Oseas 9

₁Qaq 'am Israel, saishet da 'auamachiguiñi,

saishet da 'auparenaxaatai' da 'antonaxac da 'eeta'am na laỹepi shiỹaxauapi,

cha'aye 'anquishishigui da 'ara'amqaanataxanaxac,

souaxat da qoca'ai Ñim 'Anatamnaxala'.

Cha'aye 'anqopita da 'auaconeguet da nsheetenaguec da 'anquishishaxac,

da huaña ye nchegoxosoxonqa' ana ala na nañiguishec.

₂Qaq saishet qome da qaucomachec na trigo qataq ana uva,

qataq qaica qome ca lamaic na dalaxaic lataxa.

₃Qaq nache saishet qome da nache qoñeetalec na 'alhua maye lalamaxat Ñim Nataxala',

nacherata da na Efraín, ỹe'eguelaxa qome ye Egipto,

qataq ye Asiria yem huaña qome da chectac na nallec maye sa qaỹashenem namayepi da chec.

₄Huaña nache qaica ca lataxa da ỹanot Ñim Nataxala',

qataq ana lachetaqtaxanaqtepi saishet da ỹaỹamaxaren Ñimaye.

Qaq aca nauole maye chectac, qalaq 'eeta'am aca nauole da huo'o da nasouaxac,

qaq cam chec acamaye nache saishet da qui'itta.

Qaq namayepi ishet qome da chec aca'aca nauole,

qalaxaye saishet qome da iroua'a añi atamnaxaqui maye lalamaqte Ñim Nataxala'.

₅Qaq ¿chaq negue't cam ishet da qauo'oche qom ivita ca na'a'q maye ño'oxonnataxanaxaqui,

cam na'a'q maye huetoigui da qaỹo'oxoren Ñim Nataxala'?

₆Qaq da qoqui da qananeltaxañeeguet da qanhuaxanaguiiqui,

nache na Egipto le'ecpi qami' ỹaconeua'alo qome,

nache huaña ye Menfis da qami' ilalyiñi.

Qaq ana qaraỹamaqtai plata qalaq ñaxaalec qome ana poqo no'onaxa lashe,

qaq nam qaranataqa'aipi qalaq ñaxaalec qome ana qo'oipaqole maye huo'o ana le.

₇¡Qaq mashe nvi' naua na'axa'te maye huetoiguilo da nhuaxanaguec namayepi!

¡Qataq mashe nvi' naua na'axa'te maye huetoiguilo da nsheetenaguec namayepi!

¡Qaq na Israel le'ecpi, ỹaỹateeta qome de'era!

Namayepi 'enapec: «so na'aqtaxanaxanec ỹataqta qaica ca ỹaỹaana'a.

Qataq so hueto'ot da saqcha'a na'añaxac, huo'o da aloic.»

Qaq 'enapec de'era cha'aye ỹataqta nlaqchigui na qauem,

qataq ỹataqta lta'araic da lquiỹaxanaqtaic.

₈Qaq Ñim Nataxala', ỹanem so la'aqtaxanaxanec da yaqto' nauaatalec na Efraín,

qalaxaye so llec qaỹa'añiỹangui ana qoinapi,

qataq ivira'a da qanquiỹai da huetaigui añi atamnaxaqui maye lalamaqte Ñim Lo'onatac 'Enauacna.

₉Nache ỹataqta qauem da qarataxaqui, 'eeta'am da lataxac som netaña co'ollaxa ye Guibea.

Qalaxaye Ñim Nataxala' ntoueeta'ac de'era qauem qarataxaqui,

nache ỹauo'o qome ca qanhuaxanaguiiqui souaxat nam qarasouaxashechi.

₁₀Qaq da la'aqtac Ñim Nataxala', 'eeta': «Co'ollaq selalec na Israel le'ecpi,

nache ỹataqta samachiguiñi, sheeta'am ca shiỹaxaua da ilalec aca uva da huaña ca toolec 'alhua.

Qataq co'ollaq sela'a so hua'au qarta'ailpi,

nache 'eeta'am da sela'a aca la'auaxana ala ana hiigo.

Qalaxaye co'ollaq ivita so netaña so Baal Pegor,

nache ỹataqta nañaneguet da natameetacot na saq 'en atamnaxala'pi,

nache ivira'a da ỹataqta qaiqaiga, 'eeta'am da nqaigaxa nam lauotaxat natamnaxala'pi.

₁₁Qaq da llo'oxoyec na Efraín, jec qome 'eeta'am ca qoỹo da huaỹo.

Huaña nache qaica ca ñiguiñi nogotolec,

qataq saishet da hualaxai aca 'alo, qataq qaca aca deco'o.

₁₂Qaq na'aictaxa da ishet da ỹaqchet cam llalaqpi,

qalaxaye Aỹem ñeqat qome da nachaalataxac, nache qaica ca ño'onaxatañi.

Qaq choxoraxaso' qom sheca'ai ne'ena shiỹaxauapi.

₁₃Qaq da selota'a ye Efraín, nache ỹataqta 'eeta'am ye Tiro,

maye naña ye no'on 'alhua, qalaxaye so Efraín ỹauecta'a da nleuaxa na llalaqpi».

₁₄'Am Nataxala', ¡ñaq 'anem qome cam 'auauotaique da 'anem namayepi!

Qataq 'anem da sa deco'o, qataq da qaica ca lche' yaqto' saishet da dellepaxanataxan.

₁₅«Qaq huaña co'ollaxa ye Gilgal da ỹo'ot 'enauac na qauem namayepi,

qaq nache huaña nataqa'en da seqaiga namayepi.

Qaq souaxat nam qauem maye ỹo'otpi namayepi,

nache so'orauec qom huaña ñi ima', qataq saxaañi da sauotec namayepi,

cha'aye 'enauac nam lataxala'pi namayepi da sa ỹalaq.

₁₆Qaq ye Efraín que'emaq, nache 'eeta'am aca qo'oipaq maye deqaqa na lpa'a'pi,

nache saishet da qaltaq huo'o aca ala.

Qaq na'aictaxa da huo'o ca llalaqpi, qalaxaye ileu qome ñaqa'en camayepi».