Hebreos 9

₁So hua'auchiguiñi naỹamaxataxac Ñim Lo'onatac 'Enauacna qomi' ỹanema da lataxac da yaqto' saỹaanaq da sho'oxorenaq Ñimaye. Damaye lataxac da qaỹo'oxoren Ñimaye da huaña ana'ana 'alhua. ₂Som npe'l maye qaỹo'ot co'ollaxa da huaña da qaỹo'oxoren Ñim Lo'onatac 'Enauacna, 'eeta' da lataxac: so hua'auchiguiñi ndaqa', le'enaxat ndaqa' qui'itta somaye hueta'a aso ncoỹaraxanaxaqui qataq so nquia'axala' maye huetaleguete soua nauolel 'ayiiña maye qaiỹotaugalo da lalamaqtel Ñim Lo'onatac 'Enauacna. ₃Qaq dam laỹe so napoxonaxat hualoxolaỹi nataqa'en huo'o so lỹa ndaqa', le'enaxat Ndaqa' sa Qaishetapec, ₄qaq nache hueta'a aso nca'atoxonaxalate maye chegaqaigui na oro maye nca'atoxolate na nchenaxanaxat ama na laita, nataqa'en aso laỹe' da aỹamaxataxac maye imauec da qalapaxalec na oro. Qaq asomaye, nache huetagui aso no'onatole maye chegaqaigui na oro, asomaye huetangui aso nauole le'enaxat maná. Nataqa'en aso lashelte so Aarón maye ñaxatec co'ollaxa qataq soua coma'ye maye nanettaleguete soua diez lamaxasoxonaxaco Ñim Lo'onatac 'Enauacna. ₅Qaq nam pa'asheguem aso laỹe', nache netaleguete soua ne'enaqtaqa maye huo'oi naua laua't. Qaq naua laua't soomaye, nache ipelteetaleguete so lapoxot aso laỹe' soua namaxasoxonaxaco. Qaq damaye naigui da hueta'a Ñim Lo'onatac 'Enauacna. Qaq nagui saishet da iuen da sa'axataqta 'enauac ca lataxac de'era.

₆Qaq 'era da 'eetec da lataxac se'eso npe'l. So ntaxaỹaxanaxanecpi ima'ape naua na'axa'te da huenoxootegueua'a ye ndaqa' maye qui'itta, da ỹo'oxoren Ñim Lo'onatac 'Enauacna. ₇Qalaxaye so pa'auo Ndaqa' maye sa Qaishetapec, qalaq nda'a't ca lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna ishet da taua'a, qalaxaye 'oonolec na'a'q ye vi'i. Ỹachetrauo naua ltago'q na shiguiỹac da ỹaneuo da yaqto' qaỹapalaxat ca maiche lasouaxashet, qataq nam Israel le'ecpi, qataq iỹaxanot Ñim Lo'onatac 'Enauacna da ỹapalaxat na lasouaxashetpi maye saishet da noma. ₈Qaq 'era da 'eetec So Saqcha'a Na'añaxac Qui'itta da qomi' ỹaỹaanaxanaxaneque, da co'ollaq ñaq huo'o se'eso npe'l, nache se'eso ñegueuo so Ndaqa' maye sa Qaishetapec saishet da qaỹashenem ca camachaqca se'eso na'a'q. ₉Qaq 'enauac de'era qaỹo'ot cha'aye qomi' qaỹachaxaategalo da ỹoqta ỹactec da la'amaqchec nagui: sa seshetaq da shenaqtega mashe qaỹapalaxat na qarasouaxashetpi souaxat da sanaxauo aca qarachetaqtaxanaqte, ana saishet da qaỹavigaxat qataq ana qaỹavigaxatta. ₁₀'Enauac ne'ena lataxacpi, damaye ỹa'axat da yo'oqchigui nquia'axac qataq ỹomaxac qataq dam qaỹo'ot ca nỹoxoc da qanaỹamaxateguet ca ño'oxonnataxanaxac. De'era lataxac ỹachaxan ca 'eetec cam qaỹo'ot, qalaxaye saishet da qomi' itaua'n da naralaxat da maiche qarataxac. Qaq de'era lataxac da qaỹo'oxoren Ñim Lo'onatac 'Enauacna, huo'o da naigui, choche ivitta'a da Ñimaye nmeneguet naqa'en dam ỹataqta ỹactec da lyac.

