Isaías 10

₁¡Choxoraxaso' nam ỹo'ottac

na nqataxacpi maye saỹaỹamaxañi

qataq ỹa'axatec nam lataxac maye sa qanalo'oguet,

₂qataq saishet da ỹo'otec ca ỹaỹamaqchiguiñi lataxac cam qaica ca la'añaxac,

qataq saishet da ỹo'ot nam no'on lataxacpi

maye huetalec na choxoraqpi maye ỹalamaxatpi,

qataq nhuo' ana pa'aipi qataq decachiỹot na saploqpi!

₃Qaq ¿hua'ago' ca 'eetec qom ivita

da ỹaneuo da lo'onataxanaxac,

qom ilota'aguet da ña qaỹoqteguet

cam nhuaxanaguec namayepi?

Qataq ¿negue't ca ỹe'eguenot da yaqto' itauan?

Qataq ¿hua'ague qome ca ỹacha'ague da lsallaxa?

₄Da saishet qome da nman nache qaỹauec

da qaicoñe' qataq cañe' qanqa'en cam qaỹalauatpi.

Qalaxaye ñaqaiyeta da layeloxo Ñim Nataxala' saishet da vi'iiguet,

Ñimaye nache queto'ot da darenaxaatac.

₅¡Ñim nta'a ye Asiria! Nacheñi ñim so'ogoxona qome

'eeta'am ñaqa'en ca 'epaq qom sauo'o ca iuaxanaxanaxac,

qataq nacheñi ñim nashelte maye seuen qom salemata.

₆Samaxalec qome da iloquiaxan

nam shiỹaxauapi maye qauemaicpi,

nam shiỹaxauapi maye aỹem inogoqchet,

yaqto' decachiỹa qataq deuotaxanec da lsallaxa,

qataq yaqto' petapigui 'eeta'am ca nshaxa

maye huetangui na nqa'aicpi.

₇Qalaxaye ñi nta'a ye Asiria,

saishet da lhuennataxa de'era,

qataq saishet da nachera da tatapigui lauel,

maye nacherata da tatapigui lauel da nlaxaañi

qataq nmatchiguiñi nam qalota ỹotta'a't shiỹaxauapi.

₈Ỹoqo'oye ñimaye 'eeta': «'Enauac na nta'alpi

ỹalaxaguet na ỹamaxasoxonaxacpi da samaq.

₉Cha'aye aỹem, nache 'eeta'a't ñaqa'en yem huaqta'a't nỹecpi

ye Calno qataq ye carquemis, Amat qataq ye Arpad,

ye Samaria qalaq 'eeta'am ye Damasco.

₁₀Aỹem ỹoxonec co'ollaxa so ỹotta'a't shiỹaxauapi maye qalota so natamnaxala'pi,

napacalec so natamnaxala'pi ye Jerusalén qataq ye Samaria.

₁₁Qaq ỹoqo'oye dam so'otec co'ollaxa ye Samaria qataq som natamnaxala'pi,

¿peta'a saisheto' da so'otec nataqa'en ye Jerusalén qataq nam natamnaxala'pi?»

₁₂Qaq Ñim Nataxala' qom imat 'enauac nam ỹo'otecpi qome

añi qasoxonaxa Sión qataq ye Jerusalén,

nache ỹauo'o ca nhuaxanaguec ñi nta'a ye Asiria

souaxat da na'amaqchengui nam ỹo'otpi, qataq da ño'oxonnaxac

qataq da napagaqaanaxac.

₁₃Cha'aye ñimaye 'enapec: «Nam so'otpi

chegoqchigui da maiche ỹa'añaxac,

qataq chegoqchigui da ỹaỹaanec

cha'aye aỹem ỹaanataxanaxaic,

qataq seuotaxanec nam na'alhuapi nam shiỹaxauapi,

qataq sacona da lsallaxa namayepi,

qataq sheeta'am cam 'añaxaic da ỹoxonec so nta'alpi.

₁₄Qataq sauota'a na ihuaq da sacona

da lsallaxa 'enauac na nhuo' le'ecpi,

qataq seuotaxanec 'enauac na 'alhuapi

sheeta'am ca ỹaconalo caua qaỹala't maỹo lco'oue'ete

ỹachegoxotanguilo ca maỹo lpata'c,

nache qaica ca iraxa'n naua laua't,

qataq qaica ca ỹauachigui na alap da ỹa'alaq.»

₁₅Qaq ¿ishet peta'a aca qachepe

da 'eetega ỹactec da la'amaqchec

napacalec cam do'ogoxootega acamaye?

Qataq cam nchegaxanaxat ¿napacalec peta'a

cam dechegaxaatega camaye?

¡'Eeta'am aca nashelte, ye acamaye chochaq 'epaq

qaq saishet da nachaca aca iraxaatapigui'

cam shiỹaxaua maye ỹachetac acamaye!

₁₆Qaq ỹoqo'oye Ñim Nataxala' maye Qaica ca Ỹaqalanapec

qaica qome ca la'añaxac naqa'en nam ỹataqta 'añaxaicpi,

qataq ỹo'ot da 'eroigui na lo'oc

souaxat na le'eraxa ca napaxa.

