Isaías 15

₁Qaỹa'axata'a dam talec qome ye Moab.

Qaq so pe maye huetoigui da qailaxachigui ye Ar,

nache huetoigui nataqa'en da dolagui ye Moab,

qataq so pe maye huetoigui da qailaxachigui ye Quir,

nache huetoigui nataqa'en da dolagui ye Moab.

₂Na shiỹaxauapi maye hueta'a ye Dibón,

tasheguema ye natamnaqa' maye nalec na pa'asheguem,

añi lcomaraxalate da yaqto' nỹen,

qaq ye Moab qalaq huo'o da laquicoxo

souaxat da qailaxachigui ye Nebo qataq ye Medeba.

Nache 'enauac namayepi da namarec na lqaic qataq ana lqa' laue.

₃Na shiỹaxauapi qalaq quetagueto

naua nqa'aico ỹaatrañi naua sansattegueta alogo,

qataq da netalec na pa'asheguem na nỹecpi

qalaq na'alaqtapiguiñi souaxat da nqui'ic,

qaq nam hueta'a na mataqa'pi qalaq 'enauac daquicota

nache qaica ca la'añaxac souaxat da nnoinaxac.

₄Ye Hesbón qataq ye Eleale qalaq iỹaxaataique ca ntaunaguec,

qaq da la'alaxac qalaq qaỹa'aqtega ivira'a ye Jahas.

Qaq ỹoqo'oye na alleppi ye Moab ỹataqta ñi'i

qataq nlaqchigui da lcolanaxa.

₅Añi iquiyaqte qalaq huo'o da lyaxa da huo'o ca itauan ye Moab,

cha'aye na hueta'a yemaye datauec

nache ivitta'a ye Sóar, qataq ivitta'a ye Eglat Selisiyá.

Qataq nỹeetague' quetasheguemgue na loigue ye Luhit,

qataq quetague' so nqa'aic maye taỹa'a ye Joronayin

na'alaqtapiguiñi da nqui'ic souaxat dam qauem

maye huaigui yemaye.

₆Na 'etaxat lma'pi ye Nimrín qalaq deqaqa,

na 'auaqpi qalaq nataqa'en deqaqa,

qataq ileu 'enauac na hueta'a ana qo'oipaqpi,

nache qaca aca 'oonole laue da darala.

₇Qaq ỹoqo'oye na shiỹaxauapi laỹona't 'enauac nam logoxoshetpi,

nache ỹache ira'a da pa'aicra'a so la'auaxac Álamos.

₈Cha'aye da noinaxac ivira'alo naua loga'te ye 'alhua Moab,

qataq da na'alaxac ivira'a ye Eglayin qataq ye Ber Elim.

₉Qaq na'aictaxa da nlaqchigui na ntago'q na 'etaxat lma'pi ye Dimón,

qalaxaye ñaqaiyeta ñamaxa qome cam ỹactec da qauem,

ca llon qalaq chec qome cam dataueeguesop ye Moab,

qataq cam lca'alaxaicpi maye no'onalec qome yi'iye 'alhua.