Qaỹa'axata'a dam talec qome ye Egipto
1Qaỹa'axata'a dam talec qome ye Egipto.
Ña qauloỹeeguet nam Nataxala', netalec na ỹataqta qayaqaic lo'oc
na piguem da naỹa'a ye Egipto.
Qaq nam atamnaxala'pi ye Egipto qalaq iviloxol qom nvi' namaye,
qataq nlaxagui qome da lli'iỹaxa ye Egipto le'ecpi.
2Ñim Nataxala', 'enapec.
«Aỹem so'ot qome da colaxagui ye Egipto le'ecpi,
ñi 'oonolec qalaq delogui' qome ca lỹa,
ye auochaxauapi qalaq maiche delogoỹa't,
yem hueta'a ye huaqta'a't nỹecpi qalaq delogui' qome
yem hueta'a ye lỹa huaqta'a't nỹecpi,
ye nta'alpi qalaq nataqa'en maiche delogoỹa't qome.
3Aỹem, she'eguelaxata qome da sa ntouen yemayepi,
qataq sa ipaigui ñaqa'en nam lapaxañipi.
Qaq huaña qome nache inat yem atamnaxala'pi,
qataq ye conaxanaxaicpi, qataq na lqui'ipi so leuaxaicpi,
qataq nam ilaviigui ca lỹa.
4Qalaxaye yem Egipto le'ecpi saneguet qome cam nataxala' maye ỹataqta qaramchigui,
cam nta'a maye qaica ca iren da yaqto' ilo'ogue yemayepi.»
Qaq 'era da la'aqtac Ñim Nataxala' maye Qaica ca Ỹaqalanapec.
5Qaq imeuo qome na 'etaxat so tala Nilo,
nache se'eso tala ỹataqta imauec qome da deqaqa,
6nache na llecpi na 'etaxat ỹataqta qauem qome na laita.
Qataq na la'auaxacpi ye Egipto nquictañi qome nache ivitta'a da deqaqa,
ana coqta qataq ana na'aate qalaq ỹavic,
7yem na'aatesat maye hueto'ot na loigue ye tala Nilo,
qataq 'enauac yem nañiguishec maye hueto'ot na loigue yemaye,
deqaqa qome nache saishet qaltaq ỹe'eguelaxa da huo'o.
8Qaq 'enauac qome nam ya'acoxoicpi ye tala Nilo,
ỹataqta daquicota qome qataq nỹeetac,
nam ỹasaqteguingui naxa ana lqoina qataq na laleguec yi'iye 'etaxat
qalaq ỹataqta qaica qome ca la'añaxac.
9Yem ỹo'ottac naxa na lino qataq anam no'onataxanaqte da qaỹo'ot na lino,
yem depaqtaxaatacpi naxa qalaq saỹaỹaten qome ca 'eetec,
10yem ỹo'ottac naxa na nogoxot qalaq qaica qome ca la'añaxac,
qataq 'enauac yem 'onataxanaxaicpi saỹaỹaten qome ca 'eetec.
11¡Qami' nataxala'pi na Soán, ỹataqta qaica ca qauaỹaañiỹapec,
nam ỹaanaxanaxaicpi maye chegoqtecot na nqataxacpi ye Egipto,
namayepi ỹataqta 'eesa da qaica ca ỹaỹaanapec!
¿Ca 'eeteco' da ishet da qoñiỹapega co'ollaxa ñi faraón da, qoñiita':
«Qomi' sachegoxosoxoguet so ỹaanaxanaxaicpi, qataq som hua'au nta'alpi co'ollaxa?»
12'Am faraón ¿ca hueta'ague ca 'artauapi
maye ỹaanaxanaxaicpi da yaqto' 'am ỹapaxaguen,
qataq 'am da'aqtaxanem nam lapaxañipi Ñim Nataxala'
maye Qaica ca Ỹaqalanapec da dataỹa'aguet ye Egipto?
13Na nataxala'pi ye Soán ỹataqta qaica ca ỹaỹaanapec,
nam nataxala'pi ye Menfis qalaq hua'aqta'a da qaỹatenachet,
qataq nam nataxala'pi naua lỹa't 'aleu' yi'iye 'alhua,
qalaq ỹo'ot da npe'en da llecỹaxac ye Egipto.
14Cha'aye Ñim Nataxala' ỹanaigui namayepi so saqcha'a
som isomaxanaqchet 'enauac nam ỹo'otpi na Egipto le'ecpi,
'eeta'am ca taxaic da anoltac qataq sa ntouen.
