1Ñim Nataxala' aỹem 'enapega, 'eeta': 2«Ña 'auamata'a qome aye qasoxonaxapi ye Israel, nache 'aua'aqtaxanem qome da ỹa'aqtac 3qoneta': Ñaq qana'axaỹaxañiỹa da la'aqtac Ñim Nataxala' qami' qasoxonaxapi na Israel, qami' lcomaraxalatepi, qami' talapi qataq qami' ca'ameguepi, Aỹem qami' ñamaxalo qome ca alaataxac, da yaqto' ilaxachigui nam qaỹoqotcheguemec atamnaqa'pi maye huaña da qaỹo'oxoren na ỹaqa'a atamnaxala'pi. 4Aỹem selaxachigui qome ana nca'atoxonaxalatepi maye huaña naxa da qaỹa'añiiuo ana qarachetaqtaxanaqchepi qataq da qauavigaxache na qarchenaxanaxache maye ama na laita, qataq so'ot qome da huañi na ỹalleppi, nache ileu hueto'ot na nqolacpi. 5Ime, nache sasaxauec na leuaxaicpi na Israel le'ecpi ỹauaachigui ñaqa'en na lqolacpi namayepi, qataq na lpi'inecpi namayepi secoroto qome naua loiguiye ana lca'atoxonaxalatepi. 6Qaq 'enauac na nma'pi maye qoñiỹalec qome, nache na huaqta'a't nỹecpi dolagui qome, qataq ana nca'atoxonaxalatepi maye huaña naxa da qaỹo'oxoren na ỹaqa'a atamnaxala'pi nlachiguiñi qome. Qaq ana lca'atoxonaxalatepi namayepi qalaq imauec qome da nlachiguiñi, na lqolacpi qalaq dolachigui qome, ana lca'atoxonaxalatepi da yaqto' ỹavigaxat na lchenaxanaxat qalaq hua'axañi qome, qaq 'enauac nam qauo'oche co'ollaxa imeuo qome. 7Qaq qom qauauañiichigui da qalota ca ileu shiỹaxauapi da qami' huanguilo, nache qauaỹachiñiita qome da nachaỹem Nataxala'. 8Qalaxaye da qoñiita so'ot qome da huo'oi caua nca'aleeguesopa da nleuaxa nache queta da nca'altauec, nache laguelec qome na hueta'a nam ỹotta'a't shiỹaxauapi. 9Nache ca lca'alaxaicpi iuennate qome Aỹem da ỹalectaigui que'eca ỹotta'a't shiỹaxauapi, iuennate qome da 'eetec da so'ot da nque'eenaxac souaxat da Aỹem sa ỹalaxaguet qataq souaxat da Aỹem ca'ai da yaqto' ỹo'oxoren na nqolacpi. Namayepi deqaiga qome da maiche lataxac, souaxat nam qauem maye ỹo'otpi, qataq 'enauac nam qaiqaiga maye ỹo'ot co'ollaxa namayepi. 10Qaq huaña qome nache ỹaỹaten da nachaỹem Nataxala', maye sanem co'ollaxa da ỹa'aqtac da ñamaxa ne'ena qauempi, qaq saishet da choche sareetalec.»
11Ñim Nataxala' aỹem 'enapega, 'eeta': «'Anỹen qome, 'auaxaata'a't naua 'arhuaxaye qataq 'auaxaatrañi naua 'arapia'ate, 'ana'alaqtapiguiñi qome da 'anqui'ic souaxat nam qauem qataq nam qaiqaiga maye ỹo'ottac na nhuo' Israel le'ecpi, cha'aye namayepi ileu qome souaxat ca alaataxac, nqouaxa qataq ca nalolaxapi. 12Qaq cam qaỹoqta ca hueta'a nache ilem qome na nalolaxapi, qaq cam saqaỹapeque ca hueta'a qalaq ileuaigui qome ca alaataxac, qaq ca lca'alaxaicpi qome qalaq ilem qome na nqouaxa. Qaq 'era da sheetec qom ñashetcheguem da ỹayeloxo da sataỹa'aguet namayepi. 13Qaq qom qauloỹa'a da lo'ocỹaxac ne'ena shiỹaxauapi da hueto'ot na lqolacpi, qataq naua loiguiye ana nca'atoxonaxalatepi, maye netalec 'enauac ana qaỹoqotcheguemecpi lcomaraxalatepi, qataq na pa'asheguem ana qasoxonaxapi, qataq na la'a' ana qo'oipaqpi maye qalochiguiñi ana lcouepi, qataq na huaña naxa da ỹanot na lchenaxanaxat maye ama na laita na lqolacpi, qaq huaña qome nache qauaỹachiñi da nachaỹem maye Aỹem Nataxala'. 14Aỹem ñauaxaỹaxaasheguem qome na ihuaq, da sauo'o ca qanhuaxanaguiqui, qaq nache chegoqchiguiña qome ye toolec 'alhua maye pa'aigue da taguiñi, nache ivira'a ye Ribla maye pa'aigue da sheu', da she'eguelaxata qome da toolec qataq chaqaic na qana'alhuai, qataq 'enauac nam nma'pi maye qoñiitaña. Qaq huaña qome nache qauaỹachiñi, da nachaỹem maye Aỹem Nataxala'.»
