So Jesús napacalec da la'amaqchec so Moisés
1Qami' ỹaqaỹa't, Ñim Lo'onatac 'Enauacna qami' iỹaxanalo qataq qami' lca'agui'she da ỹauo'oi qami' lalamaqa'ate. Ỹoqo'oye iuen da ỹataqta qauennataxañiitelec qataq qauloichigui So Cristo: Somaye qomi' qanamaxalo co'ollaxa qataq nacheso so lataxala' nam ntaxaỹaxanaxanecpi da qaitaxaỹapegue' Ñimaye. 2Ñim Lo'onatac 'Enauacna 'enapega co'ollaxa da qomi' itaua'n, nache Somaye ỹalaq, 'eeta'am so Moisés da ỹalaq co'ollaq, Ñim Lo'onatac 'Enauacna 'enapega da itauan 'enauac so lauo'.
3Qalaxaye Ñim Lo'onatac 'Enauacna ỹami' So Jesús da napacalec so Moisés da la'amaqchec. 'Eeta'am da qano'oxoosheguem ca nỹec, cha'aye cam no'oxoosheguem ca nỹec camaye ỹactec da la'amaqchec, qaq sa 'ena'am ca nỹec. 4'Enauac nam nỹecpi huo'o cam ỹataqta chegoqchigui da ỹo'ot, qalaxaye Ñim Lo'onatac 'Enauacna, nacheñi Ñim ỹo'ot 'enauac nam huo'o. 5So Moisés do'onataxaatacot Ñim Lo'onatac 'Enauacna qataq ỹalaxaguet 'enauac, ỹoqo'oye itauan so nhuo' le'ecpi maye lalamaxatpi Ñim Lo'onatac 'Enauacna ỹataqta ipagaqchiichigui dam la'aqtac Ñimaye, qataq da'aqtaxaateguem se'eso lalamaxatpi Ñim Lo'onatac 'Enauacna dam huotaique ỹa'axat Ñimaye maye ñaq natauo. 6Qalaxaye So Cristo, som Llalec Ñim Lo'onatac 'Enauacna, Somaye ỹataqta laxaraic qataq itauan nam lalamaxatpi Ñimaye. Qaq qomi' nache qaraỹepi ne'ena lalamaxatpi Ñimaye da qolaqtot da ña'añaxataxac da qarpi'iỹaxac qataq da ñetonaqtapeguec cam nca'alaxa maye saconaxaguet qome.
Da nalaxayec
7Qaq ỹoqo'oye iuen da qaỹo'ot da la'aqtac So Saqcha'a Na'añaxac Qui'itta maye 'eeta':
«Nagui da qaua'aqaichigui ca 'enapec
Ñim Lo'onatac 'Enauacna,
8qalaq saishet da qami' qaramchiguilo,
da qoñiita'am da 'eetec co'ollaxa so Israel le'ecpi,
maye saishet da huotaique da ỹalaq
co'ollaq hualec so toolec 'alhua.
Somayepi huotaique da ỹaỹaten ca tachiguiña
da Ñim Lo'onatac 'Enauacna na'añaxateguet
dam lataxac somayepi maye sa ỹalaq.
Qaq ỹoqo'oye Ñim Lo'onatac 'Enauacna
'enapega somayepi, 'eeta':
9Na'aictaxa da saỹamaxatta ivittrec soua
cuarenta vi'iye so hua'au qarta'ailpi,
qalaxaye nache 'ena'am da Aỹem ỹe'eguen
co'ollaq hualec so toolec 'alhua.
10Qaq ỹoqo'oye Aỹem salemata,
nache sachaxana somayepi da huetaigui da lsomaxac,
cha'aye saishet da ỹalaxaguet nam ỹamaxasoxonaxacpi.
11Qaq ỹoqo'oye co'ollaq mashe salemata,
nache san da ỹa'aqtac, sheeta':
‹Saishet da sashenem
da huenoxoneua'a yem 'alhua maye sachaxanapeguem
namayepi da nmataqa'.›»
12¡Qami' ỹaqaỹa't, maxatchaxa qome! Saishet da qauennacheetega ca qauem qataq saishet da qaỹa'axañiiuec da qanaquitaxaqui, yaqto' saishet da qoquiỹa'ai Ñim Lo'onatac 'Enauacna maye chochaq tatec da nca'altauec. 13Nachaqrata nagui da ñaqauo'o ye qardaqa'ai, nache ñi 'oonolec ỹa'añaqchet ca lỹa da yaqto' queto'ot da naquitaxac. Yaqto' qaica ca 'eetega da 'onaxaic da qaỹauo'o ca nasouaxashet qataq qaica ca sa ỹalaxaguet Ñim Lo'onatac 'Enauacna. 14Cha'aye da hua'auchiguiñi, co'ollaq sepi'iỹaqa'a So Cristo, nache chegoqchiguiña da qartaua Somaye; qaq da saishet da saxanaxauec da qarpi'iỹaxac Somaye, nache nataqa'en nache 'eetai' da qartaua. 15Ỹoqo'oye ana nere maye huetalec na la'aqtacpi Ñim Lo'onatac 'Enauacna 'eeta':
«Nagui da qami' qaua'aqaichigui ca 'enapec Ñim Lo'onatac 'Enauacna,
qalaq saishet da qami' qaramchiguilo,
da qoñiita'am co'ollaxa so Israel le'ecpi
maye saishet da huotaique da ỹalaq.»
16Qaq ¿chaq negue't co'ollaxa som hua'aqchigui da la'aqtac Ñim Lo'onatac 'Enauacna, nache sa ỹalaq? ¡Qomye 'enauac som nqateeguesop co'ollaxa ye 'alhua Egipto so Moisés! 17Qataq ¿chaq negue't som ivi't soua cuarenta vi'iye da dalemataỹa Ñim Lo'onatac 'Enauacna? ¡Qomye som huo'o dam lasouaxashet co'ollaxa, nache 'enauac somayepi ileu co'ollaq hualec so toolec 'alhua! 18Qataq ¿chaq negue't som detaxaỹa co'ollaxa Ñim Lo'onatac 'Enauacna da yaqto' saishet da huo'o ca nmataxac naqa'en da hualec ye 'alhua Canaán? ¡Qomye som saishet co'ollaxa da ỹalaq! 19Qaq ỹoqta 'eesa da somayepi da saishet co'ollaxa da huenoxoneua'a ye 'alhua Canaán da yaqto' nmatec, cha'aye qaica ca lpi'iỹaxac Ñim Lo'onatac 'Enauacna.
