So Benjamín qaỹauega ye Egipto
1Qaq som nqouaxa ỹataqta nquictauec co'ollaxa yi'iye 'alhua Canaán. 2Qaq so Jacob qataq soua llalqa co'ollaq mashe imeuo som trigo maye qaỹachegoxota'a co'ollaxa ye Egipto, nache so Jacob 'enapegalo' soua llalqa, 'eeta':
«Qaltaq qavi'iguelaqỹa qome ye Egipto, nache qausheenaxañiỹaique ca qonoq trigo.»
3Qalaxaye so Judá 'enapeco':
«Ñi'iñi ỹale maye sachegoxosoqa'a co'ollaxa, ñimaye ỹataqta ỹataqtegue da la'aqtac, 'eeta': ‹Qom saishet da qanaviqui ca qarqaỹai na'asa, nache saishet da qañe'eguelaqỹa aỹem.› 4Qaq ỹoqo'oye da 'auasheeta ñimaye da qomi' ca'ateguelo nache qomi' qolaq da sesheenaxanaqaique ca trigo, 5qalaxaye da saishet da 'auashen ñimaye da qomi' ca'ateguelo, nache saishet nataqa'en da qolaq. Cha'aye ñi'iñi ỹale qomi' 'enapegalo caillaye, 'eeta': Da saishet da qanaviquiỹa ne'ena ca qarqaỹai na'asa, nache saishet da qañe'eguelaqỹa aỹem.»
6Qaq huaña, nache so Israel 'enapeco':
«¿Ta'ainco' da aỹem qauo'ochec de'era qauem? ¿Ta'ainco' ye qaua'aqtaxañim co'ollaxa que'eca ỹale da huo'o ñi lỹa qarqaỹai?»
7Nache soomaye 'ena'apo':
«Qomye souaxat da ñimaye ỹataqta qalota da nnataxanaxac, da qomi' ichemaxattegalo, qataq denataxaateguec na qoyalaqpi. Qomi' inatta'ape, 'eeta': ¿Ña nca'altauec peta'a ca qarta'ai? ¿Huo'o peta'a ca lỹa qarqaỹai? Qaq qomi' nacherata da sasataxaguet na nnataxanaxacpi ñimaye. ¿Qaq ca 'eeteco' da saỹaanaqa'a da qomi' 'enapegalo, da 'eeta': Qanaviqui qome ca qarqaỹai?»
8Nache so Judá 'enapego' so lta'a Israel, 'eeta':
«Da sauoqtaique da nache queta da ñeca'alaqtauec, qaq no'on da 'aua'aqta'a ñi nsoqolec da jec nache aỹem selo'ogue qome, yaqto' sa qaỹaloq da qolaq, qataq yaqto' 'am qataq qomi', qataq na qochalaqpi saishet qome da seleuaq. 9Aỹem ñañan da selo'ogue damaye. Qaq nachaỹem maye aỹem 'auỹaxanot qome da huo'o ca huaigui damaye. Qaq da saishet da ñe'eguelaxata ne'ena chegoqchiguiña lma', nache da ỹasouaxashet 'am hueto'ot qome 'enauaque naua vi'iye da ñachaalataxac. 10Da qaica ctaxa ca ñeqalanaqtagui, nache sogote ctaxa da mashe qomi' ỹoxoguelo, qataq mashe ye'eguelaxasoq.»
11Qaq huaña nache so Israel, 'enapeco':
«Hua', cha'aye mashe qaica ca lỹa lataxac damaye, qaq no'on da qauo'oche dam shenapec: qauache qome, qauachiỹaguilo caua qarachoxonaxaquilli' ca nme que'eca ỹale. Qauroỹa qome camaye ca ỹataqta no'on ala na souaqta'a 'alhua: qauroỹa ca saq 'amaqtaq qo'oipaq lcha'q le'enaxat bálsamo, qataq ca mirra, qataq ca saq 'amaqtaq dapic lli'i, qataq ca coraxat ama na laita, qataq aca qo'oipaq ala le'enaxat nueces, qataq ca almendras. 12Qataq ỹactec qanqa'eñi aca qauache qo'omi, qataq qavi'iguelaxache qome aca qo'omi maye qami' qaỹe'eguelaxatoto co'ollaxa, cha'aye sa iuena'a da choche nsomaxac damaye. 13¡Qauesomiỹa! Qauaviqui nataqa'en da nsoqolec, nache qaltaq qanqo'oñiỹa que'eca ỹale. 14Qaq Ñim Lo'onatac 'Enauacna maye Qaica ca Ỹaqalanapec, nacheñi qome ñi ỹanem que'eca ỹale da qami' ichoxore'n da yaqto' isouec cam lỹa qarqaỹai qataq ñi Benjamín. Qaq aỹem, da qaica ca ỹalec, qalaq nache 'ena'am ¡nalotañi da qaica ca ỹalec!»
15Nache soua llalqa so Jacob ỹacona co'ollaxa so lachetaqtaxanaxatpi qataq ỹactec naqa'en aso ỹache alom, qataq ỹaue'c so Benjamín, nache je'c, da nqo'oora ye Egipto. Qaq co'ollaq ivitra yemaye nache nachaatreua'a so José, 16qaq so José co'ollaq ila'a so Benjamín da nnaictagueto soomaye, nache 'enapega som ilotague' so lma', 'eeta':
«'Auauegalo qome ñi ima' ne'enaua shiỹaxau', nache 'aualauat qome aca huaca, nache 'auo'ot ca nallec, cha'aye qomele na'a'q laiñi nache iquia'axau' qome naamaye.»
