So 'etaxat maye mpaxaatauec chegoqtapoigui aso atamnaxaqui
1Qaq se'eso shiỹaxaua qaltaq aỹem ỹe'eguelaxata so ñegueuo aso atamnaxaqui. Qaq huaña nache sela'a da na pa'aguiñi so lasom, chegoqtapoigui so mpaxaatauec 'etaxat, qaq somaye taỹa'ague da pa'aỹa'ague da taguiñi, dam datata'ague aso atamnaxaqui. Qaq se'eso 'etaxat nache queto'ot na pa'aguiñi maye pa'aỹa'ague da aloic aso atamnaxaqui, dam pa'aigue da taguiñi aso nca'atoxonaxalate. 2Qaq ime nache se'eso shiỹaxaua aỹem ipa'axanec, sacheviigui naqa'en so lasom maye pa'aỹa'ague da sheu', nache aỹem iconnaxaalec so pa'auec, nache aỹem ỹauega so ñegueuo maye pa'aỹa'ague da nala' lliguisheguem. Nache sela'a so 'etaxat mpaxaatauec chegoqtapoigui so ñegueuo maye pa'aỹa'ague da taguiñi. 3Qaq se'eso shiỹaxaua inoxonec, nache taigue da pa'aigue da nala' lliguisheguem nasoqta'a so naloqnaxanaxat, nache naloqten so quinientos metros, ime nache aỹem 'enapega da sa'axasoxongui som ỹa'auattac 'etaxat, qaq se'eso 'etaxat ivirasheguemalo naua ñeqonacamo. 4Ime qaltaq naloqten so lỹa quinientos metros, nache qaltaq aỹem 'enapega da sa'axasoxongui som ỹa'auattac 'etaxat, qaq se'eso 'etaxat ivirasheguemalo naua illecte. Ime qaltaq naloqten so lỹa quinientos metros, nache qaltaq aỹem 'enapega da sa'axasoxongui se'eso 'etaxat maye ỹa'auattac, nache se'eso 'etaxat ivirasheguema na ỹasot. 5Ime qaltaq naloqten so lỹa quinientos metros, nache se'eso 'etaxat maye ỹa'auattac mashe 'eeta'am ca tala, nache sa seshet da sa'axasoxoolec. Cha'aye se'eso 'etaxat 'eeta'am ca tala maye ỹataqta qaỹoqchiguingui maye nacherata da qaỹauota'a naloxonaxac da qaỹa'axasoxongui. 6Qaq huaña nache se'eso shiỹaxaua aỹem 'enapega, 'eeta': Ña 'aumeeteta qome ne'ena maye 'auauaachigui. Qaq ime, nache aỹem ỹe'eguelaxat, shectot naqa'en so loigue so tala, 7nache sela'alo soua dos loiguiye da huo'o aso ỹataqta qalota qo'oipaqpi. 8Qaq huaña nache aỹem 'enapega, 'eeta': Ne'ena 'etaxat jec ta'aỹa'ague da nala' lliguisheguem, nache iviraxaama so Jordán, qataq nache iviraxaama qome aso Auaxai Leuaxai. Qaq qom iviraxaama asomaye nache na 'etaxat ỹe'eguelaxa da ama. 9Qaq camachaqca ca ivira'a qome ne'ena la'auaxac, nache nca'alec naqa'en na ỹotta'a't shiguiỹacpi, qataq ca qalota nỹaqpi. Cha'aye ne'ena 'etaxat ỹe'eguelaxata qome da ama ca 'etaxat maye ñe'eua, qaq 'enauac qome na huetangui ne'ena 'etaxat huo'o da lca'alaxa. 10Qaq chegoqchiguiña ye Engadí nache ivira ye Eneglayin da huo'o qome ca ya'acoxoicpi, qataq nache huaña yemaye da iqaxaỹaxat na laleguecpi. Qaq yemaye nache huaña na ỹataqta qalota qataq ỹotta'a't nỹaqpi, 'eeta'am na nỹaqpi maye huetangui aso auaxai Mediterráneo. 11Qalaxaye na qa'aimpi qataq na lacalecpi, qalaq saishet qome da ama na 'etaxat, nacherata da ñi'iua na 'etaxat, qataq taiguet da qaỹachegoxotangui na toue. 12Qaq naua dos loiguiye so tala qalaq ñaxaalec qome ana ỹotta'a't qo'oipaqpi maye huo'o ana ala. Qaq ana laue qalaq saishet qome da naañi, qataq saishet da vi'iiguet ana ala. Qataq nacheye ye 'oonolec ca'agoxoic da huo'o ana ala, cha'aye icottalec qome na 'etaxat maye chegoqtegueua'a añi atamnaxaqui. Qaq ana ala qalaq ishet qome da qanallec, qaq ana laue qalaq natannaxanaqte.
