So natamnaxac so Esdras
1Qaq so mashe ime 'enauac de'era, nache aỹem naua'a so nataxala'pi, nache aỹem 'enapega, 'eeta': «Ne'ena nhuo' Israel le'ecpi qataq na ntaxaỹaxanaxanecpi, qataq na leviitapi, namayepi saishet da ỹaxanec da ỹalectaigui na cananeopi, hitiitapi, ferezeopi, jebuseopi, amoniitapi, moabiitapi, Egipto le'ecpi, qataq na amorreopi, qataq ỹe'enaxat dam ỹataqta qaiqaiga lataxac namayepi. 2Qaq namayepi qataq na llalaqpi huaroneguet na llalpi ne'ena shiỹaxauapi, qaq ỹoqo'oye ne'ena nhuo' le'ecpi maye lalamaxat Ñim Lo'onatac 'Enauacna, ỹaleeguet 'enauac ne'ena ỹotta'a't shiỹaxauapi. Qaq na la'auaxanec da ỹo'ot de'era nasouaxashet, nachena nam nta'alpi, qataq nam 'amaqtaqaic nataxala'pi.»
3Qaq can sa'aqchigui de'era na'aqtaxanaxac, nache aỹem ñecolaxata'aisalo naua aỹogo, qataq ño'otegue' na ỹaue, qataq ana iqa' laue souaxat da ñiqui'ic. Ime, nache ñeso'ootañi ỹataqta qaica ca ỹa'añaxac. 4Qaq huaña nache 'enauac nam huo'o naq 'enec naqa'en da la'aqtac Ñim Natamnaxala' na Israel le'ecpi, ỹataqta daquico souaxat da lasouaxashet ne'ena cheta'ague da ñe'eguelaq nache aỹem qaicoleesop, qalaxaye aỹem nache ñeso'ootañi, qaica ca ỹa'añaxac choche ivitta'a so laloqo' da qaỹo'ot so nachetaqtaxanaxat ye avit. 5Qaq so ivita ye laloqo' da qaỹo'ot so nachetaqtaxanaxat nache qaltaq huo'o da ỹa'añaxac, qalaxaye ñaq saatrañi soua aỹogo maye colaqta'ape qataq so ipo', nache aỹem sa'alyiñi naua illecte, qataq sachaxanoto naua ihuaxaye Ñim Nataxala' maye Ñatamnaxala', 6nache sheeta':
«'Am maye 'Am Ñatamnaxala', aỹem sasaỹaten ca sheetec, qataq ỹataqta huo'o da ña'aloxonaxac da 'am seỹaxanot. Souaxat na qauemsat ỹataqta ỹaguisheguem, choche ivitta'a da qomi' ỹapoleguete, qataq ỹataqta iviro'ot na piguem. 7Qataq mashe qaỹoqteguelo soua vi'iye, choche ivitta'a nagui, da ỹataqta lta'araic de'era qarasouaxashet. Qaq souaxat ne'ena qauemsat, nache qomi', qataq na qarta'alpi, qataq na ntaxaỹaxanaxanecpi, qomi' qoỹanegueta da la'añaxac na lta'alpi na ỹotta'a't shiỹaxauapi maye qarhuoreuapi. Nache qomi' qaique'emaqcheteque so ỹeelonec, qataq qomi' nlataqa, qataq qomi' qanhuo't, qataq qomi' qane'eetapiguilo, choche ivitta'a nagui. 8Qalaxaye nagui 'am, Nataxala' maye Qanatamnaxala', de'era 'arauotaxanaqtaic da shenaqta nache chegoqchigui da huo'o na ishet da qaisoueeguesop da nlataguec, nache qomi' qoỹanema da ñanaguenaq da ỹoltaq sonaqalec ne'ena 'alhua maye qui'itta maye qomi' 'aỹa'anema. Qataq qomi' 'anema da dalaxaic qanaquitaxac qataq qomi' 'auo'oteque da ñe'eguelaxasheguem de'era qantonaxac. 9Qaq na'aictaxa da qomi' nlataqa, qalaxaye saishet da qomi' 'auala't, qaq de'era 'arauotaxanaqtaic da shenaqta ỹataqta lta'araic ỹoqo'oye 'auo'otec da ye nta'alpi ye Persia, qomi' ỹanema da ñe'eguelaxasoq da ño'oxonaxasheguem añi atamnaxaqui maye 'aralamaqte, maye nlachiguiñi co'ollaxa. ¡Qaq nagui da souaqta'a ne'ena Judá, qataq na Jerusalén nache qomi' 'anpaxattaleguete qome!
10Qalaxaye nagui, 'am Qanatamnaxala', ¿ca 'eeteco' ca qara'aqtac, ye mashe ime 'enauac na so'otaqpi? Cha'aye qomi' ỹataqta saishet da sepagaqchiguilo naua 'aramaxasoxonaxaco, 11maye qomi' 'aỹa'anema 'auachegoxotchigui so 'ara'aqtaxanaxanecpi maye 'aramaxashecpi, da qomi' 'auqattegalo co'ollaxa, da ne'ena 'alhua maye ñenoxonaxaua'a da sonaqalec, namaye ỹataqta imattalec na qauem, souaxat naua qauema no'onataxaco na shiỹaxauapi maye netalec namaye, nache nlaqchigui na qauem 'onataxacpi maye qaiqaiga. 12Nataqa'en qomi' 'auqattegalo caillaye da saishet da sashenaqtem na qoyalpi da huaroneguet na llalaqpi ne'ena shiỹaxauapi, qataq na llalpi 'alpi da huaroneguet na qoyalaqpi. Qataq saishet da setauanaq ne'ena shiỹaxauapi da yaqto' huo'o da l-lagaxayec qataq da lsallaxa. Yaqto' nache 'eetai' da qomi' 'añaxaiqa, qataq saconaqtaigui da alaỹaxac 'enauac na huetalec ne'ena 'alhuapi, qataq da ca qomi' chegoxogueta nache 'eetai' qome da lalamaxat 'enauac ne'ena 'alhua.
13Qaq 'enauac de'era souaqaigui souaxat na qauemsat qataq na qarasouaxashetpi. Qomi' sauattonaqta da nache 'am maye Qanatamnaxala' da qomi' 'aỹa'anema de'era qanhuaxanaguec, qalaxaye nataqa'en qomi' 'aỹa'anema da qomi' huesochiyiñi. 14Qaq taloxochiyectoxo' da she'eguelaxasoxolec da sa salaxasoxoguet na 'aramaxasoxonaxacpi, da saronaxaguet na 'alpi maye chegaqaigui ne'ena shiỹaxauapi maye ỹataqta qauema naua no'onataxaco. Cha'aye da nache shenaqtec, nache qomi' 'aualemataỹalo, qataq qomi' 'anlaxaayiñi, ivitta'a da ỹataqta qaica ca no'onañi da 'anca'alaxattauec da shenaqta.
15Qaq 'am Nataxala', qataq Natamnaxala' na Israel le'ecpi, 'am maye ỹataqta sa na'aigue da 'icỹaxac. 'Am maye chegoqchigui da qalota da shenaqta na nca'altauec. Qalaxaye qomi' ỹataqta ñanomaqta da 'am hueta'asop na qarasouaxashetpi, qaq ỹoqo'oye saq taiguet da 'am souaqto'ot.»
