Ñim Nataxala' ỹasateguet so Habacuc
1Aỹem, ỹataqta ñelotauec da sauanaxaatac
sheeta'am ca nauanaxanaxanec
da netaña cam lauanaxanaqa',
da ñauaataique cam la'aqtac Ñim Nataxala',
qataq ca 'eetec cam lasataxac da ỹasateguet nam ñachoxocpi.
2Nache Ñim Nataxala' aỹem ỹasateguet, 'eeta':
«'Erelec qome ca 'alhua laỹe dapaqaic
nam 'am sachaxanapi,
yaqto' ỹataqta sailaua'ague qome da qaitaxaỹaxan.
3Qaq na'aictoxo' de'era 'arauanaqchec
da ñaq qaỹoqta cam laloqo' da yo'oq,
qalaxaye damaye ipacchigui qome.
Qaq 'am ñaq 'auata'a qome damaye
na'aictaxa da qaỹaloqta,
cha'aye damaye ỹataqta ipacchigui
qom ivita ca laloqo'.
4Qaq nam qauemaicpi namayepi
ỹataqta na'amqaanaxaicpi,
qalaxaye nam no'on da lataxac qalaq
nache nca'altauec qome souaxat da lpi'iỹaxac.
5Qataq nam na'amqaanaxaicpi
nmitta'a da na'añaxac,
nache qaica ca nmataxac da nmitta'a
qataq nquigaxattauec damaye.
Na'aictaxa de'era na'añaxac da ishet da deque'elaqtaxan.
Qataq ỹataqta ỹauattagui na alap,
'eeta'am aca huachiqui,
qataq sa icoma', 'eeta'am da nleuaxa,
qaq ỹoqo'oye sa nden da jec,
da iloquiaxan nam ỹotta'a't shiỹaxauapi,
da yaqto' loxonec namayepi.
6Qalaxaye 'enauac nam ỹotta'a't shiỹaxauapi
maye noxonecpi co'ollaxa,
namayepi choche ỹe'eetac nam
doxonaxanpi co'ollaxa, nache do'onaxaatai'
qome, 'eeta':
¡Choxoraicolec 'am maye 'ausalligui
nam saishet da 'aralamaxatpi!
Qaq ¿chaq laguio' da 'axaañi da 'alapootasheguem
da nsallaxa maye choche 'ara'aalec?
7Qaq cha'aye qom saishet da huo'o ca 'auauotaique,
nache nque'elaxatta da nvi' nam 'aravigaqtaxanaxala'pi,
qataq nlouec qome nam ỹo'ot da 'arcolanaxa
nache qouetauec naqa'en.
8Qaq souaxat da ỹataqta qalota
nam 'auo'orauec co'ollaxa ỹotta'a't shiỹaxauapi,
nache 'enauac ne'ena ỹotta'a't nhuo' le'ecpi 'am ỹo'orauec qome,
souaxat da ỹataqta qalota so 'aualauat shiỹaxauapi,
qataq da ỹataqta qaica ca 'auren nam hueta'a ne'ena 'alhua,
qataq nam huaqta'a't nỹecpi qataq nam netaigui namayepi.
9Qaq choxoraxaso' 'am, maye 'anlaxatchigui na 'arma' nam 'arcachaxatpi,
cha'aye 'anshetaique da 'am ỹet 'enauac na lcheguesat.
10Qaq 'era da huo'omshe imattalec 'anqa'en da ncoxo na 'arma',
qataq souaxat da qalota so 'aulaxachigui ỹotta'a't shiỹaxauapi,
nache maiche 'anasouaxaala't.
11Qaq ivira'a qome na coma'pi ca npaqtaxanaxat,
qataq ca nllecnaxanaxat 'epaqpi, ỹa'alaq da 'am dataỹa'aguet.
12Qaq choxoraxaso', 'am Babilonia
maye 'ano'oxoosheguem na huaqta'a't nỹecpi,
da chegoqchigui 'anqa'en naua 'aucolde'c ntago'q,
qataq dam qauem lataxac.
13Qaq Ñim Nataxala' maye Qaica ca Ỹaqalanapec,
ỹo'ot qome da qaica ca naigui da 'aro'onataxanaxac qataq da 'arasamaxa,
cha'aye 'enauac nam 'aro'onatac
nlachiguiñi qome da ỹavigaxat ca norec.
14Qaq cha'aye 'enauac ana 'alhua da nlaxagui qome,
da nauattonaxanaxac da llo'oxoyec Ñim Nataxala',
'eeta'am ca 'etaxat da nlaxagui naqa'en aso auaxai.
15¡Qaq choxoraxaso' 'am maye 'autaqchet naxa na 'arhuoreuapi,
'anỹomaxaatapigui na lataxa maye 'aualecneguet na deshenataxan,
da yaqto' 'aue'enai', nache 'aumeteetac da huetauec!
16Qaq damaye saishet qome da ỹo'ot ca 'ayo'oxoyec,
nacherata da 'am talec naqa'en da 'ara'agaxa,
cha'aye Ñim Nataxala', 'am ỹanem qome
da 'anỹomgui aca ỹomaxaqui,
maye ỹo'ot da 'aula'a dam sa nateneuo 'arataxac,
huaña nache da 'ayo'oxoyec nmeneguet da qaica ca 'ara'amaqchec.
17Qaq cha'aye dam qauem maye 'auo'otec
co'ollaxa añim qasoxonaxa ye Líbano,
damaye 'am talec qome,
qataq dam nalaataguec som shiguiỹacpi, maye 'auo'ot co'ollaxa,
damaye 'am iquichoqchet qome.
Qaq de'era 'am talec qome souaxat da qalota so 'aualauat,
qataq da qaica ca 'auren nam hueta'a ne'ena 'alhua,
qataq na huaqta'a't nỹecpi, qataq nam netaigui namayepi.
18Qaq ¿negue'tom cam naigui ca ne'enaqtac,
da ime da qaỹo'ottac?
Qataq ¿negue'tom cam naigui cam choche ne'enaqtac ye saq 'en?
Cha'aye nam ne'enaqtacpi, ye saishet da detaqa,
nache ¿cam 'eeteco' da pe'etega namayepi,
cam shiỹaxaua maye maiche lo'onatac namayepi?
19¡Qaq choxoraxaso' 'am Babilonia maye qonetega naxa
ca ne'enaqtac 'epaq da nlouec,
qataq ca coma' maye qaicaua caua la'aqtaqa da nachaañi!
¿Peta'a isheto' da dapaxaguenataxa'n caamaye?
Cha'aye na'aictaxa da qalapaxalec ca oro qataq ca plata,
qalaxaye caamaye qaica cam lca'alaqa'.»
20Qalaxaye Ñim Nataxala' qalaq netaigui
añim qui'itta lalamaqte atamnaxaqui.
¡Qaq de'enaxaatai' qome da datato'ot Ñimaye,
'enauac nam netalec ana 'alhua!
