Génesis 29

₁Qaq so Jacob, qaltaq jec da nqo'ona ye na'alhua som nala' lliguisheguem le'ecpi.

₂Qaq co'ollaq ivita so no'onaxa, nache ila'a aso nshere, qaq som saqaỹapeque asomaye nache hueta'a aso qaguetapi maye tres soua laponaqa'ate, cha'aye so shiguiỹacpi nache nỹomtapigui naxa asomaye. Qaq na alap asa'aso nshere huo'o so lapoxot coma' lta'araic. ₃Qaq aso qaguetapi naxa da 'enauac da laỹona't da hua'a yemaye, nache som ilotague'pi aso qaguetapi, nqaañi se'eso coma' da yaqto' nỹomaxan aso qaguetapi, qaq naxa da ime nache qaltaq ỹapogongui aso nshere. ₄Nache so Jacob inattaco' som qagueta lo'opi, 'eeta':

«¿Chaq hua'ague ca qauachegoqỹa'ague, qami' ỹaqaỹa't?»

Nache somayepi 'enapeco':

«Qomye qarma' ye Jarán.»

₅Nache somaye qaltaq ỹe'eguelaxalec da denataxan, 'eeta':

«¿Qauauattoñi peta'a ca Labán, cam llalec so Najor?»

«Nache somayepi 'enapeco': Aja', sauattonaq.»

₆Qaq so Jacob, qaltaq 'enapeco':

«¿Peta'a qaica camachaqca da nachaalataxac camaxa?»

Nache somayepi, 'enapeco':

«Aja', ñi Labán, qaica camachaqca. Ña 'aula'a 'anacha'aguet anam llale Raquel no'ottalec ana lalo qaguetapi.»

₇Qaq huaña nache so Jacob, 'enapeco':

«Nagui ña nalota't na na'a'q da qaỹapoua'a ana qaguetapi. Qaq ¿ta'ainco' da sa qanỹomaxañi anamayepi, qaq ime nache qaltaq qauaviqui da qauquia'axañi?»

₈Qalaxaye somayepi, 'enapeco':

«'A'i, saishet da shenaqtec de'era. Cha'aye seuataqa'a da 'enauac da laỹona't ana qaguetapi, qaq huaña nache ñeqataq ñim coma' maye lapoxot añi nshere, da yaqto' sanaxam na 'etaxat ana qaguetapi.»

₉Qaq so Jacob co'ollaq ñaq detaqtague' somayepi, nache aso Raquel nviraxasom, no'ottalec aso qaguetapi maye lalo so lta'a, cha'aye asomaye nachaso aso ilotague' asomayepi. ₁₀Qaq so Jacob co'ollaq choche ila'aguet aso Raquel asom llale so ntesoqo' Labán da no'ottalec aso qaguetapi maye lalo somaye, nache somaye nquigueua'a aso nshere da nqat so coma' maye lapoxot asomaye, nache nỹomaxan aso qaguetapi. ₁₁Qaq ime, nache iquin qataq napigoxoi', nache nỹen. ₁₂Qaq so Jacob co'ollaq ỹa'axatem aso Raquel da somaye llalec aso Rebeca, qataq maiche lasoshec so Labán, nache aso Raquel nqalgoqtaua'a so lta'a da da'aqtaxanem.

₁₃Qaq so Labán co'ollaq hua'aqchigui da qaỹa'axat so Jacob som llalec aso lqaỹa Rebeca, nache nqalgoqta da ca'ateuga, nache nqapale' qataq napigoxoi', nache ỹauegueua'a so lma'. Qaq huaña, nache so Jacob da'aqtaxaatapeguem so Labán 'enauac da huaigui somaye. ₁₄Nache so Labán 'enapeco':

«Ỹoqta 'eesa da maiche 'am ỹalamaxat ihuo' le'ec.»

Qaq so Jacob, nache na'asop so Labán inoxootec so 'oonolec ca'agoxoic. ₁₅Qaq co'ollaq mashe inoxonec se'eso ca'agoxoic, nache so Labán 'enapega somaye, 'eeta':

«Saishet da choche 'auo'onataxaatacot aỹem da qaca aca 'arasheue, souaxat da maiche 'am ihuo' le'ec. Ñaq aỹem 'aua'aqtaxanem ca lcata aca 'auỹaxanaique 'arasheue.»

₁₆Qaq so Labán huo'oi co'ollaxa soua dos llalel: aso ỹe le'enaxat Lea, qaq aso na'asa le'enaxat Raquel. ₁₇Qaq aso Lea ỹataqta 'onaxaiqa naua la'ai'te, qalaxaye aso Raquel ỹataqta 'onaxai qataq ỹataqta nalochiguiñi. ₁₈Qaq so Jacob ye ỹataqta nqopita aso Raquel, nache ỹasat, 'eeta':

«Aỹem so'onataxaalec qome ara 'aỹa'ale na'asa Raquel, ivittrec caua siete vi'iye.»