₁₇Ñim Lo'onatac 'Enauacna maye Qui'itta,

ñim icoỹattalec na Israel le'ecpi,

Ñimaye 'eeta'am qome na le'eraxa ca norec,

nache huaigui ca 'oonolec na'a'q

da ỹavigaxat qataq nlaxaañi ana ỹaxat

qataq na huouesat maye netalec ne'ena 'alhua.

₁₈Nache imauec qome da nlaguiñi naqa'en da lyac

nam lalamaxat aviaqpi qataq nam lanaxanaqa'pi.

Nache 'eeta'am naqa'en ca dalolaxaic da mashe qaica ca la'añaxac.

₁₉Nache ỹataqta saq 'amaqtaq qome

aca no'onañi qo'oipaqpi ne'ena aviaq,

qaq ivira'a catai' nogotolec da ishet da naloqten ye lcata.

₂₀Qaq que'eca na'a'q, nache cam saq 'amaqtaq

maye no'onañi na Israel le'ecpi,

nam chegoxoguetpi so Jacob maye lca'alaxaicpi,

saishet qome da ỹe'eguelaxa da naquitto'ot

nam nlaxaañi co'ollaxa namayepi,

nacherata da deuaxaỹot Ñim Nataxala',

Ñim Qui'itta Natamnaxala' na Israel le'ecpi.

₂₁Qaq huo'o qome ca saq 'amaqtaq

nam chegoxoguetpi so Jacob, cam ỹe'eguelaxa qome

Ñim Lo'onatac 'Enauacna maye 'añaxaic.

₂₂Qami' Israel le'ecpi, na'aictaxa da qami' qalote' qome

da qoñiita'am na lsoche na 'alhua

maye huetangui aso auaxai,

qalaxaye saq 'amaqtache qome caua ñe'eguela'q.

Qaq dam nasataxac da qami' qanlaxaayeñi,

damaye ỹo'ot qome da ỹaatec naqa'en dam nalochiguiñi lataxac.

₂₃Cha'aye Ñim Nataxala' maye Qaica ca Ỹaqalanapec,

mashe ime da lapaxañi da ilaxachigui namayepi,

nache ỹacoolec qome dam huotaique

da ỹo'otec 'enauac ne'ena 'alhua.

₂₄Ñim Nataxala' maye Qaica ca Ỹaqalanapec, 'eeta' da la'aqtac:

Qami' ỹalamaxat nhuo' le'ecpi maye qoñiitaña na Sión,

saishet qome da qayi'iitega ye asiiriopi,

na'aictaxa da qami' ira'alo aca lashelte

da qami' iuaxa'n, qataq da nauaxaỹaxaasheguem

ca npon da qami' dataỹa'agueta,

'eeta'am da 'eetec co'ollaxa ye Egipto le'ecpi.

₂₅Cha'aye mashe saqaỹapeque ye laloqo' da ỹayeloxo,

nache da ỹayeloxo nlaxaañi qome ye 'anpa'aguenaxauapi.

₂₆Ñim Nataxala' maye Qaica ca Ỹaqalanapec

ỹauo'o qome ca nhuaxanaguec yemayepi,

'eeta'am da 'eetec co'ollaq loxonec so Madián le'ecpi

co'ollaq huaña añi coma' maye le'enaxat Oreb,

qataq ỹachaxana da la'añaxac da dataỹa'aguet ye Asiria,

'eeta'am co'ollaq ỹachaxana da la'añaxac da dataỹa'aguet ye Egipto.

₂₇Qaq que'eca na'a'q nache 'am ñeqateeguesop qome,

nam qapa'atta 'aya'ac maye huetalec na 'arallac,

qataq sacagaxachigui qome na nauegaxanaxaqui

'epaq maye huetalec na 'arana'q.

₂₈So alleppi asiiriopi nlectot ye Rimón,

nache ivira'a ye Ayat, qataq nlectot ye Migrón

nache ipatanaña so lla'ac ye Micmas,

₂₉qataq ỹa'axasoxoolec so la'auaxac

nache hua'a da lanataqa' ye Geba.

Qaq ye Ramá qalaq ỹataqta iviloxolaqchet da lcolanaxa,

qataq datauec so shiỹaxauapi ye Gabaa,

maye lma' co'ollaxa so Saúl.

₃₀¡'Ana'alaxañi 'am Bat Galín!

¡Ña 'aua'aqa 'am Lais!

¡Choxoraxaso' 'am Anatot!

₃₁Qaq na lma' ye Madmena qalaq datauec,

qataq nqañoxooñi na lma' ye Guebín.

₃₂Qaq nachena na na'a'q da vi'iiguet na asiiriopi hua'a ye Nob,

qaq damaye la'anaxat da iloquiaxan añi qasoxonaxa Sión,

qataq añi lcomaraxalate ye Jerusalén.

₃₃Ña qauloỹa, Ñim Nataxala' maye Qaica ca Ỹaqalanapec,

ỹa'axasoxooñi ana qo'oipaqpi irolec da la'añaxac maye huo'o da lchec,

ana logorai qo'oipaqpi qalaq hua'axañi

ana qaỹoqotcheguemec qalaq naañi.

₃₄Ỹauota'a aso qachepe da iquesoq

ana qo'oipaqpi ye sansattec aviaq,

ana qo'oipaqpi maye ỹoqta 'onaxai ye Líbano

qalaq 'enauac da hua'axañi.