Qaỹa'axata'a dam talec qome ye Etiopía
1¡Qaq choxoraxaso' yem 'alhua maye chemaqtapeguelec
na 'eeta'am da l-lamaxa aca laua ana shiiquioxoipi,
yem 'alhua maye huaña ye pa'aicra'a yem talapi ye Etiopía,
2maye ỹamaq naxa na ltaxaỹaxanaxanecpi quetague' naqa'en so tala Nilo,
nache quetalec na 'etaxat netangui ana nnotaxaquipi
maye chegaqaigui ana na'aate!
Qauesomiỹa, qami' ntaxaỹaxanaxanecpi maye qami' sailaua'aguelo,
qanqo'oñiỹa yem shiỹaxauapi maye logoraicpi,
qataq qashelec da lo'ocỹaxac,
yem shiỹaxauapi maye ñi'iỹaxat nam pa'aiguelo,
nhuo' le'ecpi maye 'añaxaicpi qataq napagaqaanaxaicpi
yem netalec ye 'alhua maye coleesop na talapi.
3Qaq 'enauac qami' maye qoñiitalec ana 'alhua,
qauloỹa'a qom qanauaxaỹaxaasheguem aca na'ana netalec añi qasoxonaxa,
qataq qaua'aqaichigui qome da l-lamaxa aca nasheerepi.
4Ñim Nataxala' aỹem 'enapega, 'eeta':
«Aỹem soota'a na ima', she'emaqtom da semeteetac namayepi,
sheeta'am na le'eraxa añi nala' da mashe ime na auot,
qataq sheeta'am na napalñi 'aỹa ye na'a'q napaxaỹañi,
maye huetoigui da qanqat na ala na nañiguishec.
5Cha'aye qom saxanaxa da ivita da qanqat aca ala ana uva,
qataq qom mashe naañi aca lauoxo qataq mashe ỹe aca ala,
qalaq hua'auñi qome da qaicheguec aca lcouepi qairota'a ca ỹeelonec,
qaicheguec qome nache qaỹasaxauec.
6Qaq 'enauac qome da qaỹalata'a't acamaye nache huetalec aye qasoxonaxapi,
nache na maỹopi qataq nam shiguiỹacpi maye huauec chectac qome.
Qaq na maỹopi nache hueta'a qome da nvi' na napaxaỹaxa,
qataq 'enauac nam shiguiỹacpi maye huauec nache hueta'a da nvi' na latomaxa.»
7Qaq que'eca na'a'q nache qanda'a qome Ñim Nataxala' maye Qaica ca ỹaqalanapec,
aca lachetaqtaxanaqtepi yem nhuo' le'ecpi maye logoraicpi qataq qashelec da lo'ocỹaxac,
yem shiỹaxauapi maye ñi'iỹaxatpi naua pa'aiguelo, nhuo' le'ecpi maye 'añaxaicpi
qataq napagaqaanaxaicpi maye hueta'a ye 'alhua maye coleesop na talapi.
Nache qanda'a qome añi qasoxonaxa Sión, maye huaña da qaiỹaxana
da le'enaxat Ñim Nataxala' maye Qaica ca Ỹaqalanapec.
