1Qaq co'ollaq mashe dos vi'iye da lo'onataxanaxac da nta'a so Darío, nache so la'auaxanec na'a'q so ca'agoxoic seis, nache Ñim Nataxala' ỹachegoxotchigui so na'aqtaxanaxanec Hageo, da ỹamaxa so la'aqtac so nta'a ye Judá maye le'enaxat Zorobabel som llalec so Salatiel, qataq so Josué som llalec so Josadac maye lataxala' so ntaxaỹaxanaxanecpi. 2«Qaq 'era da la'aqtac Ñim Nataxala' maye Qaica ca Ỹaqalanapec, maye ỹachegoxotchigui so na'aqtaxanaxanec, 'eeta': ‹Ne'ena nhuo' le'ecpi 'eetega saxanaxa da ivita ca laloqo' da qaltaq qano'oxoosheguem añi ỹalamaqte atamnaxaqui.›» 3Qaq huaña nache nvitalo naua la'aqtaqa Ñim Nataxala', so na'aqtaxanaxanec Hageo, 'eeta': 4«¿Qaq peta'a nacheye yem laloxoqui qanqa'eñi qami', da qoñeetaiguilo naua qarma'achilli' maye ỹaguec da 'onaxaiqa, qaq añim ỹalamaqte atamnaxaqui qalaq ỹataqta qaica ca lyac? 5Qaq ỹoqo'oye Aỹem, Nataxala' maye Qaica ca Seqalanapec, qami' shenapegalo da ỹataqta quennataxañeelec de'era qarataxaqui. 6Qami' ỹataqta qalota qome ca qa'añiguishequi, qalaxaye saq 'amaqtaq cam ala maye qanqachi; qataq qauqui'iitac, qalaxaye saishet da qami' comaraxaiqa; qanỹomiitac, qalaxaye ñaq 'eetalec da huo'o na qaraquipi; qaỹa'añiiñi na sansatta nogoxot, qalaq saishet da qami' napaqre'c, qataq ca do'onataxaatac qalaq qaica ca naigui aca lasheue da lo'onataxanaxac. 7Qaq Aỹem Nataxala' maye Qaica ca Seqalanapec, qami' shenapegalo da qauennataxañeelec de'era qarataxaqui. 8Qanqo'oñiỹa qome ana qasoxonaxapi, nache qandoiuo na 'epaq, da qaltaq qano'oxoñeesheguem añi atamnaxaqui. Qaq Aỹem samachiguiñi qome da soota'a añimaye, qataq huaña nache sachaxan da ỹo'oxoyec. 9Qami', lta'araic da qarmitaxanaxaqui, qalaxaye saq 'amaqtaq ca qauanachiỹa; qataq nam qauaỹamaxache maye qauachiỹaigui ca qarmaye, qalaq sauota'a na ỹa'at da sequetetec. ¿Ta'ainco'? qomye souaxat da ñi ima' ỹataqta nlatañi, qaq qami' qalaq nda'a't da qarhuogoqoi da qauo'ocheeta'ape naua qarma'achilli'. Qaq 'era da ỹa'aqtac Aỹem Nataxala'. 10Qaq ỹoqo'oye saishet da qami' taleguete na auot, qataq ana 'alhua saishet da ñaxat naqa'en na nañiguishec. 11Aỹem maye nachaỹem so'otec da deqaqa na no'onaxapi, qataq ana qasoxonaxapi, qataq na trigo lma'pi, qataq na uva lma'pi, qataq na oliivo lma'pi, qataq 'enauac nam ñaxaalec na 'alhua, qataq na shiỹaxauapi, qataq na shiguiỹacpi, qataq 'enauac nam no'onatacpi.»
12Nache so Zorobabel maye llalec so Salatiel, qataq so Josué maye llalec so Josadac, som lataxala' so ntaxaỹaxanaxanecpi, qataq 'enauac so nhuo' le'ecpi, ỹataqta huo'o da lcolanaxa co'ollaq hua'axaỹa da la'aqtac Ñim Nataxala' maye ỹa'axat so na'aqtaxanaxanec Hageo, qaq 'era da la'aqtac, Ñim Lo'onatac 'Enauacna maye Nataxala', da ỹamaxalec somaye da ỹa'axat. 13Nache so Hageo, maye lamaxashec Ñim Lo'onatac 'Enauacna, da'aqtaxanem so nhuo' le'ecpi da la'aqtac Ñimaye, 'eeta': «Aỹem qami' soota'agueta, 'enapec, Ñim Nataxala'.» 14Qaq 'era da 'eetec Ñim Nataxala' da ỹa'añaqchet so Zorobabel, maye nta'a ye Judá, qataq so Josué maye lataxala' so ntaxaỹaxanaxanecpi, qataq 'enauac so laỹepi nhuo' le'ecpi. Nache somayepi jec da do'onataxan da ỹo'ot so lma' Ñim Nataxala' maye Qaica ca Ỹaqalanapec, 15huetoigui so na'a'q veinticuatro som ca'agoxoic seis, co'ollaq mashe dos vi'iye da nta'a so Darío.
