Qaỹalaxaguet na nqataxacpi huo'otaq qaipi'iỹa'a So Jesucristo
1¡Aicoue, qami' maye qarmaye na 'alhua Galacia, ỹataqta qaico' ca qauaỹaañiỹapec! ¡Ivira'a da 'eeta'am da huo'o ca qami' ira'n! Aỹem ỹataqta ỹataqtegue da ỹa'aqtaxanaxac da qami' sa'aqtaxaateguema da 'eetec da l-leuaxa So Jesucristo co'ollaq qaiuaxaneguet so npe'enaxaqui. 2'Oonolec da sauotaique da aỹem qaua'aqtaxañim nagui, 'eeta': Co'ollaq qauacoñiiguet So Saqcha'a La'añaxac Ñim Lo'onatac 'Enauacna, ¿peta'a qauachegoxochiichigui da qauo'ocheetac na namaxasoxonaxacpi maye chegoqo'ot so Moisés huo'otaq souaxat da qauacoñiiguet da no'on na'axaỹaxac? ¡Aja', damaye ỹoqta 'eesa da chegoqchigui da no'on na'axaỹaxac! 3Qaq da nache 'eetec de'era, qalaq ¿ta'ainco' qone' da qauoita'a sa qauaỹachiñi? Ye da qoquiilec da dalaxaic achaalataxac, nache qaviñi So Saqcha'a La'añaxac Ñim Lo'onatac 'Enauacna, qaq ¿ta'ainco' nagui da qauauoitaique da qauachegoxochiỹaigui da maiche qana'añaxataxaqui? 4¿Peta'a saisheto' da huo'o ca naigui 'enauac da qanque'eenaxaqui? ¡'Onaxaico' da huo'o ca qauachegoxochiỹaigui damaye! 5Ñim Lo'onatac 'Enauacna saishet da qami' ỹanema co'olloxocheye So Saqcha'a La'añaxac, qataq saishet da ỹo'ot na na'anecpi maye ỹo'ot da na'aalaxa maye qami' huanguilo souaxat da qaualaqaiguet na namaxasoxonaxacpi maye chegoqo'ot so Moisés. ¡'A'i! Damaye ỹo'ot cha'aye qami' qauacoñiiguet da na'aqtaxanaxac maye chegaqaigui da no'on na'axaỹaxac.
6So Abraham co'ollaxa huo'o da lpi'iỹaxac Ñim Lo'onatac 'Enauacna, nache de'era lpi'iỹaxac chegoqchigui da Ñim Lo'onatac 'Enauacna ỹaỹamaxareeta somaye. 7Qaq ỹoqo'oye qami' ishet da qauaỹaañita da na ỹataqta 'eesa da llalaqpi so Abraham, nachena na huo'o da lpi'iỹaxac Ñim Lo'onatac 'Enauacna. 8Cha'aye naua ñiyigui'she maye nanettaleguete ana nere maye huetalec na la'aqtacpi Ñim Lo'onatac 'Enauacna ỹa'axattac da Ñimaye ỹaconeguet nataqa'en nam saishet da judiopi da namayepi ỹa'amaqten So Jesucristo. Qaq ỹoqo'oye Ñim Lo'onatac 'Enauacna ỹami' so Abraham de'era no'on na'axaỹaxac: «Da iqouagaxanaqtaic chegoqchigui 'am, da talec ñaqa'en na ỹotta'a't shiỹaxauapi.» 9Qaq ỹoqo'oye cam ỹa'amaqten Ñim Lo'onatac 'Enauacna, nache huo'o da nqouagaxa 'eeta'am so Abraham maye da'amqaanataxan.
