So Jacob ỹe'eguelaxa ye Betel
1Qaq Ñim Lo'onatac 'Enauacna 'enapega so Jacob, 'eeta':
«'Anaỹamaxat qome, da yaqto' 'anqo'ona ye Betel nache qonaña yemaye. Qaq huaña qome yemaye, nache 'auo'ot aca 'arca'atoxonaxalate da lalamaqte Ñim Lo'onatac 'Enauacna, Ñim 'am nachaxana co'ollaq 'ettapeguem so 'arqaỹa Esaú.»
2Qaq huaña nache so Jacob 'enapega so llalaqpi, qataq 'enauac so nnaictague'pi, 'eeta':
«Qaualache qome 'enauac na ỹaqa'a atamnaxala'pi maye qami' hueto'oto. Qaq ime qome, nache qanachilli, qataq qanaralaxache' naua qo'ogolle', 3nache ñaỹamaxataq da ñeqo'onaxa ye Betel. Qaq huaña qome yemaye nache so'ot aca ica'atoxonaxalate da sho'oxoren Ñim Lo'onatac 'Enauacna, maye aỹem itauan co'ollaq sootaigui so iuogoxo, qataq aỹem nnaictague' naua ỹeco cam sataigue.»
4Nache somayepi, ỹanem so Jacob 'enauac som ỹaqa'a atamnaxala'pi maye hueto'ot, qataq aso nshetepi maye netaguilo naua ltela, nache so Jacob ilarot aso qo'oipaq le'enaxat encina, maye naña ye sa qaỹapeque ye Siquén. 5Qaq co'ollaq jec somayepi, nache Ñim Lo'onatac 'Enauacna, ỹo'otec da lta'araic lcolanaxa 'enauac se'eso lauoreuapi somayepi. Qaq ỹoqo'oye qaica ca ishet da icaalec som llalaqpi so Jacob.
6Nache so Jacob, qataq 'enauac so shiỹaxauapi maye nnaictague' somaye ivita ye Luz, yem huaqta'a't nỹecpi maye nataqa'en le'enaxat Betel, maye huaigui ye 'alhua Canaán. 7Qaq huaña yemaye, nache ỹo'ot aso lca'atoxonaxalate, nache yi'iye 'alhua ỹanagui da le'enaxat El Betel, cha'aye co'ollaq 'ettapeguem so lqaỹa, nache Ñim Lo'onatac 'Enauacna, nachaxana somaye co'ollaq huaña yi'iye 'alhua. 8Qaq yemaye nache huaña co'ollaxa da ileu aso Débora, asom 'alo maye iuattague' co'ollaxa aso Rebeca, qaq nache qailareñi, qaỹacho'ot aso qo'oipaq le'enaxat encina maye sa qaỹapeque ye Betel. Nache so Jacob ỹanagui da le'enaxat yi'iye 'alhua «Encina maye huaña so noinaxac.»
9Qaq so Jacob co'ollaq ñe'eguelaq, chegaqa'a ye Padán Aram, nache Ñim Lo'onatac 'Enauacna qaltaq nachaxana somaye, nache ỹasaxalec da lchoxonnataxanaxa, 10nache 'eeta':
«'Am 'are'enaxat da Jacob,
qalaxaye saishet qome da queta da 'are'enaxat damaye;
qaq nache chegoqchiguiña nagui da 'am 'are'enaxat qome da Israel.»
Qaq co'ollaq ime da Ñim Lo'onatac 'Enauacna naralaxat da le'enaxat somaye, 11nache 'enapega 'eeta':
«Aỹem nachaỹem So'otapecna maye Qaica ca Seqalanapec,
qaq ỹataqta qalota qome ca 'aỹa'alaqpi qataq ca 'am chegoxoguetpi.
Qaq nache 'am chegoqchigui qome ca ỹotta'a't shiỹaxauapi, qataq ca qalota nhuo' le'ecpi,
qataq cam 'am chegoxoguetpi huo'o qome ca nta'alpi.