Naua loga'te ye 'alhua ye Israel
13Aỹem Nataxala', shenapec: 'Ena na loga'tpi na 'alhuapi maye ỹaconeguet qome da yaqto' lalamaxat lma' naua doce maye chegoxogueta so Israel, qaq ca chegoxoguet so José, qalaq ỹactec qome ca talec 'alhua. 14Aỹem maiche ñañan co'ollaxa da san so ỹa'aqtac da sanem da yaqto' lalamaxat ne'ena 'alhua so hua'au qarta'ailpi. Qaq qancolaxachiigui qome namaye, qalaxaye nache 'eeta'a't qanqa'eñi ca talec ca 'oonolec. Cha'aye ne'ena 'alhua, namaye maiche qaralamaxache qome.
15Da pa'aỹa'ague da sheu', qalaq chegoqchiguiña qome aso auaxai Mediterráneo, nache taalec ye huaqta'a't nỹecpi ye Jetlón, qataq ye huaqta'a't nỹecpi ye Sedad, 16ye Berotá qataq ye Siberayin yem huetanguilo na laiñi yeua 'alhua Damasco qataq ye Hamat, qataq ye Jasar Haticón, maye ỹa'atteguet ye loga't ye 'alhua Jaurán. 17Qaq 'era da 'eetec da ye loga't maye pa'aỹa'ague da sheu', chegoqchiguiña aso auaxai Mediterráneo, nache ivira'a ye Jasar Enán, qaq nache pa'aỹa'ague qome da sheu' ye 'alhua Damasco qataq ye Hamat. 18Qaq ye loga't maye pa'aỹa'ague da nala' lliguisheguem, qalaq chegoqchiguiña ye Jaurán qataq ye Damasco, nache ivira'a ye huaqta'a't nỹecpi ye Tamar, maye hueto'ot na loigue aso Auaxai Leuaxai, nactague' so tala Jordán, qaq nache loga't yem 'alhua Galaad qataq ye Israel. 19Qaq yem loga't maye pa'aỹa'ague da taguiñi, qalaq chegoqchiguiña qome ye Tamar, nache nlequeelec yem naña añi lapel ye Meribá Cadés, qataq taalec so la'auaxac ye Egipto, nache ivitta'a aso auaxai Mediterráneo. 20Qaq yem loga't maye pa'aỹa'ague da nala' lliguiñi, qalaq chegoqchiguiña aso asom auaxai Mediterráneo, qataq ye loga't ye Egipto, nache ivira'a ye loigue maye, datatta so ñegueuo ye Hamat. 21Qaq 'ena nam 'alhua maye iuen da ncolaxachigui qome naua doce maye chegoxogueta so Israel. 22Qaq nachena qome nam qami' taỹoto da yaqto' qaralamaxache, qataq nataqa'en cam chegaqauecpi maye qami' ỹalectaiguilo, qataq da huo'o ca llalaqpi cam chegaqauecpi maye qami' netaiguilo. Qaq camayepi iuen da 'eeta'am qanqa'eñi da ỹataqta lañoqo' na Israel. Qom ivita da qancolaxachiigui na 'alhua qami' maye qauachegoqoiguet so Israel, nache nam chegaqauecpi nataqa'en qome huo'o ca taỹot 'alhua. 23Nam chegaqauecpi qalaq nataqa'en taỹot qome ca laỹe cam 'alhua maye netalec cam ñalaqpi maye ỹalectaigui. Qaq 'era da ỹamaxasoxonaxac, Aỹem Nataxala'.
