Isaías 17

₁Qaỹa'axata'a dam talec qome ye Damasco.

Ye Damasco saishet qome da nache 'eetai' da huaqta'a't nỹecpi,

yemaye ỹe'eguelaxa qome da 'eeta'am ca lapoosheguem lasogoñi.

₂Nache saishet qome da qaltaq ỹe'eguelaxa da qanayenalec,

huaña nache ñaxaalec qome ca 'auaqpi,

nache cam shiguiỹacpi qaica qome ca ndaqtaique

da chectac ca 'auaqpi.

₃Ye Efraín maye na'amaqteetapigui naxa ye Israel,

qalaq nlaguiñi qome ye huaqta'a't nỹecpi maye mpaxattaua'a,

qaq nache 'eeta'am qome ye Damasco,

qaq cam no'onaña ye Siria, qalaq saishet qome

da hueto'ot da namaxasoxonaxac.

Qaq 'era da la'aqtac Ñim Nataxala' maye Qaica ca Ỹaqalanapec.

₄Que'eca na'a'q nache ye Samaria,

maye na'amaqteetapigui co'ollaxa so Jacob,

deqat qome da la'añaxac, qataq imeuo qome da lsallaxa.

₅Qaq 'eeta'am qome da 'eetec ca nqat na trigo,

qataq laỹona't ana ala ỹauota'aisalo naua lhua'q,

huo'otaq da qalaỹona't ana ala ca nañiguishec

maye huaña ye ca'amegue ye Refayin,

₆yem huaña qome aca no'onañi maye qaicoua'ai.

Qataq 'eeta'am aca oliivo da qaỹacholaxan,

nache dos huo'otaq tres cauatai' no'oirañi ala aca 'oonole lcoue,

huo'otaq cuatro huo'otaq cinco caua no'oirañi aca 'oonole lcheyec.

Qaq 'era da la'aqtac Ñim Nataxala'

maye Natamnaxala' na Israel le'ecpi.

₇Qaq que'eca na'a'q, cam shiỹaxaua ỹe'eguelaxa qome

da ỹamato'ot Ñim Lo'onatac da nachaalataxac,

Ñim Qui'itta Natamnaxala' na Israel le'ecpi.

₈Huaña qome nache saishet da qaltaq ỹe'eguelaxa da naquittega aca lca'atoxonaxalatepi,

huo'otaq ca lỹa ne'enaqtac maye maiche lo'onatac ca shiỹaxaua,

maye huota'aisalo naua lhua'q da ỹo'ot.

Qataq saishet qome da ỹamata'a na lqui'ipi aso Aserá,

huo'otaq ana lca'atoxonaxalatepi maye ỹachalec naxa

da ỹavigaxat na lchenaxanaxat da ỹanot na atamnaxala'pi

₉Qaq que'eca na'a'q, nache nam 'ampaxattaua'a

huaqta'a't nỹecpi qanayeca'ai qome,

'eeta'am co'ollaq qanayeca'ai som huaqta'a't nỹecpi

maye lma' na heveo le'ecpi qataq amorreo le'ecpi,

souaxat da ñi'iỹa na Israel le'ecpi.

Qaq huaña nache ỹe'eguelaxa qome da toolec,

₁₀cha'aye 'aucoua'ai Ñim Lo'onatac 'Enauacna

maye 'am nca'alaxatec co'ollaxa,

qaq saishet da 'antoonec da nacheñi

Ñim qaica ca 'eeta'am 'aye'eguenaxala'.

'Am 'auo'ottac na ỹataqta no'on nanaxanaqa'piolec,

qataq 'aỹa'aateguiñi ana nañiguishe

da yaqto' 'avio'oxoren som chegaqauec atamnaxala',

₁₁qataq so na'a'q co'ollaq 'aỹa'aañi qalaq 'ampaxattalec,

qataq 'auo'otec da ñaxat ana ala ye lỹa na'a'q.

Qalaxaye, qom anac cam nalolaxa

qataq cam qauem maye qaica ca lata',

nache deqat qome na ala nam nañiguishecpi.

₁₂¡Ña qana'axaỹaxañiỹa da lta'araic

l-lamaxa nam qalota shiỹaxauapi,

da l-lamaxa maye 'eeta'am da l-lamaxa aso auaxai!

Qaq de'era nachera da l-lamaxa nam ỹotta'a't shiỹaxauapi,

maye 'eeta'am da l-lamaxa ca qalota 'etaxat.

₁₃Qalaxaye Ñim Lo'onatac 'Enauacna,

qom nlaxa namayepi, nache datauec taỹa ca qaỹoqta,

'eeta'am ca 'auaqpi da ỹache ca la'at,

nache talec naqa'en ana qasoxonaxapi,

huo'otaq aca cotaque da huaỹoxon naqa'en ca la'at lta'araic.

₁₄Qaq ye avit qalaq ỹataqta huo'o da lchec namayepi,

qalaxaye da mashe yaqta'a yo'oxoñi nache qaica.

Qaq 'era da 'eetec qom vi'iiguet nam qomi' nhuottaleguete naxa,

qataq 'era da loga't nam qomi' nlaxattreguiñi naxa.