₁₉Nache so Labán ỹasat, 'eeta':

«Aja', no'on da 'am sanem aramaye, qaq saishet da sanem ca ỹaqa'a. Qaq nache aỹem qono'ot nagui.»

₂₀Qaq 'era da 'eetec da so Jacob do'onataxaalec co'ollaxa aso Raquel soua siete vi'iye. Qaq somaye 'eeta'am da saqaỹaleguete naqa'en soua vi'iye, souaxat da ỹataqta ỹauotec asomaye. ₂₁Qaq co'ollaq mashe inoxoorec soua siete vi'iye, nache so Jacob 'enapega so Labán, 'eeta':

«Ñaq aỹem 'aỹa'anem ara Raquel, yaqto' saroneguet, cha'aye mashe inoxoorec soua vi'iye da so'onataxaateguelec aramaye.»

₂₂Qaq huaña nache so Labán, icoyeguen 'enauac so lauoreuapi da yaqto' naua'a so naronaxac maye ỹo'ot. ₂₃Qalaxaye co'ollaq nvi' so pe, nache so Labán ỹaconeua'a aso Lea, nache ỹauegueua'a so Jacob, nache so Jacob lauañi' asomaye. ₂₄Qataq so Labán, nataqa'en ỹanem aso Lea aso 'oonole asom lamaxashepi somaye maye le'enaxat Zilpa, da yaqto' huetague' naqa'en asomaye.

₂₅Qaq so nte'etom so lỹa na'a'q, nache so Jacob noma da lauatañi' so pe aso Lea, nache 'enapega so Labán, 'eeta':

«¿Negue't dam aỹem 'auo'otec? ¿Saisheto' peta'a da so'onataxaateguelec aso Raquel? Qaq ¿ta'ainco' da aỹem 'auatenachet?»

₂₆Nache so Labán ỹasateguet somaye, 'eeta':

«Ne'ena souaqta'a saishet da qarataxac da hua'auñi ñaqa'enaq da huaron aca na'asa, da saxanaxa da huaron aca ỹe. ₂₇Qaq ỹoqo'oye no'on da 'aumattrec naua siete na'axa'te maye 'araronaxaqui' da 'auaroneguet ara Lea, qaq qom ime, nache nataqa'en 'am sanaxam aso Raquel, da 'auasateguet da qaltaq 'auo'onataxanot aỹem caua lỹa't siete vi'iye.»

₂₈Nache so Jacob ỹasat, qaq co'ollaq mashe inoxoorec soua laronaxaqui' da huaroneguet aso Lea, nache so Labán ỹanem so Jacob aso llale Raquel da ỹauo'o lhua. ₂₉Qaq so Labán nataqa'en ỹanem aso Raquel aso lỹa lamaxashe somaye, maye le'enaxat Bilá, da yaqto' huetague' asomaye. ₃₀Qaq so Jacob nache huaroneguet nataqa'en aso Raquel, qaq ỹataqta ỹauotec asomaye, saq 'ena'am aso Lea. Qaq na'aictaxa da nache queta da do'onataxanot so Labán, iviraxattrec soua lỹa't siete vi'iye.

₃₁Qaq Ñim Nataxala' co'ollaq ila'a da so Jacob saishet da ỹauotec aso Lea, nache Ñimaye ỹo'ot da asomaye huo'oi soua llalqa, qaq aso Raquel qalaq ỹanem da saishet da deco'o. ₃₂Qaq aso Lea hualaxai co'ollaxa, nache huo'o so llalec, nache ỹanagui da le'enaxat Rubén, cha'aye 'enapeco':

«Ñim Nataxala' ila'a co'ollaxa da saquicota. Qaq ỹoqo'oye nagui so ihua aỹem ỹauotec qome.»

₃₃Qaq co'ollaq qaỹata'ague de'era, nache aso Lea qaltaq huo'o so lỹa llalec, nache ỹanagui da le'enaxat Simeón, nache 'enapeco':

«Ñim Nataxala' hua'aqtega co'ollaxa da ño'otanaguec, ỹoqo'oye qaltaq aỹem ỹanem na lỹa ỹalec.»

₃₄Qaq ime co'ollaxa nache qaltaq huo'o so llalec, nache ỹanagui da le'enaxat Leví, cha'aye 'enapeco':

«Nagui so ihua ỹataqta aỹem ỹauotec, cha'aye mashe tres naua llalqa.»

₃₅Qaq aso Lea qaltaq huo'o so lỹa llalec, nache ỹanagui da le'enaxat Judá, cha'aye 'enapeco':

«Nagui sho'oxoren Ñim Nataxala'.» Qaq co'ollaq ime de'era, nache asomaye vi'iiguet da lco'oxoc.