Ye loga't mashe nayeetai'
1Ñim Nataxala' aỹem 'enapega, 'eeta': 2«Aỹem Nataxala', shenapega 'enauac na na'alhua na Israel le'ecpi, sheeta': Mashe nayeetai' ye 'oga't, mashe nayeetai' ye loga't imauec ana 'alhua. 3Mashe ivita ye 'oga't, 'am Israel. Aỹem ñashetcheguem qome da ỹayeloxo da 'am sataỹa'aguet, Aỹem ñimit qome da 'arataxac nache sauo'o ca 'anhuaxanaguec souaxat 'enauac nam 'auo'otpi maye ỹataqta qaiqaiga. 4Qaq saishet qome da 'am sechoxoreetac, Aỹem sauo'o qome ca 'anhuaxanaguec souaxat da qauem 'arataxac, qataq so'ot da 'ausheeten nam qauem 'auo'ottacpi maye qaiqaiga. Qaq huaña qome nache 'auaỹaten da nachaỹem maye Aỹem Nataxala'. 5Ñim Nataxala', 'enapec: ¡Ña 'aula'a da mashe anacta na qauem! 6¡Mashe nayeetai' ye 'oga't, mashe ivita ye 'oga't! Yem 'oga't mashe nachaañi da 'am naỹa. 7Qami' maye qoñiitalec ne'ena 'alhua, mashe nvi' nam qami' ilaxachiguilo. Mashe ivita ye laloqo', mashe sa qaỹapeque ca na'a'q maye huaigui qome da nsomaxac, nache imeuo qome da namaicỹaxac maye huetalec ana qasoxonaxapi. 8Qaq mashe saqaỹaloq da 'am talec ñaqa'en da inogoxonaxac, yaqto' samachiguiñi da semat damaye, qataq ñimit qome da 'arataxac, nache sauo'o ca 'anhuaxanaguec, souaxat 'enauac nam 'auo'otpi maye ỹataqta qaiqaiga. 9Qaq saishet qome da 'am sechoxoreetac, sauo'o qome ca 'anhuaxanaguec souaxat dam qauem 'arataxac, qataq so'ot da 'ausheeten nam naigui nam 'auo'otpi maye qaiqaiga. Qaq huaña nache 'auaỹaten da Aỹem Nataxala' maye so'ot da 'anhuaxanaguec.
10¡Qaq 'ena nam na'a'q mashe nvi'! ¡Mashe nvi' na qami' ilaxachiguilo! Da qauem qalaq dauegaxaatai' 'enauaque naua pa'aiguelo ana 'alhua, qaq ỹataqta qalota da 'amqaanaxac. 11Nquictauec da qaica ca qairen, qaq damaye nache chegaqaigui na qauemsat. Qalaxaye da qoñiita qaica qome ca no'onañi qataq nam qalota qarsallaqai maye qami' hueto'oto. 12Mashe ivita ye laloqo', mashe nvi' na na'a'q. Imeuo qome da lamaicỹaxac nam huo'o na imeetac qataq cam desheenaxatega na nmenecpi. Cha'aye Aỹem serolec qome da inogoxonaxac da sauo'o ca nhuaxanaguec da na'amqaanaxac na Israel le'ecpi. 13Qaq cam huo'o ca imen, qalaq saishet da ỹañoxot da qaltaq ñe'eguelaxaala't cam imen co'ollaxa, na'aictaxa camaye da ña nca'altauec, qataq saishet da nlaxaañi cam nmenaxac maye ỹo'ot co'ollaxa. Qaq nam qauemaicpi qalaq saishet qome da nache 'eetai' da nca'altauec.
