So Jesús qataq so Melquisedec
1Se'eso Melquisedec, somaye nacheso so lta'a nam netaña ye nỹecpi ye Salén qataq ltaxaỹaxanaxanec na shiỹaxauapi da qaitaxaỹapegue' Ñim Lo'onatac 'Enauacna maye 'amaqtaqaic. Qaq so Abraham co'ollaq mashe ñe'eguelaq, chegoqta'a so alaataxac maye huaigui co'ollaq ỹalaua't soua nta'al, nache so Melquisedec ca'ata'aguet somaye da yaqto' ỹaconeguet qataq ỹaalec so no'on la'aqtac. 2Nache so Abraham ỹanem so Melquisedec aso ndiezmo maye ỹachegoxotaigui nam lhuotaxanaxatpi maye ỹachegoxotaigui se'eso alaataxac. Qaq de'era ne'enaxat Melquisedec, da hua'auchiguiñi naigui 'eeta': «Nta'a maye no'on da lataxac.» Qalaxaye nataqa'en da qaiỹaxana qalaq lta'a nam netaña ye nỹecpi ye Salén, qaq damaye naigui da «Lta'a da nlagaxayec.» 3Qaq somaye, qaica ca ỹaỹaten ca le'enaxa't caua lta'al qataq cam chegoxoguet lauo', nataqa'en saishet da qaỹaỹaten ca hua'ague co'ollaq ñiguiñi qataq ca huaña da ileu. Qaq ỹoqo'oye so Melquisedec da lo'onataxanaxac da ntaxaỹaxanaxanec, 'eeta'am So Llalec Ñim Lo'onatac 'Enauacna da chochaq tatec da ntaxaỹaxanaxanec da qaitaxaỹapegue' Ñimaye.
4Qaq nagui qami' qauloichigui da 'eetec da la'amaqchec se'eso Melquisedec. Qaq ỹoqo'oye som hua'au qarta'a Abraham ỹanem co'ollaxa somaye aso diezmo maye ỹachegoxotaigui so lhuotaxanaxatpi maye ỹachegoxotaiguilo soua nta'al maye nalattagueto co'ollaxa. 5Qaq naua namaxasoxonaxaco maye chegoqo'oto so Moisés ỹa'axa't da huo'otaq huo'o ca ntaxaỹaxanaxanec da chegaqaigui na llalaqpi so Leví, nache camaye huo'o da na'aqtac da yaqto' talec aca diezmo maye laueque 'enauac na Israel le'ecpi. Na'aictaxa da que'eca ntaxaỹaxanaxanec da maiche nalamaxat nhuo' le'ec, huo'otaq da maiche nqaỹa, qalaxaye nache 'ena'am qoỹami' añi 'oonole nam diez maye laueque namayepi. 6Qaq na'aictaxa da so Melquisedec da saishet da chegoxoguet na llalaqpi so Leví, qalaxaye nache 'ena'am somaye ỹaconeguet aso ndiezmo so Abraham som huo'o co'ollaxa da ỹachaxanapecot Ñim Lo'onatac 'Enauacna.
Qaq ỹoqo'oye so Melquisedec ỹaalec da no'on la'aqtac so Abraham. 7Qaq qomi' 'enauac saỹaanaq, da cam ỹaalec ca no'on la'aqtac ca lỹa, nache camaye ỹactec da la'amaqchec, saq 'ena'am cam ỹaalec ca la'aqtac. 8Na ntaxaỹaxanaxanecpi maye ỹacootapeeguet nagui ana diezmo, namayepi choche shiỹaxauapi, ỹoqo'oye taỹa'a da ileu. Qalaxaye so Melquisedec nache 'eetai' da nca'altauec, cha'aye ana nere maye huetalec na la'aqtacpi Ñim Lo'onatac 'Enauacna saishet da ỹa'axat da ileu somaye. 9Qaq ỹoqo'oye ishet da shenaqta da qara'aqtac, nagui na ltaxaỹaxanaxanecpi na shiỹaxauapi da qaitaxaỹapegue' Ñim Lo'onatac 'Enauacna maye chegaqaigui na llalaqpi so Leví, namayepi nataqa'en ỹami' so Melquisedec ana diezmo. Cha'aye co'ollaq desheetenaxan so Abraham, nache namayepi nataqa'en 'eeta'am da desheetenaxan. 10Nache 'eetec de'era cha'aye 'enauac namayepi maiche chegoxoguet so Abraham. Na'aictaxa co'ollaxa da saxanaxa da ñiguiñi namayepi co'ollaq so Abraham natena'aguet so Melquisedec, qalaxaye 'enauac namayepi 'eeta'am da ỹalectauo, chegoqchigui so Abraham.
