So Oseas nachoxonnot na Israel le'ecpi da ỹe'eguelaxa Ñim Nataxala'
1¡Qami' Israel le'ecpi, qavi'eguelaqaỹa
Ñim Nataxala' maye Qanatamnaxala'ai,
cha'aye souaxat na qarasouaxashechi
nache qoviỹañi!
2Ña qavi'eguelaqaỹa qome Ñim Nataxala',
qauacheetac da achoxonnaxac maye, 'eeta':
«Ña 'auapalaxat qome nam qauempi maye so'otaq,
nache 'auaconeguet qataq 'auamaateguet
da qayo'oxonnataxanaxac maye 'am sanaqtacot.
3Na Asiria le'ecpi saishet qome da qomi' nca'alaxatrec,
qataq saishet da sonaqtalec na caipi da ñaneltaxanaq,
huaña nache saxanaxañi da shenaqtega
qanatamnaxala' na maiche qaro'onatacpi,
cha'aye nache 'amta 'Am Nataxala',
da 'am ỹachegoxoto'ot da nchoxonnataguec
nam qaicaua caua lta'al.»
Ñim Lo'onatac 'Enauacna ỹachaxanapeguem da lchoxonnataxanaxa na Israel le'ecpi
4Da la'aqtac Ñim Nataxala', 'eeta':
«Aỹem saỹamaxaañi qome da qauem lataxac namayepi,
nache choche sechoxoren, souaxat da sauotec namayepi,
cha'aye da ỹayeloxo mashe ca'ai ñaqa'en namayepi.
5Nache sheeta'am qome ca 'aỹa da talec na Israel le'ecpi,
nache namayepi 'eeta'am qome ana lache late'e da huo'o ana lauoxo,
qataq ỹataqta ỹa'areñi na lpa'a'pi, 'eeta'am ana cedropi ye Líbano.
6Qataq ỹataqta qalochiguiñi ana lcouepi,
nache da lyacỹaxac 'eeta'am ana oliivo,
qataq da no'on laitaỹaxac 'eeta'am ana cedropi ye Líbano.
7Nache na Israel le'ecpi qaltaq huetalec qome da itelaqtaxanaxac,
huaña nache ỹataqta nca'altec, 'eeta'am na trigo,
qataq huo'o ana lauoxo 'eeta'am ana nañiguishe uva,
qataq da laitaỹaxac 'eeta'am na ỹataqta no'on lataxa
maye huaña ye Líbano.
8Nache na Efraín, 'enapec qome:
¿Ta'ainco' taxa da satapegueua'a
nam ne'enaqtac atamnaxala'pi?
¡Cha'aye Aỹem ña'axaỹaxana qataq selo'ogue qome
ne'ena ỹalamaxat nhuo' le'ecpi!
Nache Aỹem sheeta'am qome ana qo'oipaq pino
maye nache 'eetai' da daralata da lo'oxoỹaxac,
qaq ne'ena ỹalamaxat nhuo' le'ecpi
Aỹem ỹachegoxoto'ot qome da alaỹaxac.»
9Qaq ca ỹaanaxanaxaic nache ỹaỹateeteguet qome de'era,
qataq ca ỹaanataxanaxaic nache ỹauattoota qome de'era na'aqtac.
Cha'aye 'enauac na ỹo'otpi Ñim Nataxala'
ỹataqta nalochiguiñi,
qaq cam no'on da lataxac nache quetegue qome namayepi,
qalaxaye nam qauemaicpi nache pogolaxaisop qome damaye.
