So depa'aguenataxaatacpi nqanaxat aso qaỹo'ottac atamnaxaqui
1Qaq so npa'aguenaxauapi so nhuo' le'ecpi maye chegoxoguetpi so Judá qataq so Benjamín, co'ollaq la'axaỹaxac da se'eso noxonecpi co'ollaxa, mashe ñe'eguelaxa ye Jerusalén, chegoqchiguiña ye Babilonia da qaltaq ỹe'eguelaxalec da no'oxoosheguem, aso atamnaxaqui maye lalamaqte Ñim Nataxala' maye Natamnaxala' so Israel le'ecpi, 2nache somayepi nqo'ona so Zorobabel qataq so Josué, qataq so lataxala'pi so ñalaqpi. Nache 'enapegalo, 'eeta':
Ñaq qomi' qanashiñiitegueta, da qami' setauana'q da qano'oxoñiisheguem aca atamnaxaqui. Cha'aye qomi', nache qami' shenaqta'ama da sho'oxorenaqtac Ñim Qanatamnaxala'ai, qataq mashe sanqot aso qarachetaqtaxanaqte maye qaỹavigaxatta, nache chegoqchiguiña co'ollaq ñaq nta'a so Esarjadón, maye nta'a ye Asiria, som qomi' nauegalo ne'ena 'alhua.
3Qalaxaye so Zorobabel qataq so Josué, qataq so lataxala'pi so Israel le'ecpi, 'enapeco':
'A'i, qomi' sa seshetaq da qami' ñashenaqtegueta da qomi' qauauaqaigueta da ño'oxonaxasheguem añi atamnaxaqui maye lalamaqte Ñim Qanatamnaxala'. Qomi' ñeroqte' da souaqapegue' da ño'oxonaxasheguem añi atamnaxaqui maye lalamaqte Ñim Nataxala', maye Natamnaxala' so Israel le'ecpi, cha'aye nachera da lamaxasoxonaxac ñi Ciro, maye nta'a ye Persia.
4Qaq huaña, nache som netalecpi se'eso 'alhuapi, taỹa da ỹaqalhuaqchet qataq da icolanaqchet se'eso Judá le'ecpi, da yaqto' ỹaxaañi da no'oxoosheguem aso atamnaxaqui. 5Nataqa'en ivira'a da huo'o so desheenaxana so ltauapi so nataxala', da nqanaxat da qano'oxootapiguisheguem aso atamnaxaqui. Qaq se'eso nache huetoiguilo soua vi'iye da lo'onataxanaxac so Ciro, nache ivitta'a da lo'onataxanaxac so Darío, maye nta'al ye Persia.
6Qaq co'ollaq ỹacoolec da lo'onataxanaxac so Asuero, da nta'a ye Persia, nache so ipa'agueetacpi so Israel le'ecpi ỹamaxa aso lere so nta'a, ỹachetalec nam 'eetega lasouaxashetpi som netaña ye Judá qataq ye Jerusalén.
7Nataqa'en co'ollaq huaigui da lo'onataxanaxac so Artajerjes, maye nta'a ye Persia, nache so Bislán, Mitrídates, Tabel qataq so laỹepi ltauapi, ỹamaxa aso lere so nta'a Artajerjes, qaq asa'aso nere nanettaleguete naua na'aqtaqa arameo, ime, nache taiguilo qanqoỹen naua la'aqtaqa so lma' ye Persia da qaỹa'axategue 'enauac na huetalec asomaye.
8Qaq nataqa'en so lataxala' so huataxanaq lta'alpi le'enaxat Rejún, qataq so neraxanaxanec Simey, ỹamaxara aso lere so nta'a Artajerjes, nache ỹachetralec asomaye nam 'eetega lasouaxashetpi so netaña ye Jerusalén.
9Qaq asa'aso lere so lataxala' so huataxanaq lta'alpi, Rejún qataq so neraxanaxanec Simey, nataqa'en huaxaiguet so nataxala'pi qataq so nmit qataq ỹaỹamaxaañi ca nasouaxashet, qataq so chegoqtacot na nqataxacpi ye Persia, Érec, Babilonia qataq ye Susa maye da lỹa le'enaxat Elam. 10Nataqa'en nanettalec asa'aso nere so ỹotta'a't shiỹaxauapi maye ỹo'orauec co'ollaxa so 'amaqtaqaic qataq ỹo'oxoraic le'enaxat Asnapar. Qaq se'eso shiỹaxauapi nache ỹanaña co'ollaxa so huaqta'a't nỹecpi ye Samaria, nataqa'en so laỹepi maye netaña da pa'aỹa'ague da avit aso tala Éufrates: Qaq so huetalec aso nere, 'eeta':
11«'Am nta'a Artajerjes ñaq 'auaconeguet ana lere ne'ena 'aramaxashecpi maye netaña ne'ena le'ego, maye npa'aỹa'ague na avit na tala Éufrates.