Soua dos ntaxaỹaxanaxanaqa maye sa natena't da lataxa'c
11Ñim Lo'onatac 'Enauacna ỹami' na namaxasoxonaxacpi so Israel le'ecpi. Qaq ne'ena namaxasoxonaxacpi qaỹo'ot, cha'aye qaiuennatega da na ntaxaỹaxanaxanecpi maye chegoxoguet na llalaqpi so Leví itauan 'enauac na lauo' le'ecpi da yaqto' nalochiguiñi da lataxac. Qalaxaye ne'ena ntaxaỹaxanaxanecpi sa ỹañoxot da ỹo'ot damaye, ỹoqo'oye iuen da huo'o ca lỹa ntaxaỹaxanaxanec da qaitaxaỹapegue' Ñim Lo'onatac 'Enauacna da huaỹoqtec da lataxac qataq saishet da chegoxoguet so ntaxaỹaxanaxanec Aarón. Nachaqrata da 'eeta'am so Melquisedec. 12Cha'aye da nqochen da lataxac ca ntaxaỹaxanaxanec, nache nataqa'en iuen da qanqochenaxat na namaxasoxonaxacpi.
13-14Se'eso ntaxaỹaxanaxanec da qaitaxaỹapegue' Ñim Lo'onatac 'Enauacna maye huaỹoqtec da lataxac som sa'axataqtac, nacheso So Qarataxala' Jesucristo. Cha'aye 'enauac da saỹatenaq da Somaye saishet da chegoxoguet na llalaqpi so Aarón, nachaqrata da Somaye chegoxoguet so Judá. Qaq nam namaxasoxonaxacpi maye chegoqo'ot so Moisés ỹa'axat da saishet da qaỹachegoxotaigui na llalaqpi so Judá ca ntaxaỹaxanaxanec da qaitaxaỹapegue' Ñim Lo'onatac 'Enauacna. Qaq nachera da huo'omshe sa ỹauano' da qaỹachegoxotaigui ca ntaxaỹaxanaxanec namayepi.
15'Enauac de'era ishet da saỹatenaq da tachigui qarhuel da se'eso ntaxaỹaxanaxanec maye huaỹoqtec da lataxac, somaye 'eeta'am da lataxac so Melquisedec. 16Somaye huaỹoqtec da lataxac, cha'aye saishet da nca'aguishec da chegaqaigui ca 'oonolec nhuo' le'ecpi, nachaqrata da souaxat da Somaye chochaq tatec da lca'alaxa. 17Qaq da ỹa'axat ana nere maye huetalec na la'aqtacpi Ñim Lo'onatac 'Enauacna, 'eeta':
«'Am ntaxaỹaxanaxanec, da 'aro'onataxanaxac chochaq tatec,
qoneta'am da lataxac so Melquisedec.»
18Qaq ỹoqo'oye nam namaxasoxonaxacpi maye chegoqo'ot so Moisés qansogoñi, cha'aye sa naloua'a qataq qaica ca la'añaxac. 19Ne'ena namaxasoxonaxacpi saishet da ỹañoxot da nalochiguiñi naqa'en na shiỹaxauapi. Qaq ỹoqo'oye nagui lta'araic da qanaquitaxac da seuataqta'a Ñim Lo'onatac 'Enauacna da qomi' ỹanema ca ỹactec da lyac, cam ishet da qomi' ỹaueegueta da qanauochaxaua Ñimaye.