10Qaq ỹoqo'oye huetalec da lta'araic lchec nam huotaique da ỹachegoxotchigui da ỹalaxalec na namaxasoxonaxacpi da huotaique da ỹaỹamaxareeta Ñim Lo'onatac 'Enauacna, cha'aye naua ñiyigui'she maye nanettaleguete ana nere maye huetalec na la'aqtacpi Ñim Lo'onatac 'Enauacna, 'eeta': «Ỹataqta qauem qome ca talec nam saishet da ỹalaxalec na namaxasoxonaxacpi.» 11Qaica ca ỹaỹamaxareeta Ñim Lo'onatac 'Enauacna da ỹachegoxotchigui da ỹalaxalec na namaxasoxonaxacpi. Cha'aye naua ñiyigui'she maye nanettaleguete ana nere maye huetalec na la'aqtacpi Ñim Lo'onatac 'Enauacna 'eeta': «Cam ỹaỹamaxareeta Ñim Lo'onatac 'Enauacna, camaye nacheca ca huo'o da lpi'iỹaxac, qaq camaye, da nachaalataxac chochaq tatec.» 12Cha'aye da qaỹaconeguet da achaalataxac da chegoqchigui na namaxasoxonaxacpi, nache sa iuen da huo'o ca npi'iỹaxac Ñim Lo'onatac 'Enauacna; nachaqrata da iuen da qaỹalaxalec na namaxasoxonaxacpi. Ỹoqo'oye ana nere maye huetalec na la'aqtacpi Ñim Lo'onatac 'Enauacna 'eeta': «Ca ỹalaxalec na namaxasoxonaxacpi, nache nca'alec chegoqchigui da lalaxayec.»
13Qalaxaye So Cristo qomi' nca'alaxateeguesopa dam lta'araic qanhuaxanaguec souaxat da saishet da salaxasoxoguet na namaxasoxonaxacpi. 'Era da 'eetec da qomi' nca'alaxatre'c Somaye. Cha'aye naua ñiyigui'she maye nanettaleguete ana nere maye huetalec na la'aqtacpi Ñim Lo'onatac 'Enauacna 'eeta': «Ñim Lo'onatac 'Enauacna ỹauo'o qome ca nhuaxanaguec cam qaiuaxaata'aguet ca npe'enaxaqui qo'oipaq souaxat da saishet da ỹalaxaguet na namaxasoxonaxacpi.» 14Qaq ỹoqo'oye da lqouagaxanaqtaic Ñim Lo'onatac 'Enauacna maye ỹachaxanapecot co'olloxocheye so Abraham, damaye ỹami' nataqa'en nam saishet da judiopi. Qaq ỹoqo'oye da huo'o ca qarpi'iỹaxac So Cristo, nache saconaxaguet som Saqcha'a La'añaxac Ñim Lo'onatac 'Enauacna maye qomi' ỹachaxanapeguema co'ollaxa.
Na namaxasoxonaxacpi qataq ca qaỹachaxanapec
15Qami' ỹaqaỹañicpi, sauo'o da saloqnaxana, damaye camachaqca ca ishet da ỹaỹaten, 'eeta': Ca shiỹaxaua da huo'otaq naỹamaxate' ca lỹa da ỹo'ot aca lere maye huetalec na la'aqtacpi, qaq da ime, nache nanerelec. Huaña, nache saishet da huo'o ca ishet da nlaxaañi, huo'otaq da nqochenaxatec.
16Qaq nagui da ỹachaxanapecot Ñim Lo'onatac 'Enauacna co'ollaxa so Abraham maiche lalamaxat somaye qataq ca llalec. Qaq naua ñiyigui'she maye nanettaleguete ana nere maye huetalec na la'aqtacpi Ñim Lo'onatac 'Enauacna saishet da 'eeta': «ca llalaqpi,» nachaqrata da 'eeta': «ca 'aỹa'alec.» Qaq damaye naigui qone' da 'oonolec ca qaitaqtega shiỹaxaua. Qaq camaye nacheso So Cristo. 17Qaq dam sheetega 'eeta': dam ỹachaxanapec co'ollaxa Ñim Lo'onatac 'Enauacna, damaye saishet da naralaxat huo'otaq da qaica naqa'en ca naigui na namaxasoxonaxacpi maye ỹan Ñimaye co'ollaq mashe ivi' soua cuatrocientos treinta vi'iye. 18Cha'aye Ñimaye da ỹami' cam ỹachaxanapec nam ỹalaxalec na namaxasoxonaxacpi, nache de'era ỹan saishet da ỹachaxanapec. Qalaxaye Ñim Lo'onatac 'Enauacna ỹataqta 'eesa de'era ỹachaxanapecot so Abraham qaq damaye saishet da huo'o aca lasheue naqa'en.