12Qomi' sauoqtaique da 'am sa'aqtaxanaxam, da yi'iye judiopi maye chegaqa'a ye Babilonia yemayepi mashe nvita ye Jerusalén, qataq mashe no'oxootapiguisheguem ye huaqta'a't nỹecpi da yaqto' naigui nam qaica ca ỹalaxaguet, qataq qauemaicpi. Qataq mashe lapaqtegueñi na lo'oxonaxala'pi da lpaqtaxat da qanauaxaỹaxasheguem yemaye. 13Nataqa'en sauoqtaique da 'auaỹateeta da yi'iye shiỹaxauapi qom mashe imat da no'oxoosheguem yem huaqta'a't nỹecpi qataq na lpaqtaxat yemaye, nache yemayepi 'am dataỹa'aguet, nache saishet qome da isheeten aca nsheetenaqte ca nta'a, huaña nache na'aqchet ana naỹoñeguishe maye nsheetenaxanaqte. 14Qaq souaxat da qomi' 'aramaxa'she 'am nta'a, nache sa saỹamaxarenaq da 'am sa qaỹalaxaguet. Ỹoqo'oye 'am samaxasaxa ana qorere maye huetalec na 'am sa'axataxampi. 15Yaqto' 'auamaxasoxoolec da qanmit aca huetalec aso hua'auñi nerepi maye nanettalec 'enauac na ỹo'otpi so hua'au nta'alpi. Yaqto' huaña nache 'auaỹateeta da yem hueta'a yi'iye huaqta'a't nỹecpi ỹataqta qaica ca ỹalaxaguet, qataq huo'o da lchec da na'aqchet da lo'onataxanaxac na nta'alpi qataq na laỹepi na 'alhuapi. Huaña nache 'auaỹateeta da nache 'eetai' naxa da chegoqta'ague da naỹamaxara't da dataỹa'aguet na nta'alpi ỹoqo'oye ivira'a da qailaxachigui yemaye. 16Ỹoqo'oye sauoqtaique da 'am sa'aqtaxanaqtem, da ỹoltaq qano'oxoosheguem yi'iye huaqta'a't nỹecpi qataq so lpaqtaxat, nache 'am saishet da 'auañoxot qome da 'aulo'ogue 'enauac yi'iye huaqta'a't nỹecpi maye pa'aỹa'ague da avit na tala Éufrates.»
17Huaña nache so nta'a Artajerjes, ỹamaq so la'aqtac 'eeta':
«'Am Rejún, maye 'am lataxala' na huataxanaq lta'alpi, qataq 'am neraxanaxanec Simey, qataq 'enauac na qartauaipi maye netaña ye Samaria qataq ye laỹepi huaqta'a't nỹecpi maye pa'aỹa'ague da avit ye tala Éufrates:
Qami' taỹa'alo da iquinaxanaxac. 18Aỹem Sogote da ña'axaỹaxaatega da qaitaxaỹaxaatac aso nere maye qaỹauota'aisalo naua qara'aqtaqa, 19nache samaxasoxoolec da qanmit asom huetalec 'enauac na ỹo'ot so hua'au nta'alpi. Ime, nache selaqalec da yi'iye huaqta'a't nỹecpi nache 'eetai' naxa da huo'o da huaña da dataỹa'aguet so hua'au nta'alpi. 20Nataqa'en qailalec da ye Jerusalén huo'o so nta'alpi ỹataqta 'añaxaicpi, ỹoqo'oye ivira'a da ilotague' ye huaqta'a't nỹecpi maye pa'aỹa'ague da avit so tala Éufrates, qataq isheetetac naqa'en aso nsheetenaqte so nta'a yemaye. 21Qaq ỹoqo'oye aỹem samaxasoxoolec da qoỹaxaañi da qano'oxootapiguisheguem yi'iye huaqta'a't nỹecpi, nato' qom qaỹaconeguet ca dalaxaic ỹamaxasoxonaxac. 22Qaq ỹoqo'oye saqauaỹaloxoñi da qaupaquiichigui de'era ỹamaxasoxonaxac, yaqto' saishet da huo'o ca na'aqchet de'era ỹo'onataxanaxac da aỹem nta'a.»
23Nache co'ollaq qaitaxaỹaxaatac aso lere so nta'a Artajerjes, hua'aqchigui so Rejún maye lataxala' so huataxanaq lta'alpi, qataq so neraxanaxanec Simey qataq so ltauapi soomaye, nache 'enauac somayepi sanaỹaloxon da nqo'ona ye Jerusalén, nache ỹataqta 'enapega so judiopi da ỹa'axaneguet da lo'onataxanaxac. 24Qaq 'era da 'eetec da qaỹa'axaneguet da qano'oxootapiguisheguem aso atamnaxaqui maye lalamaqte Ñim Nataxala', maye naña ye Jerusalén, ivira'a da inoxoorec soua dos vi'iye da lo'onataxanaxac so Darío maye nta'a ye Persia.