20Nataqa'en Ñim Lo'onatac 'Enauacna ỹan so la'aqtac chegoqchigui da maiche la'añaxac da ỹauo'o ca qartaxaỹaxanaxanec maye huaỹoqtec da lataxac. Cha'aye na laỹepi ntaxaỹaxanaxanecpi choche qoỹaneuo qalaxaye saishet da chegoqchigui Ñim Lo'onatac 'Enauacna da ỹan ca la'aqtac da chegoqchigui da maiche la'añaxac. 21Qalaxaye co'ollaq qaỹa'axat So Cristo, nache Ñim Lo'onatac 'Enauacna ỹan da la'aqtac, nanettalec ana nere maye huetalec na la'aqtacpi Ñimaye, 'eeta':
«Ñim Lo'onatac 'Enauacna ỹan da la'aqtac, da 'eetega ipacchigui maye 'eeta':
‹Da 'aro'onataxanaxac da 'am ntaxaỹaxanaxanec chochaq tatec.›
Qaq Ñim Lo'onatac 'Enauacna saishet da naralaxat ca lhuennataxac.»
22Qaq ỹoqo'oye So Jesús, nacheso so ỹataqta 'itchiguiñi naqa'en da no'on qanaỹamaxataxac da ñaỹamaxataxai' Ñim Lo'onatac 'Enauacna. 23Qomi' co'ollaxa ỹataqta qalota so qartaxaỹaxanaxanecpi da detaxaỹapegue' Ñim Lo'onatac 'Enauacna, cha'aye saishet da huo'o ca 'oonolec somayepi da chochaq tatec da nachaalataxac. 24Qalaxaye So Jesús ye saishet da huo'o ca loga't da lca'alaxa. Nache saishet da iuen da huo'o ca lỹa da talec da lo'onataxanaxac da ntaxaỹaxanaxanec da qaitaxaỹapegue' Ñim Lo'onatac 'Enauacna. 25So Jesús ishet da chochaq tatec naqa'en da lca'alaxa nam huotaique da ivira'a da nauochaxaua Ñim Lo'onatac 'Enauacna chegoqchigui Somaye. Cha'aye Somaye, nache 'eetai' da nca'altauec, qataq nache queto'ot da iỹaxaatacot Ñim Lo'onatac 'Enauacna da iỹaxaateguelec namayepi.
26Qaq ỹoqo'oye So Jesús nacheso so 'oonolec da Lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna maye seuenaqtac. Cha'aye Somaye ỹataqta qui'itta, saishet da qauem da lataxac, qataq sa nauane' da huo'o ca lasouaxashet. Qaq Ñim Lo'onatac 'Enauacna nqateeguesop co'ollaxa na 'etaxaloxoicpi, nache tasheguema naqa'en ca hueta'a Ñimaye, nache ỹami' da ỹataqta ỹo'oxoraq, napacalec na laỹepi. 27Qaq Somaye saishet da 'eeta'am na laỹepi ntaxaỹaxanaxanecpi da qaitaxaỹapegue' Ñim Lo'onatac 'Enauacna, cha'aye namayepi ima'ape naua na'axa'te da iuen da ỹalauat ca shiguiỹac da ỹaneuo, da yaqto' ỹavigaxat da ỹanot Ñim Lo'onatac 'Enauacna, qataq iỹaxanot Ñimaye da ỹapalaxat na maiche lasouaxashetpi, ime, qataq jec na lasouaxashetpi na laỹepi Israel le'ecpi. Qaq So Jesús, co'ollaq ileu da yaqto' qaỹapalaxat na qarasouaxashetpi, nache 'oonolec da ỹan da nachaalataxac, nache saishet da qaltaq lỹa da ỹan. 28Na ntaxaỹaxanaxanecpi maye chegoqchigui na namaxasoxonaxacpi maye chegoqo'ot so Moisés namayepi ỹataqta huo'o da lqalaic da ỹataqta imauec da ỹalaxaguet Ñim Lo'onatac 'Enauacna. Qalaxaye co'ollaq ime da qomi' qoỹanema na namaxasoxonaxacpi, nache Ñim Lo'onatac 'Enauacna ỹan da la'aqtac da 'eetega ipacchigui da lataxala' naqa'en na ntaxaỹaxanaxanecpi So Llalec, Som nache 'eetai' da nalochiguiñi da lataxac.
