So José nchoxotalo soua lqaỹa't
1Qaq so José mashe sanalo'oguet da 'eeta', co'ollaq datata'aguet som lamaxashecpi, nache nlamaxaren da detaqa, 'eeta':
«¡Qoquiỹa'ai qome 'enauac ne'ena!»
Nache som lamaxashecpi qaica co'ollaxa ca 'oonolec da no'ona'aguet so José co'ollaq somaye nchoxotalo soua lqaỹa't. 2Qaq huaña, nache ỹataqta ñashetcheguem da nnoinaxac, qaq de'era iviraua'a da ỹaỹaten som hueta'a so lma' lta'araic so faraón. 3Nache so José da'aqtaxanema co'ollaxa soua lqaỹa't, 'eeta':
«Aỹem nachaỹem José. ¿Ña nca'altauec peta'a ca ita'a?»
Qalaxaye soua lqaỹa't saỹañoxo't co'ollaxa da ỹasatreguet somaye, souaxat da ỹataqta lta'araic da lcolanaqa' da datatro'ot somaye. 4Qalaxaye so José 'enapegalo, 'eeta':
«Ñaq aỹem qarqouaquic da aỹem qanquiquiiua'a.»
Qaq co'ollaq nquiguereuo soomaye, nache so José 'enapeco':
«Nachaỹem maye aỹem qarqaỹai José, maye aỹem qaumiñiỹot co'ollaxa na Egipto le'ecpi. 5Qalaxaye aỹem qarqouaquic qome, da saishet da qauaquicoi, qataq saishet qome da huo'o ca qantogotaxaqui souaxat da aỹem qaumiñi co'ollaxa, cha'aye Ñim Lo'onatac 'Enauacna, aỹem na'auaxanegue co'ollaxa ne'ena da yaqto' ñeca'alaxatec da nachaalataxac na shiỹaxauapi. 6Qaq mashe inoxoorec soua dos vi'iye da huo'o na nqouaxa ne'ena 'alhua, qalaq saxanaqcaua caua cinco vi'iye cam huaiguilo qome da saishet da qanqat ca ala ca nañiguishec, na'aictoxo' da qoỹaañi ca nañiguishec. 7Qalaxaye Ñim Lo'onatac 'Enauacna aỹem namaq co'ollaq saxanaxa da qauanaỹeecna'a, da yaqto' ñeca'alaxatec da qanachaalataxaqui, qaq 'era da 'eetec da huo'o qome cam qami' chegoxogueta, da no'onalec ana 'alhua. 8Qaq nacheñi Ñim Lo'onatac 'Enauacna Ñim aỹem namaxa co'ollaxa ne'ena 'alhua, qaq saishet da nacheqami'. Ñimaye aỹem ỹanagui da aỹem ltaua ñi faraón, qataq da selo'ogue ñi lma', qataq nataqa'en aỹem ỹanagui da selo'ogue 'enauac na 'alhua Egipto. 9Qaq no'on da sa qanaỹaloxoñi da qanqo'oñiỹa ca hueta'a cam ita'a, nache qaua'aqtaxañim camaye, qoñiita': Ñim 'aỹa'alec José 'eeta' da la'aqtac: Ñim Lo'onatac 'Enauacna aỹem ỹanagui da selo'ogue 'enauac na Egipto. Qaq sa 'anaỹaloxon qome da 'auanac, da yaqto' aỹem 'anauane'. 10Nache qonalec qome yem 'alhua le'enaxat Gosén, 'arỹateuo na 'aỹa'alaqpi, 'arhualpi, qataq na 'ana'atetpi, qataq 'enauac nam 'aralamaxatpi. Qaq yaqto' sa qaỹapeque 'anqa'en aỹem. 11Qaq huaina'a qome, nache 'am, qataq na 'aỹa'alaqpi qataq 'enauac na 'am hueta'aguet, sanem na nallec da yaqto' saishet da huo'o ca qaviñiitaique, cha'aye saxanaqcaua caua cinco vi'iye maye huetaiguilo qome na nqouaxa. 12Qaq da ỹaqaỹa Benjamín qataq qami', qaua'aqaichigui da nachaỹem da shenapec de'era. 13Qaq qaua'aqtaxañim qome ca ita'a dam ỹa'añaxac da selotague' na Egipto, qataq 'enauac nam qauauañiichigui ne'ena soota'a. ¡Qaq sa qanaỹaloxoñi qome da qavi'iguiñiỹa'a da qanaviqui ca ita'a!»
