'a't nỹecpi, cam huaqta'ai' cam naña aca atamnaxaqui, camaye ivi' qome doce kilómetros y medio ye lalogaxa, qataq dos y medio ye lcateueegue. Qaq que'eca 'alhua nache lalamaxat qome 'enauac na Israel le'ecpi.

₇Qaq nataqa'en huo'o qome ca 'alhua nqataxanatac da lalamaxat ca nta'a. Huo'o qome ca pa'aigue da nala' lliguisheguem, qaq ca lỹa qalaq pa'aigue da nala' lliguiñi, qaq damaye 'eeta', ca 'oonolec laỹe qataq ca lỹa laỹe qalaq huaqta'ai' cam 'alhua maye lma' aca atamnaxaqui, qataq cam nqataxanatac maye lma' ca huaqta'a't nỹecpi. Cam pa'aigue da nala' lliguisheguem, qataq cam pa'aigue da nala' lliguiñi, caamaye nache 'eeta'ama qome ye lalogaqa', cam 'alhua maye lalamaxat ca 'oonolec na nhuo' le'ecpi. ₈Qaq que'eca 'alhua nache lalamaxat qome ca lta'a na Israel le'ecpi, yaqto' na nta'alpi saishet qome da ỹe'eguelaxa da deuotaxanec ca na'alhua na ỹalamaxat nhuo' le'ecpi, nacherata da hua'aqta'a qome nam chegoxoguet so Israel da netalec na 'alhua.

₉Aỹem Nataxala' shenapec: ¡Nache tachiguiña qome qami' nta'alpi na Israel! ¡Saishet qome da qoquiito'ot da qaica ca qaureñi, qataq da qarhuotaxanaxaqui! ¡Qauo'onataxañiỹa qome da nalochiguiñi, qataq da ỹaỹamaqchiguiñi lataxac! ¡Qaỹa'axañiiñi da qaucacheetega na na'alhua na ỹalamaxat nhuo' le'ecpi! Qaq 'era da ỹamaxasoxonaxac, Aỹem Nataxala'. ₁₀Qauo'ogoxoñiỹa qome 'enauac ana naloqnaxanaxaquipi, qataq ana naloqnaxanaqtepi maye sanpe'en da huo'o ye naloqten. ₁₁Aca naloqnaxanaqte da qanaloqten ca nañiguishec ala, qalaq iuen da 'eeta'am aca naloqnaxanaxaqui da qanaloqten ca chañi. Aca naloqnaxanaxaqui homer maye ivi' doscientos veinte litros, qaq nachaca qome aca qailo'oguet da huo'o ca qanaloqten, qaq aca naloqnaxanaxaqui bato qalaq ivi' veintidós litros, qaq aca 'oonole efa maye naloqnaxaqui na nañiguishec ala, qalaq nataqa'en ivi' veintidós litros. ₁₂Qaq nache 'eeta'am nataqa'en da huo'o ca qanaloten ye lsallaxa: Ca siclo qalaq ivi' diez gramos, qaq ca sesenta siclos maye 'oonole mina qalaq ivi' seiscientos gramos. ₁₃Qaq aca'aca nachetaqtaxanaqtepi maye ishet da qaỹa'añiiuo: Qaucolaxachiigui qome aca ala ca qa'añiguishiqui trigo qataq ca cebada, qaq sesenta ca lapagaxacpi maye 'eeta'a't qanqa'eñi, ime nache 'oonolec lpa'axac ca qaỹa'añiiuo da qarachetaqtaxanaxache. ₁₄Qaq nache 'eeta'am nataqa'en ca aceite maye qami' hueto'oto qome, da qaucolaxachiigui, cien qanqa'eñi qome ca lpa'axac maye 'eeta'a't, ime nache 'oonolec lpa'axac ca qaỹa'añiiuo da qarachetaqtaxanaxache. ₁₅Qaq nataqa'en aca qaguetapi: Aca doscientas qaguetapi qalaq qauacoñiiua'a aca 'oonole maye chegaqaña ca ỹataqta no'on lquia'aqa' maye huaña na Israel. Qaq acamayepi nache huaxaiguet qanqa'eñi ca nañiguishec ala da nachetaqtaxanaxat qaỹavigaxatta, qataq nachetaqtaxanaqte maye ỹa'axat da manaxac, maye qoỹaneuo da yaqto' qaỹapalaxat na nasouaxashetpi. Qaq 'era da ỹamaxasoxonaxac Aỹem Nataxala'. ₁₆Qaq 'enauac na nhuo' le'ecpi maye hueta'a ne'ena 'alhua, ỹaneua'a qome aca'aca lachetaqtaxanaqte ca nta'a na Israel, ₁₇qaq que'eca nta'a, camaye huapegue' qome da ỹan ca shiguiỹacpi da yaqto' nachetaqtaxanaxatpi maye qaỹavigaxatta, qataq aca nachetaqtaxanaqte maye ala na nañiguishec, qataq ca lataxa, da ivita da dalaxaic so ca'agoxoic, qataq yem na'a'q mataxaqui, qataq 'enauac na naponaxacpi na Israel. Qaq nataqa'en ỹaneuo qome aca nachetaqtaxanaqte souaxat ca nasouaxashet, qataq aca nachetaqtaxanaqte ala na nañiguishec, qataq aca nachetaqtaxanaqte qaỹavigaxatta, qataq aca nachetaqtaxanaqte maye ỹa'axat da manaxac, yaqto' ishet da qaỹapalaxat na nasouaxashetpi na Israel.