14Mashe qaỹashiiyigui ana nasheerepi da qaiỹaxaalec da alaataxac, qaq 'enauac na shiỹaxauapi naỹamaxat, qalaxaye qaica ca ishet da inoxonec da deloqui. Cha'aye Aỹem serolec qome da inogoxonaxac da sauo'o ca nhuaxanaguec da na'amqaanaxac na Israel le'ecpi. 15Na pa'auec qalaq huo'o da alaataxac, qaq na pa'auo qalaq huo'o na nalolaxapi qataq na nqouaxa. Qaq nam huetauga na no'onaxa qalaq ileuaigui qome ca alaataxac, qaq nam huetaigui na huaqta'a't nỹecpi qalaq ilem qome ca nqouaxa qataq ca nalolaxa. 16Qaq na'aictaxa qome da huo'o ca ishet da naneltaxan da tasheguema aye qasoxonaxapi da 'eeta'am ca qoto' da ñi'i, qalaxaye 'enauac qome da ileu, souaxat na lasouaxashetpi. 17Qaq 'enauac qome namayepi qaica ca la'añaxa'c naua lhuaxaye, qataq cholaxa'n naua l-llecte souaxat da lli'iỹaxa. 18Qataq ỹaayiñi naua sansattegueta alogo souaxat da nqui'ic, qataq 'enauac da lo'ocỹaxac da cholaxan qome, qataq ỹataqta napagaqtec da lasheguiỹaxac souaxat da lcoxo, qataq namarec 'enauac na lqaic. 19Qataq ỹasaxauga ca nqa'aic ana alom lcat plata, qataq ỹasaxauec na lalamaxat lcat oro, 'eeta'am naqa'en ca lasogoñi. Qaq na lalamaxat oro qataq ana alom lcat plata, saishet qome da nca'alaxatec namayepi que'eca na'a'q maye huaigui da lalemataic Ñim Nataxala'. Qataq saishet da vi'iiguet na lqouaxa, cha'aye na lalamaxat oro nachena na ỹo'ot da talec namayepi da qauem. 20Qaq souaxat da lyac ana no'otaqtepi nache namayepi nlaxagui da ño'oxonnaxac, qataq nache do'onataxana anamayepi da ỹo'ot na ỹataqta qaiqaiga ne'enaqtac nqolacpi. Qaq ỹoqo'oye she'eguelaxata qome da 'eco' lasogoñi ñaqa'en ana no'otaqtepi namayepi. 21Qataq so'ot qome da anac ca qalota chegaqauecpi, nache decachiỹa anamayepi, ñaq anac qome ca shiỹaxauapi maye ỹataqta no'otanec ana 'alhua, nache deuotaxanec qome, ime nache 'eeta'am naqa'en ca ỹataqta nshepaxan. 22Aỹem sheca'ai qome ne'ena 'alhua, nache sa'aqta'a da qanshepaxanaqchet añi ỹalamaqte atamnaxaqui maye ỹauotaqte. Qaq anac qome ca cachaxaicpi, nache nshepaxanaqchet.
23Ñaq 'auqataxanai' qome ca ncoñetaxanaxat lcat, cha'aye ne'ena 'alhua qalota qome na qaỹalauat, qataq ne'ena huaqta'a't nỹecpi nlaxagui qome na shiỹaxauapi maye qaica ca iren. 24Cha'aye Aỹem so'ot qome da anac ca shiỹaxauapi qauemaicpi, nache mpaxaalec da ỹacona na nma'pi ne'ena huaqta'a't nỹecpi. Qaq nache tachiguiña ñaqa'en qome da ño'oxonnaxac na 'añaxaicpi, qataq so'ot qome da qanshepaxanaqchet nam natamnaqa'pi namayepi. 25Qaq huaña nache da ncolanaxa loxonec qome namayepi, nache nmittaique qome da nlagaxayec qalaxaye saishet da ỹanata. 26Qaq nacalec lỹa qome cam qauem, qataq nacalec lỹa ca qauem na'axaỹaxac. Nache qaica ca naigui qome da nmittaique ca na'aqtaxanaxanec da yaqto' ỹachegoxoto'ot ca la'axaỹaxac, qataq qaica ca ntaxaỹaxanaxanec da ỹapaxaguen, huo'otaq ca ỹa'axaiquipi da ỹanem namayepi ca lqataxac. 27Nache ca nta'a ỹaayiñi qome caua alogo maye lasouaxaqui', qaq ca nataxala' qalaq huetaigui qome da laquicoxo, qaq na nhuo' le'ecpi qalaq iviloxol qome. Cha'aye Aỹem sanem qome namayepi cam naigui na ỹo'otpi, qataq ñimit nam lasouaxashetpi, 'eeta'am namayepi naxa da huo'o na nmit. Qaq huaña nache ỹaỹaten da nachaỹem maye Aỹem Nataxala'.»