17Nache se'eso ilotague' so nma' ipacchigui da ỹo'ot 'enauac dam ỹamaxalec so José, nache huetegueto soomaye da ỹauegalo so lma' so José. 18Qalaxaye soomaye ỹataqta ñi'i' souaxat da qaỹauegalo so lma' so José. Nache 'ena'apo':
«¡Yo'oqta da qomi' qanauegalo ne'ena souaxat aso qorom maye qomi' qaỹe'eguelaxatema soua na'axa'te lỹa't, asom huetaguilo soua qarachoxonaxaqui', qaq nagui yo'oqta da qomi' qaicogaxana'ape, nache qomi' qaỹo'onataxanaxa'n da choche qomi' nlataqa, qataq nataqa'en naua qarelo!»
19Qaq ỹoqo'oye soomaye co'ollaq mashe ivildeua'a so lasom so nỹec, nache nquiguereua'a som ilotague' so nma' da detaxairapegue' somaye, 20nache soomaye, 'ena'apo':
«¡'Am qarataxala', qomi' 'auchoxore'n qome! Cha'aye ỹoqta 'eesa da soua na'axa'te lỹa't qomi' ñanaguenaq da sesheenaxanaxa na trigo, 21qalaxaye so seviraxa yem 'alhua maye huaña da ñemataxauec se'eso pe, nache selaqalec aso qorom maye qarsheetenaxanaqte da huetanguilo naua ala'api soua qarachoxonaxaqui'. Qalaxaye ñachoqtac ayemaye da 'am she'eguelaxataxam. 22Qataq nataqa'en ñachoqtac aye laỹe qorom da yaqto' sesheenaxanaxa ca trigo. Qalaxaye qomi' sa saỹaanaq, chaq negue't co'ollaxa ca ỹoxochiguilo soua qarachoxonaxaqui' ayem hua'auñi qorom.»
23Nache som ilotague' so nma', 'enapeco':
«A'aye, qaue'enaxañeetai', saishet qome da qayi'i. Souaxai' nacheñi Ñim Qanatamnaxala'ai qataq natamnaxala' cam qarta'ai, ñim ỹoxochiguilo co'ollaxa aso anom naua ala'api soua qarachoxonaxaquilli', cha'aye aỹem mashe saconeguet aso anom maye qarsheetenaxanaqchi.»
Nache som ilotague' so nma' nqatec co'ollaxa so Simeón, nache ỹauegueuga so huetra'a soua lqaỹa't. 24Qaq ime co'ollaxa nache 'enauaque soomaye da ỹauegueua'alo so lma' so José, nache ỹanema so 'etaxat da iỹoi' naua lapia'ate, qataq nataqa'en iquia'axa'n soua 'ashenal. 25Qaq soomaye ỹaqataxaatrai' so lachetaqtaxanaxa't, nache iuattra'aguet so José da nvireuo se'eso na'a'q laiñi, cha'aye soomaye mashe ỹaỹate'n da nache huaña yemaye da deque'e'.
26Qaq so José co'ollaq ivireua'a so lma', nache soomaye ỹanema som lachetaqtaxanaxa't maye ndotrai', nache ỹa'alyiñi naua l-llecte, qataq iviraxata'agueta naqa'en naua lata'pi na 'alhua. 27Nache so José ina't soomaye, da qaica camachaqca, qataq nataqa'en ina't soomaye, 'eeta':
«¿Qaica peta'a camachaqca cam qarta'ai, cam ỹa'axaiquiolec maye aỹem qaua'axacheetapeguem caillaye? ¿Peta'a ñaq nca'altauec camaxa?»
28Nache soomaye qaltaq ỹa'alyiñi naua l-llecte, nache 'ena'apo':
«Ñim qarta'a maye 'aramaxashec, ñimaye qaica ca dá. Ñaq nca'altauec.»
29Nache so José ỹamatapiguiñi, nache ila'a so Benjamín som lalamaxat lqaỹa, maye 'oonolec so lta'a qataq aso late'e. Nache 'enapeco':
«¿De'era peta'a nachera da qarqaỹai na'asa dam aỹem qaua'axacheetapeguem caillaye? ¡Ñim Lo'onatac 'Enauacna 'am ỹaalec qome ca lchoxonnataxanaxa, 'am ỹalcolec!»
Qaq co'ollaq nasaxauec de'era, 30nache so José nomteguet da ntonaxac co'ollaq ilo'ot so lqaỹa, nache ỹataqta sa nalo'oguet da nnoinaxac. Nache iỹalapigui' da taigui so lma', huaña nache nỹeetac. 31Qaq co'ollaq mashe vi'iiguet da nnoinaxac, nache napilot. Ime nache pa'auec, nache 'enapeco':
«¡Qanỹoqoisheguem da nallec!»
32Nache qanỹoxosheguem so aloq so José, qalaq ỹaqauga qanqa'en so lquia'axala', qataq soua llalqa so Jacob ỹaqauga qanqa'en so lquia'axala', qataq so Egipto le'ecpi maye lquia'axaua so José nataqa'en ỹaqauga qanqa'en so lquia'axala', cha'aye na Egipto le'ecpi deqaiga da lquia'axaua na hebreopi. 33Nache soua lqaỹa't so José nso'ooyiñi, datategueta somaye, hua'auchiguiñi qanqa'en so ỹe, qaq pa'atec qanqa'en so na'asa. Qaq soomaye ỹataqta huo'o da la'aalaxa, nache choche nlota'a't. 34Nache so José iquia'axaneque soomaye som huetalec so lquia'axala', qalaxaye so Benjamín ỹactec naqa'en so ỹanem aloq, qaq saq 'ena'ama soua lỹa't. Nache so José nỹomtegueto soua lqaỹa't, nache soomaye ỹataqta huo'o da lamaicỹaxa'c.