₁₁Qalaxaye mashe sogote da nvi' So Cristo, qaq Somaye nacheso So qoỹanem da Lataxala' na Ntaxaỹaxanaxanecpi da qaitaxaỹapegue' Ñim Lo'onatac 'Enauacna, qaq chegoqchigui Somaye 'enauac nam no'on maye qomi' qoỹanema. Cha'aye yem ndaqa' maye huetasheguema da ntaxaỹaxanaxanec, ỹataqta 'onaxaic qataq nalochiguiñi. Saishet da lo'onatac ca chochaq shiỹaxaua, qataq saishet da lma' ana 'alhua. ₁₂Qaq So Cristo saishet da inoxoneua'a yi'iye ndaqa' da ỹanoto Ñim Lo'onatac 'Enauacna naua ltago'q ca shiguiỹac, nachaqrata da ỹaareuo naua maiche ltago'q qataq 'oonolec da pa'auo, qataq sa iuen da ỹe'eguelaqtalec da huenoxoneuo. ₁₃Ỹoqta 'eesa da la'amqaanataxanaxac na judiopi maye 'eeta': ca shiỹaxaua da nshepaxan da lataxac, nache saishet da ỹañoxot da ỹo'oxoren Ñim Lo'onatac 'Enauacna. Qalaxaye nataqa'en ishet da qui'itta da qaicoreleguete naua ltago'q ca quetaq llalec huo'otaq ca huaca llalec, huo'otaq da qaichegoxolec na alo maye chegaqaigui aca huaca llale maye qaỹavigaxat. ₁₄Qaq da 'enauac damaye da 'eesa da huo'o da la'añaxac, nache ỹactec qone' da la'añaxa'c naua ltago'q So Cristo. Cha'aye chegoqchigui som Saqcha'a Na'añaxac maye chochaq tatec, da So Cristo maiche nañanot Ñim Lo'onatac 'Enauacna da 'eeta'am aca nachetaqtaxanaqte maye qaỹavigaxatta qataq ỹataqta qui'itta. Qaq naua ltago'q, nachenaua naua chegoqchiguilo da qomi' qui'itte' qataq chegoqchiguilo da qaỹapalaxa't naua qarasouaxashe'ete qataq da yaqto' ishet da so'onataxanaqot Ñim Lo'onatac 'Enauacna maye nache 'eetai' da nca'altauec.

₁₅Qaq ỹoqo'oye chegoqchigui So Jesucristo da senoxonaxaua'a dam dalaxaic naỹamaxataxac Ñim Lo'onatac 'Enauacna. Cha'aye so Jesucristo ileu co'ollaxa da yaqto' Ñim Lo'onatac 'Enauacna ỹapalaxat nam qauem maye so'otaq co'ollaq so'onataxanaqteguelec som togoshec aỹamaxataxac. Qataq chegoqchigui da l-leuaxa da qomi' maye qomi' lca'agui'she Ñim Lo'onatac 'Enauacna, saconaxaguet da nca'alaxa chochaq tatec maye ỹachaxanapec Ñimaye. _16-17De'era dalaxaic aỹamaxataxac, 'eeta'am da qaỹo'ot aca nere maye lmalate da qoỹan ca nalamaxat, qalaxaye aca'aca nere, da cam ỹiyiñi shiỹaxaua da ñaq nca'altauec, nache acamaye qaica ca 'enec. ₁₈Qaq ỹoqo'oye Ñim Lo'onatac 'Enauacna co'ollaq ỹo'ot so hua'auchiguiñi naỹamaxataxac, nache ỹataqta qalota so qaỹalauat shiguiỹac. ₁₉Da hua'auchiguiñi 'eeta': so Moisés da'aqtaxanem 'enauac so lauo' le'ecpi da lamaxasoxonaxac qataq na lqataxacpi. Ime, nache ỹacona so qagueta laue togaxaraic qataq aso lcoue ana huoue le'enaxat hisopo, nache ỹelchiingui so 'etaxat maye ỹaleegueta naua ltago'q so huaca llalec qataq so quetaq. Ime, nache ichegoxolec aso nere maye nanettaleguete naua la'aqtaqa Ñim Lo'onatac 'Enauacna, nataqa'en ichegoxolec 'enauac so Israel le'ecpi. ₂₀Qaq co'ollaq imat de'era, nache 'eeta': «Ne'enaua ntago'q, naamaye nachenaua na ỹataqta 'itchiyiñi naqa'en de'era naỹamaxataxac Ñim Lo'onatac 'Enauacna da qami' naỹamaxatto.» ₂₁So Moisés nataqa'en ichegoxoleguete co'ollaxa soua ntago'q se'eso npe'l qataq nam no'onataxanaxatpi maye qaiueetac naxa da qaỹo'ot da ño'oxonnataxanaxac. ₂₂Qaq na namaxasoxonaxacpi ỹa'axat da naua ntago'q hua'c da ishet da ỹapalaxat na nasouaxashetpi maye chegaqaigui nam ỹotta'a't qaỹo'otpi. Qataq iuen da sanaqoto Ñim Lo'onatac 'Enauacna caua ntago'q da yaqto' ỹapalaxat na qarasouaxashetpi.