12Qaq na 'alhua maye sanem co'ollaxa so Abraham qataq so Isaac,
qalaq nataqa'en 'am sanem, qataq ca 'am chegoxoguetpi.»
13Qaq Ñim Lo'onatac 'Enauacna co'ollaq ca'ai se'eso 'alhua maye huaña da detaqtague' so Jacob, 14nache so Jacob ỹacona so coma', nache nachalataxaañi, ỹaachiguiña yem huaña co'ollaq detaqtague' Ñimaye. Qaq ime, nache icorelec somaye so aceite, qataq so lataxa, 15nache ỹanagui da le'enaxat Betel yi'iye 'alhua.
Da l-leuaxa aso Raquel
16Qaq co'ollaq qaỹata'ague de'era, nache so Jacob ca'ai ye Betel, qaq co'ollaq ñaq qaỹata'a ye Efrata, nache aso Raquel deco'o, qalaxaye da lco'oxoc ỹataqta huo'o da lqalaic. 17Qaq co'ollaq mashe huaigui da ỹataqta huo'o da lqalaic, nache aso huetague' asomaye 'enapego', 'eeta':
«Saishet qome da 'añi'i, cha'aye mashe huotaique da ñiguiñi na lỹa 'aỹa'alec ỹale.»
18Qalaxaye asomaye mashe huotaique da ileu, qaq soua pa'atrec la'a'che, nache ishet da ỹanagui da le'enaxat Benoní se'eso nogotolec. Qalaxaye so lta'a Jacob, ỹanagui co'ollaxa da le'enaxat Benjamín.
19Qaq 'era da 'eetec aso Raquel co'ollaq ileu, qaq nache qailareña so loigue so nqa'aic maye taỹa'a ye Efrata, yem le'enaxat nagui da Belén. 20Qaq so Jacob ỹa'ayiñi co'ollaxa so coma', ỹanalec aso nhuachiqui asomaye. Qaq se'eso coma' nache la'anaxat aso nhuachiqui aso Raquel, choche ivitta'a nagui.
21Qaq so Israel qaltaq jec co'ollaxa, nache naña yem pa'aigue da laỹe aso naue le'enaxat Migdal Edar. 22Nache so Israel co'ollaq mashe netaña se'eso 'alhua, nache so Rubén lauañe' co'ollaxa aso Bilá, asom ỹaqauga lhua so lta'a. Qalaxaye so Israel ỹaỹaten co'ollaxa de'era.
Soua llalqa so Jacob
Qaq soua llalqa so Jacob soomaye ivi' doce. 23Qaq soua llalqa aso Lea, le'enaxat da Rubén so la'auaxanec, qataq jec so Simeón, Leví, Judá, Isacar qataq so Zabulón. 24Qaq soua llalqa aso Raquel: José qataq so Benjamín. 25Qaq soua llalqa aso Bilá asom lamaxashe aso Raquel: Dan qataq so Neftalí. 26Qaq soua llalqa aso Zilpa, asom lamaxashe aso Lea: Gad qataq so Aser. Qaq 'esoua soua llalqa so Jacob maye lañoqo' co'ollaxa ye Padán Aram.
Da l-leuaxa so Isaac
27Nache so Jacob jec co'ollaxa da nqo'ona so lta'a maye netaña ye Mamre, yem huaqta'a't nỹecpi maye nataqa'en le'enaxat Arbá, qaq yemaye nacheye ye Hebrón. Yem lma' co'ollaxa so Abraham qataq so Isaac. 28Qaq so Isaac mashe ivi' soua ciento ochenta vi'iye da nachaalataxac co'ollaq ileu. 29Nache jec da ỹalegoigui so hua'au lta'alpi, qaq mashe ỹataqta ỹa'axaiquiolec co'ollaq ileu. Qaq soua llalqa Esaú qataq so Jacob, ilalyiñi co'ollaxa somaye.
