Chegoqchigui So Jesucristo da qomi' huesochiyiñi
1¡So Jesucristo nacheso so qomi' huesochiyiñi naqa'en! ¡Somaye ỹataqta 'eesa da qomi' huesochiyiñi naqa'en! Qaq ỹoqo'oye de'era qami' ỹo'oteque So Cristo da qami' huesochiyiñi, qaq nachera qome qana'añaxachec qataq saishet qome da qavi'eguelaqaỹa da choche qami' l-lataqa na namaxasoxonaxacpi.
2Qalaxaye huo'o dam huotaique qami' sa'aqtaxanema: Da qami' qauauo'oi ca la'anaxat da qaro'ocỹaxaqui, nache dam ỹo'ot So Cristo qaica qanqa'eñi ca naigui. 3Qaq ỹoqo'oye qaltaq she'eguelaxalec da itelaqtaxanaxac da camachaqca shiỹaxaua da ỹauo'o ca la'anaxat na lo'oc, nache camaye iuen da ỹalaxaguet na namaxasoxonaxacpi. 4Nam huotaique da ỹaconeguet Ñim Lo'onatac 'Enauacna souaxat da ỹalaxalec na namaxasoxonaxacpi, namayepi saishet da ỹaconeguet da lauotaxanaqtaic Ñimaye qataq ỹaxanec da na'attaua'a So Cristo. 5Qalaxaye qomi' som Saqcha'a Na'añaxac ỹataqta 'itchiguiñi naqa'en da Ñim Lo'onatac 'Enauacna qomi' ỹaconegueta, cha'aye huo'o da qarpi'iỹaxac So Cristo. 6Ỹataqta huo'o da qana'achecỹaxac chegoqchigui dam ỹo'ot So Cristo, qaq na'aictaxa da huo'o ca la'anaxat na qaro'oc huo'otaq qaica. Cha'aye dam ỹataqta huo'o da naigui nachera da qarpi'iỹaxac So Cristo, qaq de'era qarpi'iỹaxac qomi' ỹo'oteque da sauotaxac na laỹepi shiỹaxauapi.
7Qami' ỹataqta ỹaỹamaqchiguiñi da qoyecỹaxaqui. Qalaq ¿negue't cam qami' na'axa't da huo'omshe qaỹa'axañiiñi da qaualaqailec dam 'eesa na'aqtaxanaxac? 8Qaq damaye saishet da chegoqchigui Ñim Lo'onatac 'Enauacna cha'aye Ñimaye nacheñi ñi qami' iỹaxanalo da qaualaqaiguet. 9Qaica ca iqoleguet da huo'o ca 'oonolec saq 'en napaxaguenataxanaq da camaye na'aqchet 'enauac da napaxaguenataxanaxac. 10Aỹem ỹataqta saỹateeta da qami' nataqa'en qauaỹamaxayiñiita da shenapec, cha'aye nache shenaqta'a't da qomi' 'amqaanataxanaxaicpi. Qataq saishet da choche qapio'olec da seqoleguet da Ñim Lo'onatac 'Enauacna ỹauo'o da nhuaxanaguec cam sa qami' ỹalemaxa't.
11Qami' ỹaqaỹa't, da aỹemctaxa da sa'axatec da 'enauac, iuen da qaỹauo'o ca na'anaxat da qaro'ocỹaxaqui, nache nam aỹem ipa'agueetacpi ỹaxaañictaxa da aỹem icaatac, nache de'era na'aqtaguec da l-leuaxa So Cristo co'ollaq qaiuaxaneguet so npe'enaxaqui, saishettaxa da inogoqchet namayepi. 12¡'Onaxaictoxo' da nam sa qami' ỹalemaxa't saishet da ndotec da ỹauo'o ca na'anaxat na lo'oc nataqa'en 'onaxaictoxo' da imauec icheguec ñi logoxoshet!