15Nache qaica qome ca 'añaxaic, huo'otaq ca qaica ca la'añaxac,
ca sallaxanec huo'otaq ca choxoraq
da ishet da huo'o ca ỹo'otec ye Egipto.
16Qaq que'eca na'a'q nache ye Egipto le'ecpi 'eeta'am qome na 'alpi, cha'aye ỹataqta nlaxagui qome da lli'iỹaxa qataq da lcolanaxa, qom ilo'ot Ñim Nataxala' maye Qaica ca Ỹaqalanapec da nauaxaỹaxaasheguem na lhuaq da dataỹa'aguet yemayepi. 17Ye Egipto le'ecpi ỹataqta ñi'iỹa qome na Judá le'ecpi, qom choche tachigui lauel da le'enaxat namayepi nache nlaxagui da lcolanaxa, souaxat na lapaxañipi Ñim Nataxala' maye Qaica ca Ỹaqalanapec da dataỹa'aguet ye Egipto le'ecpi. 18Qaq que'eca na'a'q nache ye Egipto, huo'o qome ca cinco huaqta'a't nỹecpi maye ỹotta'a't naua nañalo da ỹaỹaten da detaxaiguilo naua hebreo la'aqtaqa, qataq ỹan qome ca la'aqtac da ỹalaxaguet Ñim Nataxala' maye Qaica ca Ỹaqalanapec. Qaq ca 'oonolec que'eca Huaqta'a't Nỹecpi, le'enaxat qome da Nala'. 19Qataq que'eca na'a'q, huo'o qome aca nca'atoxonaxalate da lalamaqte qanqa'en Ñim Nataxala', ñichiguingui na laiñi ye 'alhua Egipto, qataq ye sa qaỹapeque ye loga't yi'iye 'alhua, nache naña qome aca qano'oxoosheguem coma' da yaqto' qaỹo'oxoren Ñim Nataxala'. 20Qaq damaye la'anaxat da yaqto' 'enauac ye 'alhua Egipto, saishet da icoua'ai Ñim Nataxala' maye qaica ca Ỹaqalanapec. Qaq yemayepi qom iỹaxanot Ñim Nataxala' da itauan souaxat nam sa iyacnapec yemayepi, nache Ñimaye namaq qome ca lca'alaxaqui da yaqto' iueelec qataq nca'alaxatec. 21Qaq Ñim Nataxala' nachaxana qome ye Egipto le'ecpi, nache yemayepi ỹauatton qome Ñimaye, huaña nache ỹo'oxoren qataq ỹanot cam lachetaqtaxanaxat qaỹavigaxat, qataq cam laỹepi lachetaqtaxanaxatpi maye ala nam nañiguishec. Qataq ỹauo'o qome cam ỹachaxanapecot Ñim Nataxala', nache ipacchigui qome da ỹo'ot. 22Ñim Nataxala', ique'emaqchet qome ye Egipto le'ecpi, qalaxaye qaltaq nataren qome, qaq yemayepi ỹe'eguelaxa qome Ñim Nataxala', qaq Ñimaye ichoxoren qome yemayepi nache nataren. 23Qaq que'eca na'a'q, huo'o qome ca qalotegue nqa'aic chegoqchiguiña ye Egipto, nache ivitta'a ye Asiria, nache ye Asiria le'ecpi ishet qome da ivira'a ye Egipto, qataq ye Egipto le'ecpi, ivira'a qome ye Asiria, nache ye Egipto le'ecpi qataq ye Asiria le'ecpi huaxaỹa't qome da ỹo'oxoren Ñim Nataxala'. 24Qaq que'eca na'a'q, nache na Israel le'ecpi huaxaiguet ye Egipto le'ecpi qataq ye Asiria le'ecpi, qaq nache chegoqchigui qome da nchoxonnataguec 'enauac na huetalec ana 'alhua. 25Qaq Ñim Nataxala' maye qaica ca Ỹaqalanapec ỹanem qome da lchoxonnataxanaxa, 'eeta': «Aỹem sanem da ichoxonnataxanaxa ye Egipto le'ecpi, nhuo' le'ecpi maye ỹalamaxatpi, ye Asiria le'ecpi maye ỹo'onatacpi qataq na Israel le'ecpi maye maiche ỹalamaxatpi».