19Nache ¿negue'to' qone' cam naigui na namaxasoxonaxacpi maye chegoqo'ot so Moisés? Cha'aye co'ollaq ime da huo'o so ỹachaxanapecot so Abraham Ñim Lo'onatac 'Enauacna, nache Ñimaye qomi' ỹanema na lamaxasoxonaxacpi da yaqto' qomi' ỹachaxanalo da nam so'otaqtac ỹataqta sa ỹaỹamaxañi. Choche ivitta'a da nvi' som llalec so Abraham maye Ñim Lo'onatac 'Enauacna ỹachaxanapecot co'ollaxa somaye. Ñim Lo'onatac 'Enauacna ỹami' so lqataxacpi so Moisés chegoqchigui naqa'en na lamaxashecpi piguem le'ecpi yaqto' somaye qomi' ỹanema. 20Qalaxaye co'ollaxa Ñim Lo'onatac 'Enauacna da huo'o so ỹachaxanapecot so Abraham, nache saishet da iuen ca la'aqtaxanaxanec, nachaqrata da ỹataqta nma'ai' da detaqtague'.
Da lo'onataxanaxac na namaxasoxonaxacpi
21Qaq de'era saishet da naigui da na namaxasoxonaxacpi dataỹa'aguet da ỹachaxanapec Ñim Lo'onatac 'Enauacna. ¡'A'i! Cha'aye da na namaxasoxonaxacpi qomi' ỹanema ca nca'alaxa maye chochaq tatec, nache Ñim Lo'onatac 'Enauacna qomi' ỹaconegueta souaxat da salaxasoxoguet na namaxasoxonaxacpi. 22Naua ñiyigui'she maye nanettaleguete ana nere maye huetalec na la'aqtacpi Ñim Lo'onatac 'Enauacna ỹa'axa't de'era ñe'etaxaloxo da 'enauac maiche qomi' ỹoiqueeta'ape, qaq ỹoqo'oye de'era qanmeỹaxac maye ỹachaxanapec Ñim Lo'onatac 'Enauacna damaye ỹaconeguet nam huo'o da lpi'iỹaxac So Jesucristo.
23Qaq co'ollaq saxanaxa da nvi' de'era, nache na namaxasoxonaxacpi 'ena'am aca ncoñetaxanaxaqui da qomi' ỹapotaua'alo, choche ivitta'a da selaqa'a da qomi' iuen da sauoqo'o ca qarpi'iỹaxac So Cristo. 24Na namaxasoxonaxacpi 'eeta'am ca napaxaguenataxanaq da qomi' ỹaueca'agueta da qomi' ỹauegalo So Cristo, yaqto' Ñim Lo'onatac 'Enauacna qomi' ỹaconegueta souaxat da huo'o da qarpi'iỹaxac Ñimaye. 25Qalaxaye nagui mashe ivita ye laloqo' da qomi' sauoqo'o ca qarpi'iỹaxac So Jesucristo, nache saishet da iuen da na namaxasoxonaxacpi qomi' ỹaueca'agueta qataq da qomi' ỹapaxague'n.
26Qami' mashe huo'o da qanaquitaxaqui So Jesucristo, qaq ỹoqo'oye 'enauac da qoñiita mashe qami' llalqa Ñim Lo'onatac 'Enauacna. 27Cha'aye co'ollaq qami' qanachelaxa'n, nache qami' qana'ayeeua'a So Cristo, qaq nagui qami' qoñiita'am Somaye. 28Qaq ỹoqo'oye nagui saishet da huo'o ca ỹectega da judío le'ec huo'otaq saishet, huo'otaq ca nlatac, huo'otaq ca huesochiguiñi, huo'otaq da ỹale, huo'otaq aca 'alo. Cha'aye da mashe qana'ayeetaua'a So Jesucristo, nache 'enauac da qoñiita'a't. 29Cha'aye da mashe qana'ayeetaua'a So Cristo, qaq nataqa'en qami' lalamaqa'ate llalqa so Abraham, qaq nataqa'en qauacoñiiguet qome cam ỹachaxanapec co'olloxocheye Ñim Lo'onatac 'Enauacna.