13Qami' ỹaqaỹa't, Ñim Lo'onatac 'Enauacna qami' iỹaxanalo da yaqto' qami' huesochiyiñi. Qalaxaye saishet da qauo'ogoxoñiỹa damaye da yaqto' qauo'oche ca qauem. Nachaqrato' da ñi 'oonolec huapegue' ca lỹa souaxat da qarsoxoyiqui. 14Cha'aye 'enauac na lqataxacpi Ñim Lo'onatac 'Enauacna 'oonolec da lataxac maye imatta't namayepi, 'eeta': «Ñi 'oonolec iuen da ỹauotec ca 'ena'am lỹa, 'eeta'am da lauotaxanaqtaic da maiche nachaalataxac.» 15Qalaxaye huo'o da ivitaxa da qami' qauloquiitega't qataq qanque'emaxachiỹa'a't, nache qami' 'eeta'am da maiche qanlaxacheetapeguela't.
Qaỹalaxaguet So Saqcha'a La'añaxac Ñim Lo'onatac 'Enauacna
16Qaq ỹoqo'oye qami' shenapegalo: Qaualaqaiguet So Saqcha'a La'añaxac Ñim Lo'onatac 'Enauacna, yaqto' saishet da qauyaqỹa'a da qauo'oche ca qauem. 17Cha'aye na qauem nqopitaxanaqtaic namayepi ỹataqta dataỹa'aguet dam 'eetapeguec So Saqcha'a La'añaxac Ñim Lo'onatac 'Enauacna, qaq So Saqcha'a Na'añaxac dataỹa'aguet na qauem nqopitaxanaqtaiguesat. Qaq ỹoqo'oye qami' saishet da qauo'oche cam maiche qoñiitapeguec. 18Qalaxaye da qaualaqaiguet So Saqcha'a La'añaxac Ñim Lo'onatac 'Enauacna, nache saishet da qami' qaỹamaqaleguete da qaualaqaiguet na namaxasoxonaxacpi.
19'Enauac na shiỹaxauapi ỹauatton da lataxac nam ỹalaxaguet nam qauem lqopitaxanaqtaic: ncachetague' aca saishet da lhua, qataq ỹo'ottac nam ishet da deshepaxanaqtaxan, qataq 'enauac nam qauem lamanaxanaqtaic qataq na qauem lhuennataxacpi, 20qataq natameetacot na ne'enaqtacpi, qataq napaxagueetega da laconaxanaxac qataq nquiỹa na laỹepi. Maiche deloctega't, ca'alaxanaxaicpi, qataq sa qaỹaña da layeloxo. Napagaqaanaxaicpi, ncotaxaicpi qataq colaxagui naqa'en na shiỹaxauapi. 21Namayepi ỹataqta quiỹaxanaqtaqaicpi, ivira'a da dalaataxan, taxaicpi, qataq da ỹo'ot ye laponaxac, nache ỹataqta qaica ca laỹaanataxanaxac qataq qalota na laỹepi ỹo'ot qauem. Qaq ỹoqo'oye qami' seqatalo 'ena'am so hua'auchiguiñi ỹa'aqtac, da nam ỹo'ottac de'era saishet da taigui da lo'onataxanaxac Ñim Lo'onatac 'Enauacna.
22Qalaxaye So Saqcha'a La'añaxac Ñim Lo'onatac 'Enauacna, qomi' ỹo'oteque da huo'o da qarsoxoyec, qataq nache 'eetai' da ñetonaqtapigui' qataq souaqtaigui da qarlagaxayec. Qataq qomi' ỹo'oteque nataqa'en da qarhualaxavic qataq da qarauotaxanaqtaic, qataq so'otaxac ca ỹaỹamaqchiguiñi ca qarỹa, qataq huo'o da qarpi'iỹaxac Ñim Lo'onatac 'Enauacna, 23qataq saishet da qomi' na'amqaanaxaiqa, qataq saỹatenaq da seloxogue da qarataxac. Qaica ca namaxasoxonaxac da ishet da dataỹa'aguet 'enauac de'era. 24Qaq qomi' maye qomi' lalamaqa'ate So Jesucristo, mashe 'eeta'am da sogote da seuaxanaxauo da qanapagaqaanaxac qataq da qauem qarqopitaxanaqtaic. 25Cha'aye da So Saqcha'a Na'añaxac da mashe naralaxat da qarataxac, nache iuen da ỹataqta salaxasoxoguet.
26Qaq saishet qome da qomi' ño'oxonnaxaiqa, qataq saishet da senogoqtaxanaq qataq nquiỹata'a't ñaqa'enaq namayepi, cha'aye shenaqtega da qomi' ñapagaqtelec namayepi.
