Hebreos 4

₁Qaq ỹoqo'oye nagui da ñaq huo'o da qomi' qaỹachaxanapecoto da ishet da senoxonaxaua'a ca nmataxac Ñim Lo'onatac 'Enauacna, nache ỹataqta ñetelaqañi qome. Ten, qom huo'o ca 'oonolec da qoñiita da saishet da huenoxoneua'a de'era mataxac maye ỹachaxanapec Ñimaye. ₂Cha'aye qomi' sa'axasoqchigui da no'on na'axaỹaxac shenaqta'am co'ollaxa so Israel le'ecpi maye ca'ai ye 'alhua Egipto. Qalaxaye nachaqrata da somayepi qaica ca naigui naqa'en de'era hua'aqchigui, cha'aye saishet da ỹa'amaqten qataq saishet da ỹalaxaguet de'era na'aqtaxanaxac. ₃Qalaxaye qomi' sa'amaqtenaq de'era no'on na'axaỹaxac, ỹoqo'oye ishet qome da senoxonaxaua'a da nlagaxayec qataq da ñe'emaxa maye qomi' ỹachaxanapeguema Ñim Lo'onatac 'Enauacna. Qalaxaye nam saishet da da'amqaanataxan, Ñim Lo'onatac 'Enauacna 'enapega 'eeta':

Ñim Lo'onatac 'Enauacna nasaxauec de'era la'aqtac da 'eetega da nmataxac co'ollaq imat da ỹo'ot 'enauacna. ₄Cha'aye huo'o na hueta'a ana nere maye huetalec na la'aqtacpi Ñimaye da ỹa'axa't yi'iye na'a'q maye mataxaqui, 'eeta':

₅Qaq de'era ỹa'axattac qaltaq ỹe'eguelaxalec da ỹa'axat, 'eeta':

₆Qaq som hua'auchiguiñipi maye hua'axaỹa de'era no'on na'axaỹaxac, somayepi saishet da ỹalaxaguet Ñim Lo'onatac 'Enauacna, ỹoqo'oye saishet da ỹañoxot da ỹaconeguet ca nmataxac. Qalaxaye da ỹachaxanapec Ñim Lo'onatac 'Enauacna co'ollaxa, damaye nagui ñaq queta, ₇cha'aye Ñimaye qaltaq qomi' ỹanema da qardaqa', 'eeta'am da la'aqtaxanaxac maye chegoqchigui so David maye nanettalec ana nere maye huetalec na la'aqtacpi Ñimaye, dam mashe sa'axataqtac:

₈Cha'aye so Josué taxa da ỹañoxot so Israel le'ecpi da nmataxanec qataq da huo'o da l-lagaxayec qataq da lle'emaxayec, nache Ñim Lo'onatac 'Enauacna saishettaxa da qaltaq detaxaỹa da ỹan ca lỹa ndaqa'. ₉Qalaxaye qomi' ñaq seuataqtaique que'eca na'a'q, qomi' maye qomi' lalamaqa'ate Ñim Lo'onatac 'Enauacna da saconaxaguet ca qanmataxac maye qomi' ỹachaxanapeguema Ñimaye. ₁₀Nache que'eca na'a'q nam lalamaxatpi Ñim Lo'onatac 'Enauacna cheta'ague qome da nmateeguesop na lo'onatac, 'eeta'am Ñim Lo'onatac 'Enauacna co'ollaq nmateeguesop na lo'onatacpi. ₁₁Qaq ỹoqo'oye qomi' ỹataqta ña'añaxataq da salaxasoxoguet Ñim Lo'onatac 'Enauacna, yaqto' que'eca na'a'q senoxonaxaua'a ca lma' maye nmataqa' Ñimaye. Saishet qome da qolaxague da lataxac som saishet da ỹa'amaqten da no'on na'axaỹaxac.

₁₂Da huo'o ye la'aqtac Ñim Lo'onatac 'Enauacna da nasaxauec qalaq ỹataqta huo'o da la'añaxac qaltaq nca'altauec. Da la'aqtac Ñimaye ỹataqta napacalec na llaxa ca ỹeelonec maye dos naua ala'api, ỹoqo'oye ishet da iviraua'a ye ỹataqta pa'auo da nachaalataxac ca shiỹaxaua. Nataqa'en huaña da ishet da imete'n naua qarhuennataxaco qataq da qaryaxayec, nache ỹachaxa'n da huo'otaq 'onaxaiqa huo'otaq qauema. ₁₃Qaica ca 'oonolec nam lo'onatacpi Ñim Lo'onatac 'Enauacna da huo'otaq ishet da nqañoxocheesop Ñimaye. Cha'aye Ñim Lo'onatac 'Enauacna da ilotalec 'enauac namayepi, qalaq ỹataqta yo'oqta. Qaq ỹoqo'oye da ñachaataxaua'a Ñimaye qalaq ñachoxola't da ñañanaxaguet cam naigui 'enauac nam so'otaq.

₁₄So Jesús, Somaye Llalec Ñim Lo'onatac 'Enauacna, qataq nacheso Som Lataxala' nam ntaxaỹaxanaxanecpi da qaitaxaỹapegue' Ñim Lo'onatac 'Enauacna, Som 'oonolec maye inoxoneua'a ca hueta'a Ñimaye. Qaq ỹoqo'oye iuen da qolaqto'ot da qanaquitaxac Somaye.

₁₅Da lle'eguenataxanaxac so pa'aguenataxanaxaic co'ollaq ỹe'eguen So Jesús, nache 'eeta'am da lle'eguenataxanaxac nagui da qomi' ỹe'egue'n da yaqto' ỹauo'o ca qarasouaxashet, qalaxaye So Jesús co'ollaxa saishet da huo'o ca lasouaxashet. Qaq ỹoqo'oye Somaye ỹaỹaten da saqalaq da qaỹalaxaguet Ñim Lo'onatac 'Enauacna. ₁₆Qaq ỹoqo'oye da huo'o ca qarhuenaxanaxa, nache no'on da maiche sauoqo'o da qanaquitaxac da ñequigaxaua'a ca hueta'a Ñim Lo'onatac 'Enauacna. Qaq Ñimaye qomi' itaua'n, cha'aye ỹataqta soxoraic, qataq qomi' lauotaqa'ate.