₂₃Qaq ỹoqo'oye iuen da qaỹalauat se'eso shiguiỹac da yaqto' qaiqui'itaxat 'enauac na huetaigui ñi npe'l maye lqui'i ca hueta'ague da piguem. Qalaxaye ca hueta'ague da piguem iuen cam ỹataqta ỹactec da lyac, napacalec ca nachetaqtaxanaxat shiguiỹac maye qaỹavigaxatta.

₂₄Cha'aye So Cristo saishet da inoxonoigui so npe'l maye lo'onatac so choche shiỹaxauapi, na'aictaxa da se'eso npe'l da somaye choche lqui'i acam ỹoqta 'eesa no'onaxanaxaqui. Cha'aye So Cristo taigue da piguem da yaqto' nqo'oneua'a Ñim Lo'onatac 'Enauacna, da qomi' detaqleguete da yaqto' qomi' ichoxore'n. ₂₅So Cristo saishet da ỹe'eguelaqtalec da huenoxoneuo da, 'eeta'am na nachetaqtaxanaxat maye qaỹavigaxatta maye ỹo'ottac naxa na lataxala'pi na ntaxaỹaxanaxanecpi ana 'alhua, cha'aye namayepi 'oonolec da pa'auo naxa ye vi'i da ỹaareuo naua ntago'q maye saishet da lalamaxat. ₂₆Qaq So Cristo taxa da nache 'eetec nataqa'en de'era, nache Somaye ỹe'eguelaqtalectaxa da ileu, chegoqchiguiña co'ollaq cheta'ague da ỹo'ot ana 'alhua Ñim Lo'onatac 'Enauacna. Qalaxaye ỹoqta 'eesa da nagui da mashe nayeeta'a ca loga'tna, nache So Cristo 'oonolec da nachaxan, nache sa iuen da ỹe'eguelaxalec da nañan. Somaye nachaxan qataq nañan da 'eeta'am aca nachetaqtaxanaqte maye qaỹavigaxatta da yaqto' Ñim Lo'onatac 'Enauacna ỹapalaxat 'enauac na qarasouaxashetpi. ₂₇'Enauac da shenaqta 'oonolec da seleuaq, ime, nache nvi' ca nmitaguec 'enauacna. ₂₈Qaq nache 'eeta'am So Cristo da 'oonolec da nañan da yaqto' qalota da shenaqta na qaỹapalaxat na lasouaxashetpi. Ime, nache Somaye ñe'eguelaxa qome ana 'alhua, qalaxaye saishet da naỹa da qaltaq ileualec na qarasouaxashetpi, nachaqrata da anac da 'enauac qomi' nca'alaxatre'c, qomi' maye seuataqtaique ca lviraxac.