14Nache so José nqapale' so lqaỹa Benjamín, nache nỹen. Qaq nataqa'en so Benjamín nỹeetac co'ollaq nqapalta'ai' so lqaỹa José. 15Qaq ime, nache so José napigoxoi'salo 'enauaque soua lqaỹa't, nache nỹeetac co'ollaq nqapalta'ai'salo soomaye. Qaq co'ollaq ime de'era, nache soua lqaỹa't ishet da detaxairapegue' somaye.
16Qaq co'ollaq ivireua'a da na'axaỹaxac so lma' lta'araic so faraón da soua lqaỹa't so José mashe nvi't, nache so faraón qataq so ltauapi ỹataqta machiguiñi. 17Nache so faraón 'enapego' so José, 'eeta':
«Qonapega caua 'arqaỹa't da iỹoxolec na lla'ac caua lalo, nache ỹe'eguelaxaregue da Canaán, 18da yaqto' aỹem nauegalo ca lta'a qataq cam llalaqpi. Qaq aỹem sanem qome ca ỹataqta no'on 'alhua ne'ena Egipto, qaq yaqto' chectac qome ca ỹataqta no'on ala na nañiguishec maye ñaxaalec ne'ena 'alhua. 19Qataq qonapegalo caamaye da ỹaue'c caua naigonal ỹachegoxotchiguiña na Egipto, da yaqto' ỹe'eguena'alo, nache naue'c caua lhua't qataq caua llalqa, qataq nataqa'en cam qarta'ai. Qaq anac qome 20camayepi, qaq saishet qome da ỹaquicoqchet da huo'o ca no'onañi cam hueto'ot nagui, cha'aye nam ỹataqta no'on nam hueta'a na Egipto, taỹot qome camayepi.»
21Nache soua llalqa so Israel ỹo'o't dam qaỹamaxaleguete. Qaq so José, nache ỹanema soua naigonal, ipacchigui naqa'en da lamaxasoxonaxac so faraón, qataq ỹanema soomaye so aloq da huangui so nqa'aic. 22Qataq nataqa'en ỹanema soua dalaxaiqolqa anogo da yaqto' naralaxa't soua alogo, qaq so Benjamín qalaq ỹanem aso trescientas monedas na plata qataq ỹanema soua cinco anogo. 23Qataq ỹamaxa so lta'a soua diez 'ashenal nlaqaaleguete nam ỹataqta no'on maye chegaqaña ye Egipto, qataq soua lỹa't diez 'ashenal nlaqaaleguete na trigo, qataq aso nauole qataq so nallec da yaqto' aloq so lta'a da huangui so nqa'aic da ivita da anac. 24Qaq so José co'ollaq ncoyegueneto soua lqaỹa't, nache 'enapegalo, 'eeta':
«Saishet qome da qancotaitega't da huangui na nqa'aic.»
Nache soomaye je'c, 25chegoqchiyiña ye Egipto, nache ivilda'a ye Canaán yem netaña co'ollaxa so lta'a Jacob. 26Qaq co'ollaq da'aqtaxaarem so Jacob da so José ñaq nca'altauec, qataq nacheso so ilotague' 'enauac ye Egipto, nache so Jacob sa ỹaỹaten ca 'eetec qataq cam la'aqtac, cha'aye somaye sa ỹa'amaqten de'era qaỹa'aqtaxaateguem. 27Qalaxaye soomaye co'ollaq ỹa'axatem so Jacob 'enauac nam la'aqtacpi so José, qataq co'ollaq ila'alo soua naigonal maye ỹama'q so José da ỹauotaique nnotaxaqui' somaye da ivita da qaỹauec, nache ỹataqta nomteguet da lta'araic la'añaxac. 28Qaq huaña, nache 'enapec:
«¡Hua', 'eeso'oya' da mashe saỹaten ca ỹalec José da ñaq nca'altauec! Qaq aỹem ñeqo'ona qome camaye da yaqto' ñauane', nagui da saxanaxa da seleu.»