₁₈Aỹem Nataxala' shenapec: ca la'auaxanec na'a'q, ca la'auaxanec ca'agoxoic, nache qami' iuen da qaỹa'añeeuo ca huaca llalec, maye qaica ca lque'emaxa da qarachetaqtaxanaxache, da yaqto' qaiỹouec na nasouaxashetpi da huaña añi atamnaxaqui. ₁₉Ca ntaxaỹaxanaxanec ỹacona qome ca laỹe ca ltago'q que'eca shiguiỹac, maye qoỹaneuo da nachetaqtaxanaxat souaxat ca nasouaxashet, nache ỹa'ame'n naua lauoqtel ca lasom aca atamnaxaqui, qataq naua cuatro lamaqail aca nca'atoxonaxalate, qataq caua lauoqtel ca lasom maye naña ca pa'aỹauo qasoxoc. ₂₀Qaq 'eeta'am qanqa'en ca qaỹo'ot, da ivireuga ca na'a'q siete ye 'oonolec ca'agoxoic, da talec qanqa'en da nqouagaxa ca camachaqca maye huo'o ca ỹasouaxat maye ilamaxatalec, huo'otaq saishet da noma. Qaq 'era da 'eetec da qaiỹo aca atamnaxaqui. ₂₁Qaq ca na'a'q catorce ca la'auaxanec ca'agoxoic, nache qauachegoxocheechiguiña qome da qauo'oche ca qaraponaxaqui Lapascua, nache ivittre'c qome caua siete na'axa'te da qollequiitac aca nauole 'ayiiña maye qaca aca lalecte maye ỹasheeraxachigui. ₂₂Que'eca na'a'q nache ca nta'a, ỹaneuo qome ca 'oonolec huaca llalec da lachetaqtaxanaxat souaxat na lasouaxashetpi, qataq nam lasouaxashetpi 'enauac na nhuo' le'ecpi, ₂₃qaq ye 'oonolec na'a'q, que'ecaua siete na'axa'te maye huaiguilo que'eca naponaxac, nache ỹaareuo qome da lachetaqtaxanaxat qaỹavigaxatta da ỹanot Ñim Nataxala' caua siete huaca llalqa, qataq siete qagueta lhuaraiqa, qaq camayepi 'enauac qome qaica ca lque'emaxa. Qaq nataqa'en ye 'oonolec na'a'q, nache ỹaneuo ca 'oonolec quetaq lhuaraic da yaqto' qaỹapalaxat na nasouaxashetpi. ₂₄Qaq ñi 'oonolec huaca llalec, qataq ñi 'oonolec qagueta lhuaraic, nache qaỹauaxaỹaxaneguet qome ca veinte litros ala na nañiguishec, qataq tres litros y medio ca aceite.

₂₅Qaq nataqa'en ca naponaxac da qanayenaigui na Ña'axaquipi, maye qaỹo'ot naxa da ivireuga ye na'a'q quince ye ca'agoxoic siete, nache ivittre'c caua siete na'axa'te da ca nta'a ỹaategueuo ca nachetaqtaxanaxat da yaqto' qaỹapalaxat ca nasouaxashet, qataq 'eeta'a't naqa'en ye lcata ca ỹavigaxat shiguiỹacpi, qataq 'eeta'am naqa'en ye lcata aca nañiguishec ala, qataq ca aceite.