Da l-leuaxa aso Sara
1Qaq aso Sara, ivi' co'ollaxa soua ciento veintisiete vi'iye da nachaalataxac, 2nache ileu, huaña ye Quiriat Arbá, maye da lỹa le'enaxat Hebrón, huaigui ye 'alhua Canaán. Nache so Abraham nỹeeteguelec co'ollaxa aso Sara, qataq ỹo'ot da lasouaxac. 3Qaq ime co'ollaxa, nache ca'ai so hueta'a asom lqata Sara, nache nqo'ona da detaxaỹapegue' so hitiitapi maye lma' yi'iye 'alhua, nache 'eeta':
4«Aỹem na'aictoxo' da sachegaqauec da qami' soota'agueta, qalaxaye sauotaique da aỹem qaumiñiỹot ca 'alhua da yaqto' lma' na ỹaqatacpi, yaqto' selayiñi ayem ihua maye saqaca.»
5Nache so hitiitapi, 'enapeco':
6«¡Qomi' 'anqouagueque, 'am qarataxala', ñaq qomi' 'ana'axaỹaxanalo! Da qomi' qonetaiguilo, qalaq nache 'am da 'am lca'aguishec Ñim Lo'onatac 'Enauacna. Qaq ỹoqo'oye 'aulayiña qome aca 'arhua acam ỹataqta no'on ana qanhuachiquipi, cha'aye da shenaqta qaica ca 'am illetapeguem aca huachiqui da 'aulayiña aca 'arhua.»
7Qaq huaña nache so Abraham nachaañi, nache ỹa'aroto naua l-llecte so hitiitapi, 8nache 'enapega somayepi, 'eeta':
«Da ỹoqta 'eesa da qauaỹamaxayiñiita, da selayiña ne'ena ayem ihua, qaq no'on da aỹem qautaqailec da qoñiỹapega ñi Efrón ñim llalec so Sojar, 9da aỹem imenot ñi auac maye naña ye Macpela, maye netaua'a na laỹe yem na'alhua ñimaye. Qaq aỹem sesheeten qome imauec aca lasheue ñi'iñi auac, da yaqto' ỹalamaxat yi'iye 'alhua da lma' na ỹaqatacpi.»
10Qaq so Efrón som hitiita, ye ỹalectaigui somayepi, nache ỹasateguet so Abraham, hua'aqchigui naqa'en so lauo' le'ecpi, qataq som natapeuga so lasom som huaqta'a't nỹecpi, nache 'eeta':
11«¡'A'i, 'am ỹataxala', ñaq aỹem 'arqouaguec qome! Aỹem choche 'am saatem qome yi'iye 'alhua, qataq ñi auac maye naña yemaye. Qaq nam ihuo' le'ecpi ỹauaachigui, qataq ỹaỹateeta da choche 'am saatem yemaye, qaq 'aulayiña qome yemaye aca 'arhua.»
12Qalaxaye so Abraham, qaltaq ỹe'eguelaxalec da ỹa'aroto naua l-llecte se'eso shiỹaxauapi maye lma' yi'iye 'alhua. 13Nache qaltaq ỹasateguet so Efrón, ỹauaachigui 'enauac som lma' yi'iye 'alhua, 'eeta':
«¡Aỹem 'arqouaguec, ñaq aỹem 'ana'axaỹaxana! 'Am ñachoxonnot da 'auaconeguet aca lasheue yi'iye 'alhua. Qaq ime qome, nache selayiña yemaye ayem ihua.»
14Nache so Efrón 'enapeco':
15«Ñaq aỹem 'ana'axaỹaxana, 'am ỹataxala': yi'iye 'alhua, ivi' cuatrocientos monedas na plata añi lasheue. Qaq saishet qome da queta da setaxasoqtapigui, qaq qojec qome nache 'aulayiñi aca 'arhua.»
16Nache so Abraham ỹasateguet ye lcata aso iỹaxanaique so Efrón, nache ỹauaachigui naqa'en 'enauac so hitiitapi, da quetelec da maiche lataxac somayepi, da isheeten aso lasheue se'eso 'alhua. 17Qaq 'era da 'eetec so na'alhua so Efrón, som huaña ye Macpela, maye pa'aigue da nala' lliguisheguem ye na'alhua so Mamre. Qaq damaye naigui, da so 'alhua qataq so auac, qataq 'enauac aso qo'oipaqpi maye netaigui se'eso 'alhua, 18somaye taỹot so Abraham da yaqto' lalamaxat. Qaq de'era ỹauaachigui 'enauac so hitiitapi, qataq som natapeuga so lasom se'eso huaqta'a't nỹecpi.
19Qaq co'ollaq ime de'era, nache so Abraham ilayiñi aso lhua Sara, ỹachaigui so auac maye naña ye 'alhua Macpela, maye pa'aỹa'ague da nala' lliguisheguem ye lma' so Mamre. Qaq yemaye, nataqa'en qaỹaỹaten da le'enaxat lỹa da Hebrón, maye huaigui ye 'alhua Canaán. 20Qaq 'era da 'eetec, da som 'alhua, qataq so auac maye naña yemaye, da saishet da nache queta da lalamaxat som hitiitapi, nacherata da taỹot so Abraham da lalamaxat, da yaqto' lma' na lqatacpi.
